ބަހަމުންދާ ކާށި ޕެކޭޖްގައި ހިމެނޭ ކާށީގެ އަދަދު އިތުރުކުރަން މާލެ ސިޓީ ކައުންސިލުން ނިންމައިފި

ބަހަމުންދާ ކާށި ޕެކޭޖްގައި ހިމެނޭ ކާށީގެ އަދަދު އިތުރުކުރަން މާލެ ސިޓީ ކައުންސިލުން ނިންމައިފިއެވެ.

މިނިންމުން ނިންމާފައިވަނީ މާލެ ސިޓީ ކައުންސިލުގެ 4 ވަނަ ދައުރުގެ 97 ވަނަ ޖަލްސާގައެވެ. މި ޖަލްސާގައި ވަނީ ކުރިން ކޮންމެ މީހަކަށް ދޭ ޕެކޭޖްގައި ހިމެނޭ 5 ކާށި 10 ކާއްޓަށް ބަދަލުކޮށްފައެވެ.

މި ޖަލްސާގައި ނިންމާފައިވަނީ ކުރިން ކާށި ބެހުމަށް ނިންމާފައިވާ ގޮތައް ބަދަލު ގެނައުމަށްފަހު ކާށި ބެހުމަށެވެ. ކުރިން މާލެ ސިޓީ ކައުންސިލުން ނިންމާފައިވަނީ ފުރަތަމަ 5 ދުވަހު ހަމައެކަނި އިސްލާމިކް މިނިސްޓްރީގެ ދަފްތަރުގައި ފަޤީރުންގެ ގޮތުގައި ރަޖިސްޓްރީވެފައިވާ ފަރާތްތަކަށް ކާށި ބެހުމަށެވެ. އެހެންނަމަވެސް ޖަލްސާގައި ވަނީ 5000 ކާށި ފަގީރުންގެ ލިސްޓުގައި ތިބި ފަރާތްތަކަށް ހާއްސަކުރުމަށްފަހު މާލޭގައި ދިރިއުޅޭ އާންމު ރައްޔިތުންނަށް ވެސް މި 5 ދުވަހުވެސް ކާށި ބެހުމަށެވެ.

ކާށި ބަލާދާއިރު ދިވެހި ރައްޔިތެއްކަން އަންގައިދޭ ކާޑު ގެންދަންޖެހެއެވެ.

ކާށި ބެހުން ކުރިއަށްދާނީ މާލެ ސިޓީ ކައުންސިލުގެ ޢާންމު ޚިދުމަތްތަކާއި ބެހޭބައިން (ތައިސޭކޮށި / ބޮޑުތަކުރުފާނުމަގު) ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 09:30 ން 13:30 އަށް އަދި ރޭގަނޑު 21:30 ން 23:30 އަށެވެ.

މާލެ ސިޓީ ކައުންސިލުން ބަހަމުން އަންނަނީ ޗަމްޕާ ބްރަދާސް އިން ހަދިޔާކޮށްފައިވާ ކާއްޓެވެ. އެގޮތުން 30،000 ކާށި އެ ކައުންސިލާ ހަވާލު ކޮށްފައިވާ ކަމަށް މާލެ ސިޓީ ކައުންސިލުން ބުނެފައިވެއެވެ.