ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހައްޔަރުކުރި ފައިހް ނިޒާމް (25އ) ގެ މައްޗަށް ދައުވާކުރާނެކަމަށް ޕްރޮސެކިއުޓަރ ޖެނެރަލް އޮފީހުން ބުނެފިއެވެ.

އެކަން ބަޔާންކޮށްފައިވަނީ ފައިހްގެ ބަންދާމެދު ގޮތެއް ނިންމުމަށް ހާޒިރުކުރުމުން އޭނާގެ ބަންދަށް 7 ދުވަސް ޖަހައި ކްރިމިނަލް ކޯޓުން ނެރުނު އަމުރުގައެވެ. އެގޮތުން އޭނާގެ މައްޗަށް ދައުވާ ކުރުމަށް މި ހަފްތާ ތެރޭގައި ކޯޓަށް މައްސަލަ ހުށައަޅާނެކަމަށް ދައުލަތުން ބުނެފައިވާކަން ކޯޓު އަމުރުގައި ބަޔާންކޮށްފައިވެއެވެ. ނަމަވެސް އޭނާގެ މައްޗަށް ކުރާ ދައުވާއާ ގުޅޭ އިތުރު ތަފްސީލެއް އޭގައި ބަޔާންކޮށްފައެއް ނުވެއެވެ.

ފައިހް އަމިއްލައަށް ފުލުހުންނާ ޙަވާލުވީ ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން އޭނާ ހޯދާތާ މަހަކަށްވުރެ ގިނަ ދުވަސް ވެފައިވަނިކޮށެވެ. އޭނާ ހައްޔަރު ކުރިޔަ ނުދިނުމަށްޓަކައި ފޮރުވައިގެން ގެންގުޅޭ ކަމަށް ތުހުމަތުކުރެވޭ ބަޔަކު ހައްޔަރުވެސް ކުރިއެވެ.

އޭނާ ބަންދު ކުރުމަށް ކްރިމިނަލް ކޯޓުން އަމުރުކުރީ މުޖުތަމައުގެ ސަލާމަތަށް ނުރައްކާވެދާނެތީއާއި، ހެއްކަށް ނުފޫޒު ފޯރުވަފާނެތީއެވެ. އޭނާއާ ދެކޮޅަށް ހުށައެޅި ހެކިތަކުގެ ތެރޭގައި މަންޒަރު ފެނުުނު ހެކިންގެ ބަޔާނާއި، އަނިޔާ ލިބުނު މީހާގެ ބަޔާނާއި، އޭނާގެ ކުށުގެ ރެކޯޑާއި، ވީޑިއޯ އެންޑް އިމޭޖް އެނާލިސިސް ރިޕޯޓު ހިމެނެއެވެ.

ކްރިމިނަލް ކޯޓުގައި އަމުރު ނެރުއްވީ ގާޒީ ހުސައިން ފާއިޒް ރަޝާދެވެ.