ޖަލުގައި ގައިދީން ބޭނުންކުރާ ފޯނު ނަމްބަރުގެ ފުރިހަމަ މައުލޫމާތު ސަރވިސް ޕްރޮވައިޑަރުން ނުދޭ، އެދެނީ ޤާނޫނީ ހައްލަކަށް: ހޯމް މިނިސްޓަރު
ޒިންމާދާރުކުރުވުމަށްޓަކައި ކޮމިއުނިކޭޝަން އޮތޯރިޓީގެ ފަރާތުން ހަރުކަށި އުސޫލުތަކެއް ކަނޑައަޅަން ޖެހޭ
ގައިދީން، ކަރެކްޝަންސް
މާފުށި ޖަލު ހިމެނޭ ސަރަހައްދުގައި ބޭނުންކުރާ ފޯނުތަކުގެ މައުލޫމާތު އެއްކުރެވުނު ނަމަވެސް ނެޓްވޯކް އޮޕަރޭޓަރުން ފުރިހަމަ މައުލޫމާތު ފުލުހުންނަށް ނުދޭ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އެފަދައިން ވިދާޅުވީ އަންގާރަ ދުވަހުގެ ޖަލްސާގައި މާފަންނު މެދު ދާއިރާގެ މެންބަރު އިބްރާހީމް ރަޝީދު، މިނިސްޓަރ އޮފް ހޯމް އެފެއަޒް އައްޝައިޚް ޢިމްރާން ޢަބްދުاللهއާ ކުރައްވާފައިވާ ސުވާލަށް ލިޔުމުން ދެއްވި ޖަވާބުގައެވެ. އެ ޖަވާބު އިއްވަވާދެއްވީ މަޖިލީހުގެ އަމީންއާމެވެ. މެންބަރު އިބްރާހިމް ރަޝީދުގެ އެ ސުވާލުގައި މިދިޔަ އަހަރު ޖަލު ސަރަޙައްދުގައި ވަކިން ޚާއްޞަ އެންޓަނާއެއް ހަރުކުރިތޯ ސުވާލުކުރައްވާފައިވެއެވެ. އަދި އެފަދަ އެންޓަނާގެ ވަސީލަތުން ޖަލުގެ ގޮޅިތަކަށް ސިއްރުން ފޯނު ވައްދައިގެން އެކިއެކި ބޭންކްތަކާއި އެކިއެކި ޕްރޮމޯޝަންތަކުގެ ނަމުގައި ޢާންމު ރައްޔިތުންނަށް އޮޅުވާލައިގެން "ފައިސާ ފޭރޭ ކޯލް ސެންޓަރު" ހިންގަން ބޭނުންކުރާ ކަމަށާއި ބޭނުންކުރާ ފޯނު ނަންބަރުތަކުގެ މަޢުލޫމާތު ނެގޭގޮތަށް ހުރި ނަމަވެސް އެ މަޢުލޫމާތު ތަޙުޤީޤީ އިދާރާތަކާ ހިއްސާނުކުރާކަމުގެ މަޢުލޫމާތު ލިބޭ ކަމަށް އެ ސުވާލުގައި ވަނީ ވިދާޅުވެފައެވެ. އެ މަޢުލޫމާތު ކަމާބެހޭ އިދާރާތަކުން ހިއްސާ ކުރަން އެދިފައިވާނަމަ އެ މަޢުލޫމާތު ހިއްސާ ނުކުރަނީ ކީއްވެތޯ ސުވާލުކުރައްވާފައިވެއެވެ. އަދި ޖަލުތެރޭގައި ހިންގި ކަމަށް ބުނާ މިފަދަ ކޯލް ސެންޓަރު ހިންގުން ހުއްޓުވަން މިހާތަނަށް ކުރެވުނު މަސައްކަތަކީ ކޮބައިތޯ ވެސް ސުވާލުކުރައްވާފައިވެއެވެ.
