ކ. މާލެ
|
13 އޭޕްރިލް 2023 | ބުރާސްފަތި 07:15
ފީފާގެ ރައީސް އިންފަންޓީނޯއާއެކު މިނިސްޓަރު މަޚްލޫފް
ފީފާގެ ރައީސް އިންފަންޓީނޯއާއެކު މިނިސްޓަރު މަޚްލޫފް
ޓްވީޓަރ
ރައްޔިތުންގެ މަޖިލިސް
އިންފަންޓީނޯއާ ދިމާވެގެން ފުޓުބޯޅަ ދަނޑު އަޅާ ވާހަކަ ހިއްސާކުރުމުން ހުރީ ކޮސްވެފައި: މަޚްލޫފް
 
ސަބަބަކީ ކުޑަކުޑަ ޤައުމެއްގައި 300 މީހަކަށް ވެސް ފުޓުބޯޅަ ދަނޑެއް ޤާއިމުކޮށްދެމުން އަންނާތީ

ދިވެހިރާއްޖޭގައި ފުޓުބޯޅަ ދަނޑު ތަރައްޤީ ކުރާ މިންވަރު ހިއްސާކުރެއްވުމުން ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ ވެސް ހުންނެވީ ކޮސްވެފައި ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެ އެވެ.

ބުދަ ދުވަހު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން މަޚްލޫފް ވިދާޅުވީ ރާއްޖޭގެ ފުޓުބޯޅަ ކުރިއެރުވުމަށް ސަރުކާރުން ގިނަ ގުނަ މަސައްކަތްކޮށްދެއްވާ ކަމަށެވެ. އަދި އެކަމުގައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ނުހަނު އެހީތެރިކަން ވެސް ފޯރުކޮށްދޭ ކަމަށެވެ. މަޚްލޫފް ވިދާޅުވީ ރާއްޖޭގައި ސަރުކާރުން ޤާއިމުކޮށްދެމުން އަންނަ ބޮޑު ފުޓުބޯޅަ ދަނޑުތަކުން ވެސް، ފުޓުބޯޅަ ދިރުވައި ކުރިއެރުވުމަށް ސަރުކާރުން ކުރަމުން އަންނަ މަސައްކަތް ހާމަވާނެ ކަމަށެވެ. މިއަހަރުގެ ތެރޭގައި ފަންސާސް ވަނަ ދަނޑުގެ މަސައްކަތް ނިންމައި ހުޅުވައިދޭނެކަން ފާހަގަކުރައްވަމުން މަޚްލޫފް ވިދާޅުވީ. އއ.ހިމަންދޫ ދަނޑުގެ މަސައްކަތް ވެސް ނިންމައި މިހާރު ހަވާލުކޮށްފި ކަމަށެވެ. ހަމައެއާއެކު މަޚްލޫފް ފާހަގަ ކުރެއްވި ގޮތުގައި މީގެ ކުރިން ރާއްޖޭގައި ސަރުކާރަކުން އަޅާދީފައިވާ ފުޓުބޯޅަ ދަނޑެއް ނޯންނާނެ ކަމަށެވެ.

އިންފަންޓީނޯއާ ދިމާވި ދަތުރެއްގެ ތެރެއިން ރާއްޖޭގައި ފުޓުބޯޅަ ދަނޑު އަޅާ ވާހަކަ ހިއްސާކުރެއްވުމުން ހުންނެވީ ކޮސްވެފައި ކަމަށް މަޚްލޫފް ވިދާޅުވި އެވެ. އޭގެ ސަބަބަކީ ކުޑަކުޑަ ޤައުމެއްގައި 300 މީހަކަށް ވެސް ފުޓުބޯޅަ ދަނޑެއް ޤާއިމުކޮށްދެމުން އަންނާތީ އެވެ. މަޚްލޫފް ވިދާޅުވީ ސަރުކާރުން ބޮޑު އެހީތެރިކަމެއް ދިން ނަމަވެސް، ރާއްޖޭގެ ޓޮޕް ލީގުގެ ތެރޭގައި މައްސަލަ ދިމާވެގެން އުޅޭ ކަމަށެވެ. އަދި ކަންބޮޑުވުންތަކާއި މައްސަލަތަކެއްގެ ގޮތުގައި މިހާތަނަށް ދައްކަމުން އަންނަނީ އެ ވާހަކަ ކަމަށާއި، ނަމަވެސް އެކި ގޮތްގޮތަށް މިނިސްޓްރީން އެފްއޭއެމަށް އަބަދު ވެސް އެއްބާރުލުން ދެމުން އަންނަ ކަމަށެވެ.

