ސޫދާނުގައި ހިނގަމުންދާ ހަނގުރާމައިގައި 400ށްވުރެ ގިނަ މީހުން މަރުވެ 3،500ށްވުރެ ގިނަ މީހުން ޒަޚަމްވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.

ޑަބްލިއުއެޗްއޯގެ ތަރުޖަމާނު މާގަރެޓް ހެރިސް ވިދާޅުވީ، ހަތަރުސަތޭކަ ތިރީސް މީހުން މަރުވެ، 3،551 މީހުންނަށް އަނިޔާވެފައިވާ ކަމަށެވެ. ސޫދާނުގެ ހެލްތު މިނިސްޓްރީގެ ހިސާބުތަކާ ހަވާލާދީ ޑަބްލިއުއެޗްއޯގެ ތަރުޖަމާނު ވިދާޅުވީ 20 ސިއްހީ ފެސިލިޓީގެ މަސައްކަތް ހުއްޓިފައިވާ ކަމަށާއި އެގައުމުގައި 12 ފެސިލިޓީ ހުއްޓާލުމުގެ ނުރައްކާ އޮތް ކަމަށް ވެސް ވިދާޅުވިއެވެ.

މިކަމުގެ އަސަރު ކުރާނީ މި ބިރުވެރި ޖަރީމާގެ ތެރޭގައި ޒަޚަމްވެފައިވާ މީހުންނަށް އެކަނިނޫންކަމަށާ ކުރިން ފަރުވާ ހޯދަމުން އައި މީހުންނަށްވެސް ވަރަށް ބޮޑަށް އެކަމުގެ އަސަރު ކުރާނެ ކަމަށް ތަރުޖަމާނު ވިދާޅުވިއެވެ.

އދ.ގެ ކުޑަކުދިންނާ ބެހޭ އިދާރާ ޔުނިސެފުން މައުލޫމާތު ދީފައިވާ ގޮތުގައި މަރުވި މީހުންގެ ތެރޭގައި މަދުވެގެން ނުވަ ކުއްޖަކު ހިމެނެއެވެ. އަދި 50 އަށް ވުރެ ގިނަ ކުދިން ޒަޚަމްވެފައިވާ ކަމަށް އެ އިދާރާއިން މައުލޫމާތު ދީފައިވެއެވެ.

ހަނގުރާމައިގެ ސަބަބުން އެގައުމުގެ ކުދި ދަރިންނަށް ބޮޑު ގެއްލުމެއް ލިބެމުން އެބަދާކަމަށާ ހަނގުރާމައިގެ ޖަރީމާ ކުރިއަށްދާހާ ހިނދަކު އެކަމުގެ އަގު ދައްކަމުން ގެންދާނީ ކުޑަކުދިން ކަމަށް ޔުނިސެފުން ބުނެފައިވެއެވެ. މި ހަނގުރާމައިގެ މާނައަކީ ގިނަ އާއިލާތައް ތާށިވެ، ކަރަންޓް ލިބޭ މިންވަރު މަދުވެ ނުވަތަ އެއްގޮތަކަށް ނުލިބި، ކާނާ އާއި ފެނާއި ބޭސް ހުސްވެދާނެ ކަމުގެ ބިރު،ބޮޑުވެގެން ދިއުން ކަމަށް ޔުނިސެފްގެ ތަރުޖަމާނު ޖޭމްސް އެލްޑަރ ވިދާޅުވިއެވެ.

ދުނިޔޭގައިވެސް އެންމެ ގިނައިން ކުޑަކުދިންނަށް ކާނާ ލިބުން ދަތިވެފައިވާ އެއް ސަރަހައްދު ސޫދާނުގައި ކުރިން ވެސް އޮތް ކަމަށާއި ކުއްލިއަކަށްފެށި މި ހަނގުރާމައިގެ ސަބަބުން ކްރިޓިކަލް ލައިފް ސޭވިންގ ކެއާ މިހާރު ވަނީ އެއްކޮންހެން ހުއްޓިފައި ކަމަށް ވެސް އޭނާ ވިދާޅުވިއެވެ.

މި ހަނގުރާމައިގެ ސަބަބުން 40 މިލިއަނަށް ވުރެ ގިނަ ޑޮލަރުގެ ވެކްސިން އާއި އިންސިއުލިން ކޯލްޑް ސްޓޯރޭޖް ނުރައްކަލުގެ ތެރެއަށް ވައްޓާލާފައިވާ ކަމަށް ވެސް ވިދާޅުވެ އޭނާ ވަނީ އެކަން ދުނިޔޭގެ ޚާއްސަ ސަމާލު ކަމަށް ގެންނަވާފައެވެ.