އުނިކުރި 15 ޕޮއިންޓު އަލުން ދިނުމުން ޔުވެންޓަސް ތިން ވަނަ އަށް

ކުޅުންތެރިން ގަނެވިއްކުމުގައި މާލީ ގޮތުން މަކަރު ހެދިކަން ސާބިތުވެ، ޔުވެންޓަސްގެ ކިބައިން އުނިކުރި 15 ޕޮއިންޓް އަލުން ދޭން އިޓަލީގެ އެންމެ މަތީ ކުޅިވަރު ކޯޓުން ނިންމުމާއެކު އިޓާލިއަން ލީގުގެ ތިން ވަނަ އަށް އެޓީމު ޖެހިލައިފި އެވެ.

ޔުވެންޓަސް އަށް މިދިޔަ ޖެނުއަރީ މަހު އަދަބު ދިނީ 2018 އިން 2020އާ ދެމެދުކުރި މާލީ މުއާމަލާތްތަކުގައި މަކަރު ހަދައި ބެލެންސް ޝީޓް އޮޅުވާލީތީ އެވެ. މިކަމުގެ ކުށުގައި އެކުލަބުގެ 11 ޑިރެކްޓަރަކަށް ވެސް އަދަބު ދިނެވެ. މީގެ ތެރެއިން އިނގިރޭސިވިލާތުގެ ޓޮޓެންހަމަށް ބަދަލުވި ޑިރެކްޓަރުގެ އިސްތިއުނާފު ކާމިޔާބެއްނުވި އެވެ.

އިޓަލީގެ ސްޕޯޓްސް ގެރެންޓީ ބޯޑުން ބުނީ ކޯޓުން ނިންމާފައިވަނީ ޔުވެންޓަސްގެ އިސްތިއުނާފު އަލުން ބެލުމަށެވެ. އަދި އާ ފަނޑިޔާރުންގެ ބެންޗަކުން އަލުން މި މައްސަލާގައި ގޮތެއް ނިންމަންދެން އުނިކުރި ޕޮއިންޓް އިއާދަކުރުމަށެވެ. ނަމަވެސް ދެވަނަ ފަހަރަށް މައްސަލަ ބަލައި ނިމޭއިރު އަދިވެސް ޔުވެންޓަސް އަށް މައްސަލަ ނާކާމިޔާބުވުމުގެ ފުރުސަތު ބޮޑުކަމަށް އިޓަލީގެ ނޫސްތަކުން ބުނެ އެވެ.

މި މައްސަލާގައި ގާނޫނީ ވަކީލުން ފުރަތަމަ އެދުނީ ޔުވެންޓަސްއިން ނުވަ ޕޮއިންޓް އުނިކުރުމަށެވެ. ނަމަވެސް މައްސަލަ ބެލި ބެންޗުން ނިންމީ 15 ޕޮއިންޓް އުނިކުރުމަށެވެ.

ޓޭބަލުގެ 11ވަނައިން ޔުވެންޓަސް މިހާރު ތިން ވަނާގައި އޮތީ 59 ޕޮއިންޓާއެކުގަ އެވެ. އެއްވަނާގައިވަނީ 75 ޕޮއިންޓާއެކު ނާޕޮލީ އެވެ. ދެވަނާގައިވަނީ 61 ޕޮއިންޓާއެކު ލާޒިއޯ އެވެ. ޔުވެންޓަސްގެ ޕޮއިންޓް އަލުން ދިނުމުން އެންމެ ބޮޑަށް ގެއްލުން ދެއްކީ ރޯމާ އާއި މިލާނުގެ ވާދަވެރި ދެ ޓީމު ކަމަށްވާ އޭސީ މިލާނާއި އިންޓަމިލާނަށެވެ. ރޯމާ މިވަގުތު ހަތަރުވަނާގައިވަނީ 56 ޕޮއިންޓާއެކުގަ އެވެ. އެސީ މިލާނަށް 53 ޕޮއިންޓް އަދި އިންޓަމިލާނަށް ލިބެނީ 51 ޕޮއިންޓާއެކު ހަވަނަ އެވެ. ޔުވެންޓަސް ކުރިއަށް އައުމަކީ އަންނަ ސީޒަނުގެ ޗެމްޕިއަންސް ލީގުން ޖާގަ ހޯދުމަށް މި ޓީމުތަކުން ކުރާ މަސައްކަތަކަށް އެޅުނު ހުރަހެކެވެ.