ޔާމީނަށް އިންތިޚާބަށް ކުރިމަތިލެވުމާ ގުޅޭގޮތުން އީސީން ވަކި ގޮތެއް ނިންމަން ވެއްޖެ: ޝަރީފު
22 އެޕްރީލު 2023 | ހޮނިހިރު 07:32ހުކުމެއް ތަންފީޒު ކުރަމުންދާ ފަރާތެއްގެ މައްސަލަ އިސްތިއުނާފު މަރުހަލާގައި ކުރިއަށްދާނަމަ އެ ފަރާތަކަށް އިންތިޚާބުތަކަށް ކުރިމަޔި ލެވޭނެތޯ ނުވަތަ ނޫންތޯ އީސީން ނިންމަން ވެއްޖެ
ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފު
ކުރީގެ ރައީސް އަބްދުﷲ ޔާމީންއަށް މިއަހަރު އޮންނަ ރިޔާސީ އިންތިޚާބަށް ކުރިމަތިލެއްވުމުގެ ފުރުސަތު ދިނުމާ ގުޅޭގޮތުން އިލެކްޝަންސް ކޮމިޝަނުން މިހާރު ގޮތެއް ނިންމަން ޖެހޭ ކަމަށް ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެއްޖެއެވެ.
ހޮނިހިރު ދުވަހު ޝަރީފު ކުރެއްވި ޓްވީޓެއްގައި ވިދާޅުވީ ޝަރުއީ ހުކުމެއް ތަންފީޒު ކުރަމުންދާ ފަރާތެއްގެ މައްސަލަ އިސްތިއުނާފު މަރުހަލާގައި ކުރިއަށްދާނަމަ އެ ފަރާތަކަށް އިންތިޚާބުތަކަށް ކުރިމަތި ލެވޭނެތޯ ނުވަތަ ނޫންތޯ އީސީން ނިންމަން ވެއްޖެ ކަމަށެވެ. އެގޮތުން، އިދިކޮޅު އެންމެ ބޮޑު ޕާޓީ ކަމަށްވާ ޕީޕީއެމްގެ ރިޔާސީ ކެންޑިޑޭޓް ކަމަށްވާ ކުރީގެ ރައީސް ޔާމީން، ހުކުމެއް ތަންފީޒު ކުރައްވަމުން ވަޑައިގަންނަވާއިރު އެ ހުކުމް އިސްތިއުނާފުކޮށްފައިވާ ކަމަށާއި ނަމަވެސް އިސްތިއުނާފުގައި ނިހާއީ ހުކުމަކާ ހަމައަށް އަދި ނާދެވޭ ކަމަށް ވެސް އޭނާ ފާހަގަކުރެއްވިއެވެ.
މިފަދަ ހާލަތުގައި ޔާމީންގެ ކެންޑިޑެސީ އާ މެދު އަވަހަށް އީސީން ގޮތެއް ނިންމަން ޖެހޭ ކަމަށާއި ޕީޕީއެމަށްވެސް ކުރިއަށްދެވޭނީ އެކަމާ މެދު ގޮތެއް ނިންމައިގެން ކަމަށް ޝަރީފު ވިދާޅުވިއެވެ.
ޝަރީފު ވަނީ މި މައްސަލައިގައި ޔާމީނަށް ކުރިއަށް އޮތް ރިޔާސީ އިންތިޚާބުގައި ވާދަ ކުރެއްވިދާނެ ކަމަށް އީސީގެ ރައީސް ފުވާދު ތައުފީގު ވިދާޅުވެފައިވާކަން ވެސް ފާހަގަކުރައްވާފައެވެ. އެހެންކަމުން ވަކި ސީދާ ގޮތެއް ކަނޑައަޅަން ޖެހޭ ކަމަށް އޭނާ ވިދާޅުވިއެވެ.
ރާއްޖޭގެ މީޑިއާކަށް ދެއްވި އިންޓަވިއުއެއްގައި ފުވާދު ވިދާޅުވީ ސުޕްރިމްކޯޓުގެ ނިހާއީ ހުކުމެއް ނާންނަހާ ހިނދަކު ޔާމީނަށް އިންތިހާބުގައި ވާދަކުރެއްވުމުގެ ފުރުސަތު ބޮޑުކަމަށެވެ.
ފުވާދު މިފަދައިން ވިދާޅުވެފައިވާއިރު އިދިކޮޅު ޕީޕީއެމުން ވަނީ އެ ޕާޓީގެ ރިޔާސީ ޓިކެޓް، ޔާމީނަށް އަރުވާފައެވެ. އަދި ކެމްޕޭން ވަރަށް އަވަހަށް ފަށާނެ ކަމަށް އެ ޕާޓީން ވަނީ ބުނެފައެވެ.
ވ. އާރަށުގެ ޚިޔާނާތުގެ މައްސަލައިގައި ކުރީގެ ރައީސް ޔާމީންގެ މައްޗަށް ޝަރީޢަތުން އޮތީ ޙުކުމެއް ކޮށްފައެވެ. ޔާމީންގެ މައްޗަށް ކުރި މަނީ ލޯންޑަރިންގެ ކުށުގެ ދައުވާގައި 7 އަހަރަށް ޖަލަށް ލުމާއެކު، 5 މިލިއަން ޑޮލަރުން ޖޫރިމަނާ ކުރުމަށް ޙުކުމް ކޮށްފައިވާއިރު ރިޝްވަތު ޤަބޫލު ކުރުމުގެ ކުށުގެ ދައުވާ ސާބިތުވެފައިވާކަަމަށް ކަނޑައަޅައި، 4 އަހަރުގެ ޖަލު ޙުކުމެއް ވަނީ އިއްވާފައެވެ.
