މާލޭ ސްޓްރީޓް ސްކޭޕިންގ ޕްރޮޖެކްޓާ ގުޅޭގޮތުން މަޝްވަރާކުރުމަށް، ކޮމިޓީން ސިޓީ ކައުންސިލާއި ޕްލޭނިންގ މިނިސްޓްރީއާ ބައްދަލުކޮށްފި
މިއީ އިދާރީ ދާއިރާތަކުގެ ގާނޫނާ ޚިލާފަށް އެއްބަސްވުން އުވާލިކަމަށް ބުނެ ސިޓީ ކައުންސިލުން ހުށަހަޅާފައިވާ މައްސަލައެއް
ލާމަރުކަޒީ ކޮމިޓީގެ ސަބް ކޮމިޓީގެ ބައްދަލުވުމުގެ ތެރެއިން
މާލޭގެ މަގުތައް ޒަމާނީ ފެންވަރަށް ތަރައްގީކޮށް މަގުތަކަށް ދިމާވެފައިވާ ބޮޑެތި މައްސަލަތައް ހައްލުކުރުމަށް ފެށި "މާލޭގެ ސްޓްރީޓް ސްކޭޕިންގ ޑިވެލޮޕްމަންޓް ޕްރޮޖެކްޓް" ކުރިއަށް ގެންދަން މާލޭ ސިޓީކައުންސިލާއެކު ހަދާފައިވާ އެއްބަސްވުން، އިދާރީ ދާއިރާތައް ލާމަރުކަޒީ އުސޫލުން ހިންގުމާބެހޭ ގާނޫނާ ޚިލާފަށް، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރއިން ބާތިލުކޮށްފައިވާކަމަށް ބުނެ މާލޭ ސިޓީ ކައުންސިލުން ރައްޔިތުންގެ މަޖިލީހަށް ހުށަހަޅާފައިވާ މައްސަލައާ ގުޅޭގޮތުން ލާމަރުކަޒީ ކޮމިޓީގެ ސަބް ކޮމިޓީގައި މަޝްވަރާކޮށްފިއެވެ.
ހޯމަ ދުވަހު ކުރިޔަށްދިޔަ ލާމަރުކަޒީ ކޮމިޓީގެ ސަބް ކޮމިޓީގައި މާލޭ ސިޓީ ކައުންސިލުގެ ޑެޕިޔުޓީ މޭޔަރ އަހުމަދު ނަރީޝް ބައިވެރިވެވަޑައިގެންނެވިއެވެ. އަދި ހައުސިންގ މިނިސްޓްރީގެ ފަރާތުން ޕްރޮޖެކްޓް ކޯޑިނޭޓަރުން ބައިވެރިވެވަޑައިގެންނެވިއެވެ.
މިބައްދަލުވުމުގައި ސިޓީ ކައުންސިލުގެ ފަރާތުން ވަނީ މާލޭ ސްޓްރީޓްސް ސްކޭޕިންގ ޑިވެލޮޕްމަންޓް ޕްރޮޖެކްޓް ތަންފީޒުކުރުމަށް ހަވާލުކޮށްފައިވާ އެއްބަސްވުން 23 ޖޫން 2022ން ފެށިގެން ނިމުމަކަށް ގެނެސްފައިވާ ކަމަށް ޕްލޭނިންގ މިނިސްޓްރީން އަންގާފައިވާކަމަށާއި، އެއީ ކޮން އުސޫލަކުން ކުރިކަމެއްތޯ ކޮމިޓީން ބަލައިދިނުމަށް އެދޭކަމަށެވެ. މާލޭ ސްޓްރީޓްސް ސްކޭޕިންގ ޑިވެލޮޕްމަންޓް ޕްރޮޖެކްޓް ކުރިޔަށްގެންދިޔުމަށް ސިޓީ ކައުންސިލާއި އާރްޑީސީއާއެކު 2020 ވަނަ އަހަރުގެ ޖެނުއަރީ މަހުގެ 26 ވަނަ ދުވަހު ވެފައިވާ އެއްބަސްވުމާ އެއްގޮތަށް ކަންކަން ހިނގަމުން އައިސް 2022 ވަނަ އަހަރުގެ މާރޗް މަހު އެ އެއްބަސްވުމަށް 3 ވަނަ އިސްލާހެއް ގެނެސް، ތާރު އަޅަން ބޭނުންވާ މަގުތައް ފާހަގަކޮށްފައިވާކަމަށް ސިޓީ ކައުންސިލުން ބުނެއެވެ. ނަމަވެސް ފަހުން 2022 ވަނަ އަހަރުގެ ޖޫން 23 ވަނަ ދުވަހު އެ އެއްބަސްވުން އުވާލައި، އަމީނީ މަގު ހެދުމަށް ޕްލޭނިންގ މިނިސްޓްރީން އާރްޑީސީއާ ހަވާލުކުރީ ސިޓީ ކައުންސިލާ އެއްވެސް މަޝްވަރާއެއް ނުކޮށް ކަމަށް ސިޓީ ކައުންސިލުން ބުނެއެވެ.
ކޮމިޓީގައި ވާހަކަދައްކަމުން ޕްލޭނިންގ މިނިސްޓްރީން ބުނީ، އަމީނީ މަގު ޒަމާނީ ފެންވަރަށް ތަރައްގީކުރުމުގެ މަޝްރޫއަކީ މުޅިން އައު މަޝްރޫއެއްކަމަށެވެ. އަދި މަޝްރޫއުގެ އަގު ބޮޑުވެފައިވަނީ އާ ސްޓޯން ވޯޓަރ މެނޭޖްމަންޓް ސިސްޓަމަކާއި ޕަންޕް ސްޓޭޝަންތައް ގާއިމްކުރެވިގެން، މުޅިން އައު ޑިޒައިނަކަށް އަމީނީ މަގު ތަރައްގީކުރެވިގެންދާތީ ކަމަށެވެ.
މި މައްސަލާގައި ކޮމިޓީން ނިންމާފައިވަނީ ޕްލޭނިންގ މިނިސްޓްރީގެ ކަމާބެހޭ ބޭފުޅުންނާ ބައްދަލުކޮށް މަޝްވަރާކުރުމަށްފަހު ގޮތެއް ނިންމުމަށެވެ.
