ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގަށް ކުރިމަތިލާއިރު، ދެ ލަނޑުގެ ލީޑެއް އޮތުމަކީ ހަމަޖެހުމެއް ނޫން ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ ކުއާޓާގެ ދެ ވަނަ ލެގުގައި ޗެލްސީގެ ސްޓެމްފޯޑް ބްރިޖުގައި ޓީމާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގަ އެވެ. މި ދެ ޓީމު ރެއާލްގެ ދަނޑުގައި ކުޅުނު މެޗު ރެއާލުން ކާމިޔާބު ކުރީ 2-0 އިންނެވެ. އެހެންކަމުން ޗެލްސީ އަށް ސެމީ ފައިނަލުން ޖާގަ ލިބެން އޮތީ ދެ ލަނޑަށް ވުރެ ފަރަގު ބޮޑުކޮށް ރެއާލް ބަލިކޮށްގެންނެވެ.
އެ މެޗުގެ ކުރިން ވާހަކަ ދައްކަމުން އަަންޗެލޮޓީ ބުނީ، ފުރިހަމަ މެޗެއް ކުޅެން ޖެހޭނެ ކަމަށާއި ސަބަބަކީ ނުވަ ދިހަ މިނެޓު ބާކީ އޮތުން ކަމަށެވެ. ޗެމްޕިއަންސް ލީގަކީ ވަރަށް ވާދަވެރި މުބާރާތެއްކަން ފާހަގަކޮށް އަންޗެލޮޓީ ބުނީ، އެ މުބާރާތުގައި ކޮންމެ ފަދަ ގޮތަކަށް ވެސް ނަތީޖާ ނިކުމެދާނެ ކަމަށެވެ. އެހެންކަމުން ރެއާލުން އެމީހުންގެ އެންމެ ފުރިހަމަ ފެންވަރުގައި މެޗަށް ތައްޔާރުވާނެ ކަމަށެވެ. މިދިޔަ ސީޒަނުގައި ވެސް ރެއާލާއެކު ޗެމްޕިއަންސް ލީގު ކާމިޔާބުކޮށްފައިވާ ކޯޗު ބުނީ، އޭނާ އަށް ފެންނަ ގޮތުގައި ޗެލްސީއާ ދެކޮޅަށް ކުޅޭ ދެ ވަނަ ލެގުގެ މެޗު ފަސޭހަ ނުވާނެ ކަމަށެވެ. މީގެއިތުރުން ފުޓުބޯޅަ އަކީ ވަރަށް އަވަހަށް ހާލަތު ބަދަލުވާނެ ކުޅިވަރެއް ކަމަށާއި، ކުޅުންތެރިންނަށް ވެސް އެކަން އެނގޭނެ ކަމަށެވެ. އޭނާ ބުނީ އިތުރަށް ކުޅުންތެރިންނަށް އެކަން ބުނެދޭން ނުޖެހޭނެ ކަމަށާއި، ސަބަބަކީ މި މުބާރާތަަކީ ރެއާލްގެ ކުޅުންތެރިންނަށް ވަރަށް ފަރިތަ މުބާރާތަކަށްވުން ކަމަށެވެ.
ފުޓުބޯޅައިގައި ކޮންމެ ގޮތެއް ވެސް ވެދާނެ އަދި ކުޅުންތެރިންނަށް އެކަން ވަރަށް ރަނގަޅަށް އެނގޭނެ. އަހަރެން ނުޖެހޭނެ މި ޓީމުގެ ކުޅުންތެރިންނަށް އެކަން ބުނެދޭކަށް، ސަބަބަކީ އެމީހުންނަށް މި މުބާރާތް ވަރަށް ރަނގަޅަށް އެނގޭނެ.ކާލޯ އަންޗެލޮޓީ / ރެއާލް މެޑްރިޑުގެ ކޯޗު
މި ދެ ޓީމު ވަނީ މިދިޔަ ސީޒަންގެ ކުއާޓާ ފައިނަލްގައި ވެސް ވާދަކޮށްފަ އެވެ. އަންޗެލޮޓީ ބުނީ، މިދިޔަ ސީޒަނުގައި ވެސް ރެއާލަށް އެންމެ އުނދަގޫވީ ޗެލްސީއާ ދެކޮޅަށް ކުޅުނު މެޗު ކަމަށެވެ. އެފަހަރު ވެސް ރެއާލުން ލީޑުގައި އޮވެ، ދެ ވަނަ ލެގަށް ކުރިމަތިލީ ނަމަވެސް އެ މެޗުގައި އެތައް ކަމެއް ތަހައްމަލު ކުރަން ޖެހުނު ކަމަށެވެ. އެހެންކަމުން މިއަހަރު އެގޮތަށް ކަންތައްވާން ބޭނުންނުވާ ކަމަށާއި، ބޭނުންވަނީ ހަމަޖެހިގެން ސެމީ ފައިނަލަށް ދަތުރު ކުރުން ކަމަށް އޭނާ ބުންޏެވެ.
މީގެ އިތުރުން އަންޗެލޮޓީ ބުނީ، ރެއާލްއަކީ ޗެމްޕިއަންސް ލީގުގެ ތާރީޚާ ގުޅިފައިވާ ޓީމެއް ކަމަށާއި، އެ ޓީމުން 14 ފަހަރު މުބާރާތް ކާމިޔާބުކޮށްފައިވާނެ ކަމަށެވެ. އަދި ރެއާލް އަކީ ޗެމްޕިއަންސް ލީގުގެ "ކިންގު" ކަމަށާއި، އެހެންކަމުން އަދި ވެސް ބޭނުން ވަނީ ކުރިއަށް އޮތް ތަނުގައި އެ މުބާރާތް ވީހާވެސް ގިނައިން ކާމިޔާބު ކުރަން ކަމަށެވެ.
ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައު ރެއާލުން ޗެލްސީއާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން ދަންވަރު 12 ޖަހާއިރު އެވެ.
