ގަތަރާ ދެކޮޅު ގައުމު ތަކުން ނެރުނު ލިސްޓުގައި ހިމެނޭ ކުވައިތު މީހުންނާ ސުވާލު ކޮށްފި

ޓެރަރިޒަމަށް ވާގިވެރިވާކަމަށް ބުނެ ޤަތަރާއި ގުޅުން ކަނޑާލައި ފިޔަވަޅު އަޅާފައިވާ މެދު އިރުމަތީގެ ގައުމުތަކުން ނެރުނު ޓެރަރިސްޓުންގެ ލިސްޓުގައި ހިމެނުނު ކުވައިތުގެ ރައްޔިތުންނާ ސުވާލުކޮށްފިއެވެ. ސައުދީ އަރަބިއްޔާއާއި މިސްރު އޫއޭއީ އަދި ބަހްރެއިނުން ގުޅިގެންވަނީ ޓެރަރިޒަމަށް ފަންޑުކުރާކަމަށްބުނީ 59 މީހަކާއި 12 ޖަމާއަތެއްގެ މައުލޫމާތު އާއްމުކޮށްފައެވެ. މި ލިސްޓްގައި ކުވައިތުގެ ތިން ރައްޔިތަކު ހިމެނެއެވެ. ކުވައިތުގެ މީޑިއާއިން ބުނީ މި ލިސްޓުގައި ހިމެނޭ ހައްޖާޖް އަލް އަޖަމީއާއި، ހަކީމް އަލް މުތައިމީއާއި ހަމީދު އަލް އަލީ ކުވައިތުގެ އަސްކަރިއްޔާއަށް ހާޒިރުކޮށް އެމީހުންނާއި ސުވާލުކޮށްފައިވާ ކަމުގައެވެ. އެމީހުންނާއި ސުވާލު ކުރުމުގެ އިތުރުން އެމީހުންގެ ޕާސްޕޯޓްވެސް ހިފަހައްޓާފައިވާކަމަށް މީޑިއާއިން ބުނެއެވެ. މީގެ އިތުރުން ކުވައިތުގެ ނޫސް ތަކުގައި ބުނެފައިވަނީ މި ތިން މީހުންގެ ހަރަކާތްތައް ވަކި މުއްދަތެއް ވަންދެން ކުވައިތު ސިފައިން ވަރަށް ހާއްސަގޮތެއްގައި ބަލަމުންވެސް ގެންދާނެ ކަމުގައެވެ.