ޖުލައި 15ން ފެށިގެން ރާއްޖޭގެ ހުރިހާ ހިސާބަކުން ކަނޑު އުޅަނދުފަހަރަށް ޑިޖިޓަލް ލައިސަންސް ލިބޭނެ: ޓްރާންސްޕޯޓް މިނިސްޓްރީ
ޤަވާއިދަށް އަމަލުކުރަން ފެށުމުން މިހާރު ދޫކުރާ ލައިސަންސް ފޮތް އުވިގެންދާނެ
ކަނޑު ދަތުރުފަތުރުގެ އުޅަނދުތައް
ޖުލައި 15ން ފެށިގެން ރާއްޖޭގެ ހުރިހާ ހިސާބަކުން ކަނޑު އުޅަނދުފަހަރަށް ޑިޖިޓަލް ލައިސަންސް ލިބޭނެ ކަމަށް ޓްރާންސްޕޯޓް މިނިސްޓްރީގެ ޑިރެކްޓަރު ހުސެއިން ނަޒީރު ވިދާޅުވެއްޖެއެވެ.
ރާއްޖޭގެ ލޯކަލް ނުވަތަ އެތެރޭގައި ކަނޑު އުޅަނދުފަހަރު ދުއްވުމުގެ ލައިސަންސް އާ ބެހޭ އާ ގަވާއިދާ ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުން ޓްރާންސްޕޯޓް އޮތޯރިޓީ އޮފް މޯލްޑިވްސް ގެ އެސިސްޓަންޓް ޑައިރެކްޓަރ ހުސެން ނަޒީރު ވިދާޅުވީ ކަނޑުގައި ދުއްވާ އުޅަނދުތަކަށް ދޫކުރަމުން އަންނަނީ ލައިސަންސް ފޮތެއް ކަމަށާއި ޤަވާއިދަށް އަމަލުކުރަން ފެށުމުން ދޫކުރާނީ ޑިޖިޓަލް ލައިސަންސް ކަމަށެވެ. އަދި އޭގެ ފަހުން ފޮތްތައް އުވިގެންދާނެ ކަމަށް ވެސް ވިދާޅުވިއެވެ.
ކަނޑުމަތީގައި އުޅޭއިރު ރޭންޖް ނުލިބޭ ހާލަތްތަކުގައި ޑިޖިޓަލް ލައިސަންސް ބަލަން އުނދަގޫވާނެކަން ފާހަގަކުރައްވާ ނަޒީރު ވިދާޅުވީ އެފަދަ ފަރާތްތަކަށް ލައިސަންސް ޕްރިންޓް ކުރުމުގެ ފުރުސަތު ވެސް އޮންނާނެ ކަމަށެވެ.
ކޮންމެ 10 އަހަރަކުން ލައިސަންސް އައު ކުރަން ޖެހޭ ކަމަށާއި ޤަވާއިދަށް އަމަލުކުރަން ފެށުމުން މިހާރު ދޫކޮށްފައިވާ ލައިސަންސް ކެޓެގަރީތައް ބަދަލުކުރަން ޖެހޭނެ ކަމަށް ވެސް ވިދާޅުވިއެވެ. އަދި މި ޤަވާއިދުގެ ކުށްތައް ކޮށްގެން ލިބޭ އަދަބުތައް ވެސް ތަފްސީލުކޮށްފައިވާނެ ކަމަށް ވިދާޅުވިއެވެ.
ދިވެހިރާއްޖޭގެ ކަނޑުގެ ސަރަޙައްދުގައި ދުއްވާ ލޯކަލް އުޅަނދުފަހަރު ދުއްވުމުގެ ލައިސަންސާބެހޭ ގަވާއިދުގައި ބުނެފައިވާ ގޮތުގައި ދިވެހިރާއްޖޭގެ ސަލާމަތީ ހިދުމަތްތަކުގެ ބޭނުންތަކަށް ދުއްވާ އުޅަނދުތައް ދުއްވުމަށް މި ގަވާއިދުގެ ދަށުން ލައިސަންސް ނެގުމުން އިސްތިސްނާ ވާނެއެވެ.
ގަވާއިދުގައި ވާގޮތުން ކަނޑުގައި ދުއްވާ އުޅަނދުފަހަރު ދުއްވުމުގެ ލައިސަންސް ދޫކުރާނީ، މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުންނެވެ. އަދި މިނިސްޓްރީން ގަބޫލުކުރާ، ރާއްޖެއިން ބޭރުގެ ފަރާތަކުން ދޫކޮށްފައިވާ ލައިސަންސެއްގެ މައްޗަށް ބިނާކޮށް، މިނިސްޓްރީން ކަނޑައަޅާ ގޮތެއްގެ މަތީން، ރާއްޖޭގެ ސަރަޙައްދުގައި ދުއްވުމުގެ ވަގުތީ ލައިސަންސް، ރާއްޖެއަށް ޒިޔާރަތްކުރާ ފަތުރުވެރިއަކަށް ދޫކުރެވިދާނެ ކަމަށް ވެސް ވަނީ ބުނެފައެވެ.
