މާލީ އަދި އެހެނިހެން މަސްލަހަތުތައް ހާމަކުރުމުގެ ބިލަށް އާއްމުންގެ ހިޔާލު ހޯދަން ނިންމައިފި
އޮޑިޓަރ ޖެނެރަލް ޙުސައިން ނިޔާޒީ މިބިލަށް ތާއީދު ކުރެއްވި
އޮޑިޓަރ ޖެނެރަލްގެ އޮފީހުގެ ބޭފުޅުން
މާލީ އަދި އެހެނިހެން މަޞްލަޙަތުތައް ހާމަކުރުމުގެ ބިލަށް އާއްމުންގެ ކޮމެންޓް ހޯދުމަށް އާންމުކޮށް އިއުލާން ކުރުމަށް ނިންމައިފިއެވެ.
މާލީ އަދި އެހެނިހެން މަޞްލަޙަތުތައް ހާމަކުރުމުގެ ބިލުދިރާސާކުރުމަށް ހޯމަ ދުވަހު ބޭއްވި ކޮމެޓީއަށް އޮޑިޓަރ ޖެނެރަލް އޮފީހުގެ ބޭފުޅުން ވަނީ ހާޒިރުކޮށްފައިވެއެވެ. މި ބިލާ ގުޅޭގޮތުން ހިޔާލު ހުށަހެޅުމަށް އެދުމުން އޮޑިޓަރ ޖެނެރަލް ޙުސައިން ނިޔާޒީ ވިދާޅުވީ މިބިލަށް ތާއީދު ކުރައްވާ ކަމަށެވެ.
ނިޔާޒީ ވިދާޅުވީ މިހާރުގެ ހާލަތަށް ބަލާއިރު ގާނޫނު އަސާސީގައި އޮޑިޓަރ ޖެނަރަލްއަށް ބައެއް ޒިންމާތައް ލިބިފައިވާ ކަމަށެވެ. އޮޑިޓްގައި ގާނޫނުގައި މިހާރު އޮތް ބާރަކީ ހުށަހެޅުމުގެ ބާރު އެކަނި ކަމަށާއި، އެއީ ސައްހަ މައުލޫމާތޯ ބެލުމުގެ ބާރު ނެތް ކަމަށެވެ. މިގާނޫނުގެ ތެރެއިން އެބާރު ލިބިދޭން ޖެހޭ ކަމަށް ނިޔާޒީ ވިދާޅުވިއެވެ.
ނިޔާޒީ ވިދާޅުވީ ދައުލަތުގެ މަގާމުތަކުގައި ތިއްބަވާ ބޭފުޅުން ހުށަހަޅާ މާލީ ބަޔާންތަކުގައި ދޮގު މައުލޫމާތު ހުންނާނެ ކަމަށް އުންމީދު ނުކުރާ ކަމަށެވެ. ނަމަވެސް ބައެއް ހާލަތްތަކުގައި އާއްމު ރައްޔިތުން ސުވާލު އުފައްދާ ކަމަށާއި، މިފަދަ ހާލަތެއްގައި މާލީ ބަޔާން ހުށަހެޅުމަކީ ވަރަށް މުހިންމު ބޭނުންތެރިކަމެއް ކަމަށް ނިޔާޒީ ވިދާޅުވިއެވެ. އަދި ވިދާޅުވީ މިބިލަށް ކަމާބެހޭ މުއައްސަސާތަކުގެ ހިޔާލާ މަޝްވަރާ ބޭނުންވާ ކަމަށެވެ.
އެހެންކަމުން މި ބިލުގެ ކޮމެންޓް ހޯދުމަށް އާންމުކޮށް އިއުލާނު ކުރުމަށާއި، ގުޅުންހުރި އިދާރާތަކަށް ފޮނުވުމަށް ކޮމެޓީގައި ވަނީ ނިންމާފައެވެ.
