ޖޭޕީއަށް ސޮއިކޮށްފައިވާ ކަމަށް ދެކެވޭ ވާހަކަތައް ސިނާނު ދޮގުކުރައްވައިފި
1 ޖުލައި 2017 | ހޮނިހިރު 17:01ޕާޓީ ބަދަލުކުރެއްވިކަމަށް ދެކެވޭ ވާހަކަތައް ސިނާނު ދޮގުކުރެއްވި
މައްޗަންގޯޅި ދެކުނު ދާއިރާގެ މެންބަރު އަބްދުﷲ ސިނާނު
މައްޗަންގޯޅި ދެކުނު ދާއިރާގެ މެންބަރު އަބްދުﷲ ސިނާނު ޖުމްހޫރީ ޕާޓީއަށް ސޮއިކުރެއްވިކަމަށް ދެކެވޭ ވާހަކަތައް އޭނާ ދޮގު ކުރައްވައިފިއެވެ.
ސިނާން ވަނީ މިކަން ރާއްޖެއެމްވީ އަށް ކަށަވަރުކޮށްދެއްވާފައެވެ.
ޕާޓީ ބަދަލުކުރެއްވި ކަމަށް ދެކެވޭ ވާހަކަތަކާއި ބެހޭ ގޮތުން ރާއްޖެއެމްވީ އިން ކުރި ސުވާލަށް ޖަވާބު ދެއްވަމުން ސިނާނު ވިދާޅުވީ ޕާޓީ ބަދަލުކުރައްވާފައި ނުވާނޭ ކަމަށެެވެ.
މިފަދަ ވާހަކަތަކެއް ފެންމަތިވެފައިވަނީ އީދު ބަންދަށްފަހު، މަޖިލިހުގެ ރައީސް އަބްދުﷲ މަސީހުގެ މައްޗަށް އިތުބާރު ނެތްކަމުގެ ވޯޓު އަލުން ނެގުމަށް އިދިކޮޅު ސިޔާސީ ފަރާތްތަކުން ބުނަމުންދާ ދަނޑިވަޅެއްގައެވެ.
ސޯޝަލް މީޑީޔާގައި އާންމުވަމުންދާ ޕޯސްޓްތަކުގައި ސިނާނު ޖުމްހޫރީ ޕާޓީއަށް ސޮއިކުރައްވައިފި ކަމަށް ބުނެފައިވެއެވެ.
ސިނާނު ޖުމްހޫރީ ޕާޓީއާއި ގުޅުނު ކަމަށް ދެކެވޭ ވާހަކަތަކަށް ޖުމްހޫރީ ޕާޓީން އެއްވެސް އެއްޗެއް ބުނެފައެއް ނުވެއެވެ. ނަމަވެސް، ޖުމްހޫރީ ޕާޓީއަށް ނިސްބަތްވާ ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު އިބްރާހިމް ހަސަން (އެވިލާ) ކުރެއްވި ޓްވީޓެއްގައި ވަނީ މަސީހުގެ މައްޗަށް ނެގުމަށް ނިންމާފައިވާ އިތުބާރު ނެތްކަމުގެ ވޯޓަށް އިޝާރާތް ކުރައްވާ ޓްވީޓް ކުރައްވާފައެވެ. އެވިލާ ވިދާޅުވީ، މަޖްލިހުގެ މެޖޯރިޓީ މެންބަރުންގެ ސޮޔާއެކު އިތުބާރު ނެތް ކަމަށް ހުށަހަޅައިފިނަމަ، ވޯޓަކަށް ދާން ގާނޫނުން ތަން ނުދޭ ކަމަށާއި ވަގުތުން ވަގުތަށް އިސްތިއުފާ ދެއްވަން ޖެހިވަޑައިގަންނަވާނޭ ކަމަށެވެ.
ސިނާނު ޕާޓީ ބަދަލުކުރެއްވިކަމަށް އަޑު ފެތުރިފައިވާ ދަނޑިވަޅުގައި ސަރުކާރުން ވަނީ ސިނާނުގެ ހިއްސާ އޮންނަ ޗިލެކްސް ރެސްޓޯރަންޓް ނަގާ، ސިނާނުގެ ގާތް ބައެއް ބޭފުޅުން ސަރުކާރުގެ މަގާމުތަކުން ދުރުކޮށްފައެވެ.
