މޯލްޑިވްސް ފައިނޭޝަލް އެކްސްޕޯ ފަށައިފި

ގާތްގަނޑަކަށް 30 އެކްޒިބިޓަރުންނާ އެކު މޯލްޑިވްސް ފައިނޭޝަލް އެކްސްޕޯ 2017 ފަށައިފި އެވެ.

މިމަހުގެ 6 އަކުން 8 އަށް ކުރިއަށްދާ މި އެކްސްޕޯގައި ރާއްޖޭގެ މާލީ ގިނަ އިދާރާތަކުން ވަނީ ބައިވެރިވެފަ އެވެ.

މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އާއި ހައުސިން ޑިވެލޮޕްމެންޓް ކޯޕަރޭޝަން(އެޗްޑީސީ) އިން ގުޅިގެން ކުރިއަށްގެންދާ އެކްސްޕޯގެ މިފަހަރުގެ ތީމް އަކީ " ހައުސިން އެންޑް ފައިނޭންސް" އެވެ.

މޯލްޑިވްސް ފައިނޭޝިއަލް އެކްސްޕޯއަކީ އާންމުންގެ މެދުގައި މާލީ އަދި އިގްތިސާދީ ކަންކަމާ ބެހޭ ގޮތުން ހޭލުންތެރިކަން އިތުރުކުރުމާއި އާންމުންނާއި މާލީ އިދާރާތަކުގެ ގުޅުން އިތުރަށް ހަރުދަނާ ކުރުމަށް މަގުފަހިކުރުމަށް ބާއްވާ މިފަދަ ދެވަނަ އެކްސްޕޯ އެވެ. މީގެ ކުރިން މި އެކްސްޕޯ ބާއްވާފައި ވަނީ 2015 ވަނަ އަހަރު އެވެ.

މި އެކްސްޕޯގެ ތެރެއިން ގެދޮރު ގަތުމަށާއި އަމިއްލަ ފަރާތްތަކުން ބިން ގަތުމަށް ހުރި ފުރުސަތުތަކާއި މާލީ އިދާރާތަކުން އެކަން ކަމަށް ފައިސާ ހޯދޭނެ ގޮތްތަކުގެ މައުލޫމާތު ލިބިގެންދާނެ އެވެ. މީގެ އިތުރުން މާލީ އިދާރާތަކުން ލިބޭ މައުލޫމާތުތައް ފޯރުކޮށްދިނުމާއި ބައެއް ހިދުމަތްތަކުގެ އެޕްލިކޭޝަން ފޯމް ބަލައިގަތުމަށް ވަނީ ހަމަޖެހިފަ އެެވެ.

މީގެ އިތުރުން އިގްތިސާދީ މާލީ އިދާރާތަކުން އަލަށް ތައާރަފް ކުރާ ހިދުމަތްތައް އިފްތިތާހު ކުރުން ވެސް މި އެކްސްޕޯގެ ތެރެއިން ކުރިއަށްދާނެ އެވެ.

މި އެކްސްޕޯގެ ތެރެއިން އިގްތިސާދާއި މާލީ ކަންކަމާ ބެހޭ ގޮތުން މައުލޫމަތު ދިނުމާއި ހޭލުންތެރިކަން އިތުރު ކުރުމުގެ ގޮތުން އާންމުންނަށް ހުޅޫވާލެވިގެން ތަފާތު ސެމިނާތަކެއް ކުރިއަށްދާނެ އެވެ.

މި އަހަރުގެ އެކްސްޕޯގައި ބައިވެރިވާ ފަރާތްތަކުގެ ތެރޭގައި ހިދުމަތްދޭ ހުރިހާ ބޭންކުތަކާއި އިންޝިއުރެންސް ކުންފުނިތަކުގެ އިތުރަށް ހައުސިން ޑެވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ)، މޯލްޑިވްސް ފައިނޭންސް ލީސިން ކޮމްޕެނީ އާއި މޯލްޑިވްސް ފެންޝަން އެޑްމިނިސްޓްރޭޝަންގެ ސްޓޯލުތައް ވެސް ހިމެނެ އެވެ.

