ޗެލްސީގެ ކޯޗު ފްރޭންކް ލަމްޕާޑު އެ ޓީމުގެ ސަޕޯޓަރުންނަށް "ތެދުވެރި" މެސެޖެއް ފޮނުވައިފި އެވެ.
ލަމްޕާޑު މިފަދައިން ވާހަކަ ދެއްކީ ދެ ވަނަ ފަހަރަށް ޗެލްސީގެ ކޯޗުކަމާ އޭނާ ހަވާލުވެ، ކުޅުނު ތިން ވަނަ މެޗުން ވެސް ބަލިވުމާއެ އެވެ. އަމިއްލަ ދަނޑުގައި ބްރައިޓަން އަތުން ބަލިވި މެޗަށްފަހު، ޗެލްސީ އަށް ދެން އޮތީ ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި އަމިއްލަ ދަނޑުގައި ރެއާލް މެޑްރިޑާ ދެކޮޅަށް ކުޅޭ މެޗެވެ. ބްރައިޓަން އަތުން ވެސް ބަލިވެ، ޗެލްސީ އަށް ހަމަޖެހުމެއް ނުޙޯދުނުއިރު، ޓީމުގެ ސަޕޯޓަރުންގެ ނުރުހުން ވެސް ވަނީ ލަމްޕާޑަށް އަމާޒުވެފަ އެވެ.
އެމެޗަށް ފަހު ވާހަކަ ދައްކަމުން ލަމްޕާޑު ބުނީ، އޭނާ ބުނާ އެއްޗަކުން ސަޕޯޓަރުން އައިސް ހަމަޖެހިގެން ތިބޭނެ ކަމަކަށް ނުދެކޭ ކަމަށެވެ. ޚާއްސަކޮށް ޗެމްޕިއަންސް ލީގުގެ ރެއެއްގައި ރެއާލް މެޑްރިޑް އޮތް އިރު، އެކަން ވާނެ ކަމަށް ނުވެސް ދެކޭ ކަމަށެވެ. ނަމަވެސް، އެއީ ޗެލްސީ އަށް ކަންކަން އަނބުރާލުމަށް ލިބޭ ރަނގަޅު ފުރުސަތެއް ކަމަށެވެ. އޭނާ ބުނީ ސަޕޯޓަރުން ގާތު ޗެލްސީ އަށް ސަޕޯޓުކޮށްދޭން އަންނާށޭ ބުނަން ބޭނުންނުވާ ކަމަށެވެ. ނަމަވެސް ސަޕޯޓަރުން އެކަން ކުރާނެ ކަން އިނގޭ ކަމަށާއި، ޓީމު އޮތް ޙާލަތުން އެންމެންގެ ނުރުހުމާއި، ހިތްހަމަ ނުޖެހުން އޮންނާނެ ކަން އިނގޭ ކަމަށް ވެސް ލަމްޕާޑު ބުންޏެވެ.
ލަމްޕާޑު ބުނީ ރެއާލް މެޗުގައި ޗެލްސީން ޖެހޭނީ ކަށިން ހިތްވަރު ނެރެގެން ކުޅެން ކަމަށާއި، އެންމެ ކުޑަ މިންވަރަަކަށް ވެސް އޮތީ އެ ގޮތް ކަމަށެވެ. އަދި ރެއާލް އަކީ މަތީ ފަންތީގެ ޓީމެއް ކަމަށާއި، ޗެލްސީގެ ކަންކަން ބަދަލު ކުރުމުގެ ފުރުސަތު އޮތީ ކުޅުންތެރިންނާއި، ކޯޗިން ޓީމު އަތުގައި ކަމަށެވެ. އޭނާ ބުނީ އެކަމުގައި ސަޕޯޓަރުންގެ ދައުރު ބޮޑު ނުވާނެ ކަމަށާއި، ރަނގަޅު ސްކޮޑާއެކު ނިކުމެ ރެއާލް މެޗު ކާމިޔާބު ކުރަން ޖެހޭ ކަމަށެވެ. މީގެ އިތުރުން ޗެލްސީ އެ ހާލަތަށް އައި ކިހިނަކުންތޯ އެއީ އޭނާ ދައްކަން ޖެހޭ ވާހަކައެއް ނޫން ކަމަށެވެ. ނަމަވެސް ލަމްޕާޑުގެ އަތް މަތީގައި އޮތް ކަމަކީ، އަޑިގަނޑުން ޓީމު ސަލާމަތްކޮށް، ހާލަތު ބަދަލު ކުރުން ކަމަށް ވެސް އޭނާ ބުންޏެވެ.
އިތުރަށް ލަމްޕާޑު ބުނީ ޗެލްސީ އަށް ފަރިތަކުރުމަށް އެކަށީގެންވާ ވަގުތު ނުލިބޭ ކަމަށެވެ. އޭނާ އަށް ޤަބޫލު ކުރެވޭ ގޮތުގައި ފަރިތަކުރުމަށް އެކަށީގެންވާ ވަގުތު ބޭނުންވާކަން ފާހަގަކޮށް ލަމްޕާޑު ބުނީ، އެކަމަށް އެކަށީގެންވާ ވަގުތު ނުލިބޭ ކަމަށެވެ. އޭނާ ބުނީ ކޮންމެ ގޮތަކަށް ކަންތައް ދިމާވި ނަމަވެސް، އެންމެން ވެސް ވާހަކަ ދައްކާނީ ދަނޑު މަތިން އަންނަ ނަތީޖާ އަކަށް ކަމަށެވެ. އަދި ފަހަރުގައި ރެއާލް މެޗަށްފަހު، ބްރެންޓްފޯޑު މެޗާ ކުރިމަތިލުމުގެ ކުރިން ހަމަޖެހުމުގެ ނޭވާ އެއް ލެވޭނެ ކަމަށް އުންމީދު ކުރާ ކަމަށެވެ.
ޗެލްސީގެ ނަތީޖާތައް ދަށްވުމުގެ ސަބަބުން އަނެއްކާ ވެސް ސަޕޯޓަރުންގެ ނުރުހުން ވަނީ ކުލަބުގެ ވެރިންނާއި، ކޯޗަށް އަމާޒުވާން ފަށައިފި އެވެ.