މިނިސްޓަރު ވިދާޅުވީ އޮޕަރޭޓަރުން ފޯރުކޮށްދޭ މައުލޫމާތުތައް ތަފާތު ފޯމެޓްތަކުގައި ހުރުމަކީ ގޮންޖެހުމަކަށް ވާ ކަމަށެވެ. ކަރެކްޝަންސް ސަރވިސް އާއި ފުލުހުން އަދި ޓެލިކޮމިއުނިކޭޝަން އޮތޯރިޓީ ގުޅިގެން ކުރި މަސައްކަތުގެ ނަތީޖާއެއްގެ ގޮތުން މާފުށީ ޖަލު ސަރަހައްދުގައި މި އަހަރު އެންޓެނާއެއް ހަރުކޮށްފައިވާ ކަމަށާއި އެ އެންޓެނާގެ ޒަރީއާއިން އެ ސަރަަހައްދުގައި ބޭނުންކުރާ ފޯނުތަކުގެ މައުލޫމާތު އެއްކުރެވޭ ކަމަށް މިނިސްޓަރު ވިދާޅުވިއެވެ. އެހެންނަމަވެސް އެ މައުލޫމާތުތައް ޖަމާކުރެވެނީ ނެޓްވޯކް އޮޕަރޭޓަރުންގެ ސަރވަރތަކަށް ކަމުން އެ މައުލޫމާތު ހޯދަން ޖެހެނީ އެ ފަރާތްތައް މެދުވެރިކޮށް ކަަމަށް މިނިސްޓަރު ވިދާޅުވިއެވެ. އެ މައުލޫމާތުތައް އެކި ފޯމެޓްތަކުގައި ހުރުމުން ދިމާވާ ގޮންޖެހުންތައް ހައްލުކުރަން، އެ މައުލޫމާތު ފުލުހުންނަށް ދިނުން ލާޒިމް ކުރާ ޤާނޫނީ މިންގަނޑެއް އޮތުން މުހިއްމުކަމަށް ވެސް މިނިސްޓަރު ވިދާޅުވިއެވެ.
މީގެ އިތުރުން ޚިދުމަތް މެދުކަނޑާލަން އެދޭ ސިމް ކާޑުތަކުން ޚިދުމަތް މެދުކަނޑާލުމުގައި ލަސްވުމާއި، އެއްބައެއްގެ ނަމުގައި ގިނަ ޢަދަދަކަށް ސިމް ދޫކޮށްފައި ވުމާއި، އައިޑީކާޑެއްގެ ކޮޕީ ހުށަހެޅުމުން އެ ކޮޕީ އަށް ގިނަ އަދަދަކަށް މޮބައިލް ނަމްބަރު ދޫކޮށްފައި ވުމާއި، ބިދޭސީއެއްގެ ޕާސްޕޯޓް ނަމްބަރު ބޭނުންކޮށްގެން އެކި ނަމްބަރުތައް ރެޖިސްޓްރީކޮށްދީފައިވުން ފަދަ މައްސަލަަތައް ދިމާވާކަމަށް ވިދާޅުވެފައިވެއެވެ. އަދި އެއްވެސް ވަރަކަށް ރެޖިސްޓްރީ ނުކޮށް ހުންނަ ނަމްބަރުތަކުގެ މައްސަލަތައް ވެސް ފާހަގަކުރެވޭކަމަށް މިނިސްޓަރު ވިދާޅުވެފައިވެއެވެ.
ކޮމިއުނިކޭޝަން ޕްރޮވައިޑަރުން މި ކަމުގައި ޒިންމާދާރުކުރުވުމަށްޓަކައި ކޮމިއުނިކޭޝަން އޮތޯރިޓީގެ ފަރާތުން ހަރުކަށި އުސޫލުތަކެއް ކަނޑައަޅަން ޖެހޭ ކަމަށް ވެސް މިނިސްޓަރު ވިދާޅުވިއެވެ.
ޖަލުގައި ތިބޭ ބައެއް ގައިދީން އެތަނަށް ސިއްރުން ފޯނު ވައްދާ އެ ފޯނުތައް ބޭނުންކޮށްގެން އޮޅުވާލައިގެން ފައިސާ ހޯދުމާއި ސްކޭމްގެ އެހެން މުއާމަލާތްތައް ހިންގާ މައްސަލަ ވަނީ ފެންމަތިވެފައެވެ. އަދި އެކަން ހައްލުކުރުމަށް ކަމާއި ގުޅުން ހުރި ފަރާތްތަކުން މަސައްކަތްކުރަމުންދާކަމަށް ވަނީ ބުނެފައެވެ.