މީގެ ކުރިން ސަރުކާރަކުން އަޅައިދިން އެންމެ ފުޓުބޯޅަ ދަނޑެއް ވެސް ނޯންނާނެ. އިންފަންޓީނޯއާ ދިމާވެގެން ފުޓުބޯޅަ ދަނޑު އަޅާ ވާހަކަ ބުނީމަ ހުރީ ކޮސްވެފައި. އެހެންނުވާނީ ކުޑަކުޑަ ޤައުމެއްގައި އަޅުގަނޑުމެން ގޮސް ތިން ސަތޭކަ މީހުންނަށް ވެސް އެބަ އަޅައިދެން ދަނޑު.
އަޙުމަދު މަޚްލޫފް / ޔޫތު މިނިސްޓަރު

މި ސަރުކާރު ވެރިކަމާ ހަވާލުވީ 25 ޓާފް ދަނޑު އެޅުމަށް ވައުދުވެގެންނެވެ. ނަމަވެސް މިހާތަނަށް ވަނީ 40 އަށް ވުރެ ގިނަ ދަނޑުގެ މަސައްކަތް ނިންމާލައިފަ އެވެ. މީގެ އިތުރުން 80 އަށް ވުރެ ގިނަ ދަނޑުގެ މަސައްކަތް ދަނީ އެކި މަރުހަލާގައި ކުރިއަށެވެ. ރާއްޖޭގައި ބައިނަލްއަޤުވާމީ ފެންވަރުގެ ދަނޑުތައް ޤާއިމުކޮށް، އެ ތަންތަނުގައި އިންޓަނޭޝަނަލް މެޗުތައް ކުޅުމަކީ ވެސް ސަރުކާރުން އަމާޒު ހިފާފައިވާ ކަމެކެވެ. ދާދި ފަހުން މިދިޔަ މަހު ވަނީ ރާއްޖެ އާއި ޕާކިސްތާނު ބައްދަލު ކުރި ރަހުމަތްތެރިކަމުގެ މެޗެއް ލ.ގަމު ދަނޑުގައި ކުޅެފަ އެވެ. އެއީ ފީފާ ރޭންކިން މެޗެކެވެ. މިނިސްޓަރު މަޚްލޫފް ވިދާޅުވަނީ ދަނޑުތައް ޤާއިމުކުރުމަށްފަހު، އެކި މަރުހަލާގައި ކުރިއަށް ގެންދާ މަސައްކަތްތަކާއެކު (ރޮސްޓްރޮމް، ފެންސް އަދި ލައިޓް) އެ ދަނޑުތައް ސްޓޭޑިއަމްތަކަށް ބަދަލުވެގެންދާނެ ކަމަށެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
50%
0%
0%
50%
0%
ކޮމެންޓް
14 އޭޕްރިލް 2023 | ހުކުރު 13:50
ފަހި
އެވަރަށް ދަނޑު އަޅައިގެންވެސް ފުޓްބޯޅަ ކުރިއަށް ނުދާތީ.
14 އޭޕްރިލް 2023 | ހުކުރު 11:11
މުހައްމަދު
އޭނާ ކޮސްވީ ކޮންކަމަކާ.!!!