މި އެކްސްޕޯގައި ބައިވެރިވި ދިވެހި އިންޝިއުރެންސް އިން ބުނީ އެ އެކްސްޕޯގެ ތެރެއިން ދިވެހި އިންޝިއުރަންސްގެ ޕްރޮޑަކްޓްތަކާ ގުޅޭ މައުލޫމާތުތައް ލިބިގެންދާނެ ކަމަށެވެ. އަދި ތިން ދުވަހަށް ކުރިއަށްދާ މި އެކްސްޕޯގެ ތެރެއިން ހާއްސަ އިނާމުތަކެއް ހޯދާލުމުގެ ފުރުސަތު ވެސް ފަހިކޮށްދީފައިވާ ކަމަށް އެ ކުންފުނިން ބުނެ އެވެ.

" އަންނަ ވިޒިޓަރސް އަށް ފަން ކޮށް އިންޓަރެކްޓިވްކޮށް ކުރިއަށްގެންދިއުމަށް ސްޕިން ވީލް އެކްޓިވިޓީއެއް އިންނާނެ. އޭގެ ތެރެއިން ދިވެހި އިންޝީއުރެންސްއާ ބެހޭ ސުވާލު ކޮށްލާފަ މައުލޫމާތު ދިނުން ވެސް އިންނާނެ. ހަދިޔާ ވެސް ހުންނާނެ. ދެން ގްރޭންޑް ޕްރައިސްގެ ގޮތުގައި ވެސް ވަރަށް ބޮޑު ހަދިޔާއެއް އިންނާނެ. އޭގެ ތެރޭގައި ބާސެލޯސް މޯލްޑިވްސް އިން ހަތަރު ބޭފުޅަށް ޑިނަރއެއް ލިބިގެންދާނެ،" ދިވެހި އިންޑިއުރެންސްގެ މުވައްޒަކު މައުލޫމާތުދިނެވެ.

މީގެ އިތުރުން ފައިނޭޝަލް އެކްސްޕޯގައި މީރާގެ ސްޓޯލެއް ވެސް ވަނީ ބެހެއްޓިފަ އެވެ.

"ޓެކްސްއާ ބެހޭ މައުލޫމާތު ދިނުން ކުރިއަށްދާނީ. މި އެކްސްޕޯގައި މިފަހަރު ބޮޑަށް މި ހާއްސަކޮށްލާފައި ވަނީ ހައުސިންނަށް. އެހެންވީމަ ރާއްޖޭގައި މިހާރު ގެއެއް ގަނެ، އޭގެއިން ވިޔަފާރިކުރާ ފަރާތްތަކަށް ހުންނަ ޓެކްސް ކޮމްޕޮނެންޓްތައް އަންނަނީ ކިހިނެއްތޯ ކިޔާދެވޭނެ،" މީރާގެ މުވައްޒަފަކު ބުންޏެވެ.

މިއަހަރުގެ ފައިނޭޝިއަލް އެކްސްޕޯގައި އާ ހިދުމަތަކެއް ބައެއް ކުންފުނިތަކުން ތައާރަފްކުރުމަށް ހަމަޖެހިފައިވާ އިރު ދިރާގުން ވެސް އެކުންފުނިން އަލަށް ތައާރަފްކުރާ ހިދުމަތަކާއި ގުޅޭ ގޮތުން އާއްމުން ހޭލުންތެރިކުރުމުގެ މަސައްކަތް މި އެކްސްޕޯގެ ތެރެއިން ކުރިއަށްދާނެ ކަމަށް އެކުންފުނިން ބުނެ އެވެ.

"ދިރާގު ޕޭގެ ހިދުމަތާއި ގުޅޭ ގޮތުން މި އެކްސްޕޯގެ ތެރެއިން މައުލޫމާތު ދެވިގެންދާނެ. އޭގައި ހުރި ފީޗާސްތަކާއި އެކު ޑެމޯއެއް ދައްކާލެވޭނެ. މި ސަރވިސް ވަރަށް އަވަހަށް ކަސްޓަމަރުންނާއި ހަމައަށް އަންނާނެ. ކަސްޓަމަރުންނަށް ވަރަށް ފަސޭހަވެގެންދާނެ،" ދިރާގުގެ މުވައްޒަފަކު މައުލޫމާތު ދިނެވެ.

މި އެކްސްޕޯގައި 30 އަށް ވުރެ ގިނަ މާލީ އިދާރާތައް ބައިވެރިވެފައިވާ އިރު އެކްސްޕޯ ކުރިއަށްދަނީ ދަރުބާރުގޭގަ އެވެ.