ހުޅުމީދޫ މިފްކޯ ބަނދަރުގެ އެއްގަމުތޮށީގެ މަސައްކަތް ނިންމާލައިފި
މިއީ 68.8 މިލިއަން ރުފިޔާގެ މަޝްރޫއެއް
ހުޅުމީދޫގައި ހަދާ މިފްކޯ ބަނދަރު
އައްޑޫ ސިޓީ ހުޅުމީދޫގައި ހަދަމުން އަންނަ މިފްކޯ ބަނދަރުގެ ފުރަތަމަ ފިޔަވަހީގެ ދަށުން އެއްގަމުތޮށިގެ މަސައްކަތް ނިންމާލައިފިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން މި މަޝްރޫއުގެ މަސައްކަތް ހަވާލު ކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއެވެ. އެ ކުންފުންޏާ މި މަސައްކަތް ހަވާލު ކުރީ 30 އޮކްޓޯބަރު 2019ގައެވެ. މިއީ ޑިޒައިން އެންޑް ބިލްޑުގެ އުސޫލުން އެ ކުންފުންޏާ ހަވާލު ކުރި މަޝްރޫއެކެވެ.
އެމްޓީސީސީން މައުލޫމާތު ދޭ ގޮތުގައި މި މަޝްރޫއުގެ ދަށުން އެއްގަމުތޮށި ލުމުގެ މަސައްކަތް ނިމިފައިވާއިރު އައު ހާބަރ ބޭސިން ފުންކުރުމުގެ މަސައްކަތް މިހާރު ވަނީ 76 އިންސައްތަ ފުރިހަމަކޮށްފައެވެ. އަދި އައު ހާބަރ ޗެނަލް ފުންކުރުމުގެ 86 އިންސައްތަ މަސައްކަތް ފުރިހަމަކޮށްފައިވާއިރު މިހާރު ސައިޓުގައި ކުރިއަށްދަނީ އެންކަރ ޕައިލް ހަރުކުރުމާއި އޭގެ ކޮންކްރީޓް މަސައްކަތް ކަމަށް އެ ކުންފުނިން ބުންޏެވެ.
މި މަޝްރޫއުގެ ދަށުން 471،380 ކިއުބިކް މީޓަރުގެ ސަރަހައްދެއްގެ ބަނދަރު ފުންކޮށް، 1،788 ކިއުބިކް މީޓަރުގެ ސަރަހައްދެއްގެ ބިން ހިއްކާނެއެވެ. މި މަޝްރޫއުގެ ދަށުން ގާއިމްކޮށްފައިވަނީ 97 މީޓަރުގެ އެއްގަމުތޮއްޓެކެވެ.
މި މަޝްރޫއުގެ މަސައްކަތް އެމްޓީސީސީއާ ހަވާލުކޮށްފައިވަނީ 68.8 މިލިއަން ރުފިޔާއަށެވެ.
