ހަންކެޑެ މަޝްރޫއުއާއެކު މުޅި އައްޑޫސިޓީގެ ފަތުރުވެރިކަން ބަދަލުވެގެންދާނެ ކަމަށް، ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސާލިހު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ސްޓޭޓް މިނިސްޓަރު ވިދާޅުވީ، ރާއްޖޭގެ ފަތުރުވެރިކަން ކުރިއެރުވުމަށް އެކި ލެވެލްގައި ސަރުކާރުން މަސައްކަތްކުރަމުން ދާކަމަށާއި، އައްޑޫގައި ގާއިމްކުރެވޭ ހަންކެޑެ މަޝްރޫއަކީ ތަފާތު މަޝްރޫއެއް ކަމަށެވެ. މިމަޝްރޫއާއެކު އައްޑޫގެ އިތުރުން މުޅި ރާއްޖޭގެ ފަތުރުވެރިކަން ބަދަލުވެގެން ދާނެކަމަށާއި، އައްޑޫ ވެގެންދާނީ މުޅިން އައު ރީޖަނަކަށް ކަމަށް ސްޓޭޓް މިނިސްޓަރު ވިދާޅުވިއެވެ.

އައްޑޫއަށް ދަތުރުކުރާ ފަތުރުވެރިން ނިސްބަތުން މަދުކަން ފާހަގަކުރައްވައި ސްޓޭޓް މިނިސްޓަރު ވިދާޅުވީ، އެއީ ދަތުރުފަތުރުގެ ނިޒާމުގެ ދަތިކަމުން ކުރިމަތިވާ މައްސަލައެއް ކަމަށެވެ. ނަމަވެސް މިހާރު އެއަރޕޯޓުގެ އައު ޓާމިނަލްގެ މަސައްކަތް ކުރިއަށްދާ ކަމަށާއި، މިމަސައްކަތް ނިމުމާއެކު ދަތުރުފަތުރުގެ ނިޒާމަށްވެސް ހެޔޮ ބަދަލެއް އަންނާނެ ކަމަށެވެ.

މީގެ އިތުރުން ސްޓޭޓް މިނިސްޓަރު ވިދާޅުވީ ހަންކެޑެ މަޝްރޫއަކީ ފަތުރުވެރިކަމުގެ ސިނާއަތުގައި ތަފާތު ކޮންސެޕްޓެއް ކަމަށެވެ.

142.9 މިލިއަން ޑޮލަރުގެ މި އިންޓަރގްރޭޓަޑް ޓުއަރިޒަމް ޑިވެލޮޕްމަންޓް ޕްރޮޖެކްޓްގެ ދަށުން އައްޑޫ ސިޓީގެ ހަންކެޑެގައި ޖުމްލަ 2082 އެނދު ހިމެނޭގޮތަށް، 1041 ކޮޓަރި ތަރައްގީ ކުރެވިގެންދާނެއެވެ. މީގެތެރޭގައި 2 ގްރޭންޑް ހޮޓެލް، 2 ޑިލަކްސް ހޮޓެލް، 10 ބުޓީކް ހޮޓެލް، 17 ބީޗް ވިލާ، އަދި 64 ސަރވިސްޑް އެޕާޓްމެންޓްގެ އިތުރުން، ރެސްޓޯރެންޓްތަކާއި، ޝޮޕިންގ އޭރިއާތަކާއި، ވޯޓަރ ޕާކަކާއި، ކުޅިވަރުކުޅުމާއި މުނިފޫހިފިލުވުމުގެ ވަސީލަތްތައް ތަރައްގީކުރެވިގެންދާނެއެވެ.

އައްޑޫ ސިޓީއަކީ އިގްތިސާދީ ވަރުގަދަ ހަބެއްގެގޮތުގައި ތަރައްގީކުރުމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ގެންގުޅުއްވާ އަމާޒު ހާސިލުކުރުމަށް މިކަމުން ވަރަށް ބޮޑަށް މަގުފަހިވެގެންދާނެއެވެ. މިއީ ރާއްޖޭގައި އިންޓަގްރޭޓަޑް ޓޫރިޒަމް ކޮންސެޕްޓުގެ ދަށުން ތަރައްގީ ކުރެވިގެންދާ މިފަދަ ފުރަތަމަ މަޝްރޫއެވެ.