ޖަރުމަނު ލީގުގައި ހޮފެންހައިމާ ދެކޮޅަށް ކުޅުނު މެޗުން ޗެމްޕިއަން ބަޔާން މިއުނިކް އެއްވަރުވެއްޖެ އެވެ.

ބަޔާންގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުން ބަޔާން އެއްވަރުވީ ލަނޑު ޖަހައި ލީޑު ވެސް ހޯދާފައި ވަނިކޮށެވެ. މެޗު ފަށައިގެން 17 ވަނަ މިނެޓުގައި ބަޔާނަށް ލީޑު ނަގައިދިނީ ފްރާންސްގެ ބެންޖަމިން ޕަވާޑު އެވެ. އެއީ ކިންގްސްލީ ކޯމަން ތަނަވަސްކޮށްދިން ފުރުސަތެއްގައި ޕަވާޑު ޖެހި ލަނޑެކެވެ. އޭގެ ފަހުން ވެސް ބަޔާނުން ވަނީ ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފަ އެވެ. ނަމަވެސް ދެ ވަނަ ހާފުގައި ހޮފެންހައިން އިން ވަނީ ލަނޑު ޖަހައި ނަތީޖާ ހަމަހަމަކޮށްފަ އެވެ. މެޗުގެ 71 ވަނަ މިނެޓުގައި އެ ޓީމަށް ނަތީޖާ ހަމަހަަމަކޮށްދިނީ އަންދްރޭ ކްރަމަރިޗް އެވެ. އޭގެ ފަހުން ބަޔާންގެ ޕަވާޑު ވަނީ އިތުރު ލަނޑެއް ވެސް ޖަހައިފަ އެވެ. 73 ވަނަ މިނެޓުގައި އޭނާ ޖެހި ލަނޑު ބަލައި ނުގަންނަން ނިންމީ ވީއޭއާރުންނެވެ.

މެޗު އެއްވަރުވި ނަމަވެސް ބަޔާން އޮތީ އެއް ވަނައިގައި ދެ ޕޮއިންޓުގެ ލީޑަކުންނެވެ. އެއީ ދެ ވަނައިގައި އޮތް ބޮރޫޝިއާ ޑޯޓްމަންޑަށް ސްޓަޓްގާޓް އަތުން މޮޅު ނުވެވުމުންނެވެ. ޑޯޓްމަންޑުން ދެ ލަނޑުގެ ލީޑެއްގައި އޮއްވާ ސްޓަޓްގާޓުން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަކޮށްފަ އެވެ. އޭގެ ފަހުން ވެސް ޑޯޓްމަންޑުން ލީޑު ނެގި ނަމަވެސް، ސްޓަޓްގާޓުން ދެ ވަނަ ފަހަރަށް ނަތީޖާ ހަމަހަމަ ކުރި އެވެ.

ކުޅުނު 28 މެޗުން 59 ޕޮއިންޓާއެކު ބަޔާން އޮތީ އެއް ވަނައިގަ އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި ޑޯޓްމަންޑު އޮތީ 57 ޕޮއިންޓާއެކު އެވެ.