އިނގުރައިދޫ ސިއްހީ މަރުކަޒު ތަރައްގީކުރަން ބަޔަކާ ހަވާލުކޮށްފި

ރ. އިނގުރައިދޫ ސިއްހީ މަރުކަޒު ތަރައްގީ ކުރުމަށް ބަޔަކާ ހަވާލުކޮށްފިއެވެ.

ހެލްތު މިނިސްޓްރީގައި އަންގާރަ ދުވަހު ބޭއްވި ރަސްމިއްޔާތެއްގައި މި މަޝްރޫއުގެ މަސައްކަތް ހަވާލު ކޮށްފައިވަނީ ޑުޕްލެކްސް ޕްރައިވެޓް ލިމިޓެޑާއެވެ. މި އެއްބަސްވުމުގައި ހެލްތު މިނިސްޓްރީގެ ފަރާތުން ސޮއިކުރެއްވީ ސީނިއަރ އެގްޒެކެޓިވް ޑައިރެކްޓަރު އަބްދުލް ހަންނާނު ހުސައިނެވެ. އަދި ޑުޕްލެކްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުޙައްމަދު އަސްލަމެވެ.

އިނގުރައިދޫ ސިއްހީ މަރުކަޒުގެ ތަރައްޤީ ކުރުމުގެ މަސައްކަތް ޑުޕްލެކްސް ޕްރައިވެޓް ލިމިޓެޑާ ހަވާލުކޮށްފައިވަނީ 540 ދުވަހުން ނިންމާގޮތަށް 76,869,858.52 (ހަތްދިހަ ހަ މިލިއަން އަށްލައްކަ ފަސްދޮޅަސް ނުވަ ހާސް އަށްސަތޭކަ ފަންސާސް އަށް ރުފިޔާ ފަންސާސް ދެ ލާރި) އަށެވެ.

ސަރުކާރުން އަންނަނީ ރާއްޖޭގެ ސިއްހީ ނިޒާމު އިތުރަށް ތަރައްގީ ކުރުމުގެ ގޮތުން ރަށްތަކުގެ ސިއްހީ މަރުކަޒުތަކާއި ސަރަހައްދީ ހޮސްޕިޓަލުތައް ތަރައްގީ ކުރުމަށް މަސައްކަތް ކުރަމުންނެވެ. އެގޮތުން، ރާއްޖޭގެ ފަސް ސަރަހައްދެއްގެ ހޮސްޕިޓަލްތައް ޓަރޝަރީ ފެންވަރަށް ތަރައްގީ ކުރުމުގެ މަސައްކަތް ވެސް ދަނީ ކުރަމުންނެވެ.