ލޯކަލް މާރުކޭޓުގައި ތަކެތި ވިއްކާ ފަރާތްތަކުން ބުނީ، ރަމަޟާން މަހުގެ ކުރިއަށް އޮތް ދުވަސްތަކުގައި ކާށީގެ އަގު އިތުރަށް ހެޔޮވެގެންދާނެ ކަމަށެވެ. އެގޮތުން ކާށީގެ އަގުތައް އުޅެނީ، 8ރ. އިން ފެށިގެން 10ރ. އާ ދެމެދުގެ އަގުތަކެއްގަ އެވެ.

ކަރާ ކިލޯއެއްގެ އަގު ރަމަޟާން މަސް ފެށުނު އިރު 15ރ. އާއި 18ރ. ދެމެދުގެ އަގުތަކެއްގައި ހުރި ނަމަވެސް ކަރާ ކިލޯއެއްގެ އަގު މިހާރު އުޅެނީ 25ރ. އާ 30ރ އާ ދެމެދުގެ އަގުތަކެއްގަ އެވެ. އަދި ކުރިއަށް އޮތް ތަނުގައި 30ރ އާއި 35ރ އަށް އަގު   އުފުލިގެންދާނެ ކަމަށް ލޯކަލް މާރުކޭޓުގައި ތަކެތި ވިއްކާ ފަރާތްތަކުން ބުނެ އެވެ.

ލޯކަލް މާރުކާރުގައި ތަކެތި ލިބެން ހުރި ގޮތަށް ބަލާ އިރު، ފަތުގެ ބާވަތްތައް ލިބެން ހުރީ ވަރަށް މަދުންނެވެ. އެހެން ނަމަވެސް ފަތުގެ ބާވަތްތަކަކީ، އެންމެ ބޮޑަށް ޑިމާންޑް އޮންނަ ބާވަތް ކަމަށް ތަކެތި ވިއްކާ ފަރާތްތަކުން ބުނެ އެވެ.

ލޯކަލް މާރުކޭޓުގައި ކޮޕީ ފަތް ބޮޑިއެއްގެ އަގު 15ރ. އާއި 25ރ. އާ ދެމެދުގެ އަގުތެއްގައި އުޅޭ އިރު ލެޓިއުސް ކިލޯއެއްގެ އަގު އުޅެނީ 150ރ. އާއި 120ރ. އާ ދެމެދުގެ އަގުތަކެއްގަ އެވެ.

މަސް މާރުކޭޓުގައި ކަނޑުމަސް ކިލޯ އެއް 25ރ. އާއި 30ރ. އަށް ލިބެން ހުރި އިރު ކުރިއަށް އޮތް ތަނުގައިވެސް ކަނޑު މަހުގެ އަގު ދާނީ ދަށަށް ކަމަށް ތަކެތި ވިއްކާ ފަރާތްތަކުން ބުނެ އެވެ.