މިދިޔަ ހަފްތާގައި މިފްކޯއިން މަސްވެރިންނަށް 28 މިލިއަނަށްވުރެ ގިނަ ރުފިޔާ ދީފި
17 އެޕްރީލު 2023 | ހޯމަ 03:56އެންމެ ގިނައިން ފައިސާ ދޫކޮށްފައިވަނީ ކޫއްޑޫއަށް މަސް ކިރުވި މަސްވެރިންނަށް
ފެލިވަރު މަސް ފެކްޓަރީ
މި ނިމުނު ހަފުތާގައި މަސްވެރިންނަށް 28 މިލިއަނަށްވުރެ ގިނަ ރުފިޔާ ދީފައިވާ ކަމަށް މިފްކޯއިން ބުނެފިއެވެ.
މިފްކޯއިން އާދީއްތަ ދުވަހު އާއްމުކޮށްފައިވާ ތަފާސްހިސާބުތަކުން ދައްކާ ގޮތުގައި އެ ކުންފުނިން މި މަހުގެ 8 ން 14 އަށް ޖުމްލަ 28،955،744 (އަށާވީސް މިލިއަން ނުވަ ލައްކަ ފަންސާސް ފަސް ހާސް ހަތްސަތޭކަ ސާޅީސް ހަތަރު ރުފިޔާ) ވަނީ މަސްވެރިންނަށް ދޫކޮށްފައެވެ. މީގެ ތެރެއިން އެންމެ ގިނަ ފައިސާ ދޫކޮށްފައިވަނީ ކޫއްޑޫ ފިޝަރީޒް ކޮމްޕްލެކްސްއަށް މަސްކިރުވި މަސްވެރިންނަށެވެ. އެގޮތުން، އެ މަސްވެރިންނަށް 18،357،266 (އަށާރަ މިލިއަން ތިން ލައްކަ ފަންސާސް ހަތްހާސް ދުއިސައްތަ ފަސްދޮޅަސް ހަ) ރުފިޔާ ވަނީ ދޫކޮށްފައެވެ.
މީގެ އިތުރުން ފެލިވަރަށް މަސް ކިރުވި މަސްވެރިންނަށް 5،616،904 ރުފިޔާ ދޫކޮށްފައިވާއިރު އައްޑޫ ފިޝަރީޒް ކޮމްޕްލެކްސް އަށް މަސް ކިރުވި މަސްވެރިންނަށް ދޫކޮށްފައިވަނީ 4،981،574 ރުފިޔާއެވެ.
މިފްކޯއިން ހާމަކޮށްފައިވާ ގޮތުގައި މިދިޔަ ހަފުތާގައި 28.9 މިލިއަން ރުފިޔާ މަސްވެރިންނަށް ދޫކުރި ނަމަވެސް މިއީ މިދިޔަ އަހަރުގެ މި މުއްދަތުގައި ދޫކުރި ފައިސާއާ އަޅާބަލާއިރު 34 އިންސައްތަ ދަށްވުމެކެވެ. މިދިޔަ އަހަރުގެ މި މުއްދަތުގައި 38،851،095 (ތިރީސް އަށް މިލިއަން އަށް ލައްކަ ފަންސާސް އެއް ހާސް ނުވަދިހަ ފަސް) ރުފިޔާ ވަނީ މަސްވެރިންނަށް ދޫކޮށްފައެވެ.
ރާއްޖޭގައި މަސްވެރިކަން ރަނގަޅުވާ ދުވަސްވަރު މަސް ކިރުވުމުގައި އަދިވެސް ދަތިތަކާ ދިމާވާތީ އެކަން ހައްލު ކުރުމަށް މިފްކޯއިން އަންނަނީ މަސައްކަތް ކުރަމުންނެވެ. އެގޮތުން، އެ ކުންފުނީގެ ކެޕޭސިޓީ އިތުރު ކުރުމަށް މިހާރު ވެސް ބޯޓުތައް ގެނައުމުގެ މަސައްކަތް ކުރަމުން އަންނަ ކަމަށް އެ ކުންފުނިން ވަނީ ބުނެފައެވެ.
