ޝަރީޢަތްތަކުގައި ދެކެވޭ ވާހަކަތައް ލިއުމަށް ތިރިކޮށްދޭ ފަރާތްތަކުގެ ދަފުތަރާ ގުޅޭ އުސޫލު އާންމުކޮށްފި
އަޑުއަހައިގެން ލިޔެވޭ ރިކޯޑިންގއަކީ 20 މިނިޓަށް ވުރެ ކުރު ނޫން ރިކޯޑިންގއެއް ކަމުގައި ވާންޖެހޭ
ޝަރީޢަތްތަކުގައި ދެކެވޭ ވާހަކަތައް ލިޔާނެ މީހުންގެ ދަފްތަރެއް އެކުލަވާލާން ވަނީ ނިންމާފައި
ކޯޓުތަކުގެ ޝަރީޢަތްތަކުގައި ދެކެވޭ ވާހަކަތައް ލިޔުމަށް ތިރިކޮށްދޭ ފަރާތްތަކުގެ ދަފުތަރާ ގުޅޭ އުސޫލު އާންމުކޮށްފިއެވެ.
މި އުސޫލަކީ، ދިވެހިރާއްޖޭގެ ކޯޓުތަކުން ހިންގާ ޝަރީޢަތްތަކުގެ ރިކޯޑިންގ އަޑު އަހައިގެން އެ ވާހަކަތައް މަޙްޟަރުކުރުމަށް ނުވަތަ ލިޔެދިނުމަށް ޝައުޤުވެރިކަން ފާޅުކޮށް، އެކަމަށް އެދޭ ފަރާތްތަކުގެ ތެރެއިން "ޝަރީޢަތްތަކުގައި ދެކެވޭ ވާހަކަތައް މަޙްޟަރުކުރާ ފަރާތްތަކުގެ ދަފުތަރު" ގައި ރަޖިސްޓަރީ ކުރެވޭ ފަރާތްތަކުން، ޝަރީޢަތުގެ މަޖިލިސްތަކުގައި ދެކެވޭ ވާހަކަތައް މަޙްޟަރުކުރުމުގައި، ޢަމަލުކުރާނެ ގޮތް ބަޔާންކުރާ އުސޫލެވެ.
މި އުސޫލުގެ މަގުސަދަކީ، ދިވެހިރާއްޖޭގެ ކޯޓުތަކުން ހިންގާ ޝަރީ ޢަތްތަކުގައި ދެކެވޭ ވާހަކަތަކުގެ ރިކޯޑިންގ އަޑުއަހައިގެން އެ ވާހަކަތައް ލިޔުމުގައި ކޯޓުތަކަށް ދިމާވާ ދަތިކަން ޙައްލުކޮށް، ޝަރީޢަތުގައި ދެކެވޭ ވާހަކަތައް އަވަސްކަމާއެކު ލިޔެވޭނެ ނިޒާމެއް ޤާއިމު ކުރުމަށް ޓަކައި މި އުސޫލުގެ ދަށުން އެކުލަވައިލެވޭ ދަފުތަރުގައި ރަޖިސްޓަރީވާ ފަރާތްތައް ކޯޓުތަކަށް ހާޒިރުވެގެން، އެ މީހުންނާ ހަވާލުކުރެވޭ ރިކޯޑިންގތައް ލިޔުމެވެ.
މި ދަފުތަރުގައި ރަޖިސްޓަރީވުމަށް އެދި ހުށަހަޅާ ފަރާތްތަކުގެ ކިބައިގައި ހުންނަންޖެހޭ ޝަރުޠުތައް:
ދަފުތަރުގައި ރަޖިސްޓަރީވެފައިވާ ފަރާތްތަކާ ކޯޓުން މުޢާމަލާތްކޮށް، ޝަރީޢަތުގެ ރިކޯޑިންގ މަޙްޟަރު ކުރަން ބޭނުންވާކަން އެ ފަރާތަށް އެންގުމާއި، އެ ފަރާތެއް ކޯޓަށް ހާޒިރުވެގެން ބަޔާން ލިޔުމަށް ބޭނުންވާނެ އިންތިޒާމުތައް ހަމަޖައްސާނެއެވެ. އަދި މި ގޮތަށް ހާޒިރުކުރެވޭ ދުވަސްދުވަހުގެ ހާޒިރީ ރިކޯޑު، އެ ކޯޓަކުން ނުވަތަ ކޯޓުގެ ކަމާ ގުޅޭ ސެކްޝަނަކުން ބަލަހައްޓަންވާނެ ކަމަށް ބުނެފައިވެއެވެ.
ދަފުތަރުގައި ހިމެނޭ ފަރާތްތައް މެދުވެރިކޮށް މަޙްޟަރު ކުރެވޭ ރިކޯޑިންގއަކީ 20 މިނިޓަށް ވުރެ ކުރު ނޫން ރިކޯޑިންގއެއް ކަމުގައި ވާންޖެހޭނެކަމަށް މި އުސޫލުގައި ބުނެފައިވެއެވެ. އަދި މަޙްޟަރު ކުރުމަށް ކުރިން ހަވާލުކޮށްފައިވާ ފަރާތަކާ އިތުރު ރިކޯޑިންގއެއް މަޙްޟަރުކުރަން ހަވާލުކުރާނަމަ، އެ މީހަކާ ކުރިން ހަވާލުކޮށްފައިވާ ރިކޯޑިންގއިން ނުނިމި ހުރި ގަޑީގެ އަދަދަށް ރިޢާޔަތްކޮށް، ފަހުން ހަވާލުކުރެވޭ ރިކޯޑިންގ ނިންމުމަށް އެކަށީގެންވާ ވަގުތު ދެވޭނެކަމަަށް ބުނެފައިވެއެވެ.
މި އުސޫލުގެ ދަށުން ދަފުތަރު ކުރެވޭ ފަރާތްތަކަށް އުޖޫރައެއްގެ ގޮތުގައި ދޭނީ، ލިޔެފައިވާ ކޮންމެ ސަފުހާއަކަށް 45 ރުފިޔާގެ ރޭޓުންނެވެ. މި އުސޫލުގައި ދަފުތަރުގައި ރަޖިސްޓަރީކުރެވޭ ފަރާތްތަކުގެ ޒިންމާތަކެއްވެސް ހިމަނާފައިވެއެވެ.
