މިފްކޯގެ ކެޕޭސިޓީ ވަރަށް ބޮޑަށް އިތުރުވެ، ތިން ބޯޓު ޖުލައި މަހުގެ ތެރޭގައި ގެނެވޭނެ: ސީއީއޯ

ކުރިއަށް އޮތްތަނުގައި މިފްކޯގެ ކެޕޭސިޓީ ވަރަށް ބޮޑަށް އިތުރުވާނެ ކަމަށާއި، ތިން ބޯޓު ޖުލައި މަހުގެ ތެރޭގައި ރާއްޖެއަށް ގެނެވޭނެ ކަމަށް މިފްކޯގެ ސީއީއޯ އިސްމާއީލް ފައުޒީ ވިދާޅުވެއްޖެއެވެ.

ރާއްޖެޓީވީގައި ވާހަކަދައްކަވަމުން މިފްކޯގެ ސީއީއޯ އިސްމާއީލް ފައުޒީ ވިދާޅުވީ މިފްކޯގެ މަސްކިރުމުގެ ކެޕޭސިޓީ އިތުރުކުރުމަށް ގިނަ މަސައްކަތްތައް ކުރަމުންދާ ކަމަށާއި ރާއްޖެއަށް ގެނެވޭ ތިން ބޯޓުތަކުގެ ތެރެއިން އެއް ބޯޓަކީ ގދ.އަތޮޅުގައި ހަރަކާތްތެރިވާނެ ބޯޓެއް ކަމަށެވެ. އެހެންކަމުން ފަރެސްމާތޮޑާ ހިސާބުގައި މަސްވެރިކަން ކުރުމަށް ހަރަކާތްތެރިވާ މަސްވެރިންނަށް ވަރަށް ބޮޑު ލުޔެއް ލިބޭނެ ކަމަށް އޭނާ ވިދާޅުވިއެވެ.

Advertisement

އިސްމާއީލް ފައުޒީ ވިދާޅުވީ ތިން ބޯޓު ގެނައުމުގެ މަސައްކަތް ކުރަމުންދާ ކަމަށާއި، ތައިލޭންޑުގައި ޑޮކުކޮށްފައިވާ ކަމަށެވެ. އަދި ވިދާޅުވީ މިއިން ކޮންމެ ބޯޓެއްގައި ދުވާލަކު 60 ޓަނު މަސް ގަނެވޭނެ ކެޕޭސިޓީ ހުންނާނެ ކަމަށެވެ.

އުތުރާއި ދެކުނުގެ މަސްވެރިންނަށް ވަރަށް ބޮޑެތި ލުއިތަކެއް ލިބޭނެކަން ފާހަގަކުރައްވައި އިސްމާއީލް ވިދާޅުވީ އިހަވަންދޫގައި 100 ޓަނުގެ ބްރައިން ފްރީޒިންގއާއެކު 500 ޓަނުގެ ކޯލްޑް ސްޓޯރޭޖެއް ގާއިމްކުރެވޭނެ ކަމަށެވެ. ބަނދަރުގެ މަސައްކަތްތައް ކުރިއަށްދާއިރު، ފެސިލިޓީ ގާއިމް ކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށާއި، ފައިނޭންސް ހޯދުމަށް މަސައްކަތް ކުރަމުންދާ ކަމަށެވެ.

މީގެ އިތުރުން އިސްމާއީލް ވިދާޅުވީ ކޫއްޑޫގައި ބްރައިން ފްރީޒިންގ އިތުރު ކުރުމުގެ މަސައްކަތް މިހާރު ފަށައި ކުރިއަށްދާ ކަމަށާއި، މެޝަނަރީތަކަށް އޯޑަރ ކުރެވިފައިވާ ކަމަށެވެ. އަދި ވިދާޅުވީ ބިލްޑިންގެ ސްޓަރަކްޗަރ މަސައްކަތް ނިމުމާއެކު، ޖޫން މަހުގެ ތެރޭގައި މަސައްކަތުގެ ބޮޑު ބައެއް ނިންމޭނެ ކަމަށެވެ. އަދި ވިދާޅުވީ ގދ.ތިނަދޫ، އައްޑޫ، ފެލިވަރު އަދި މ.ފިޝަރީޒް ކޮންޕްލެކްސްއާއެކު ދެހާސް ދުވިސައްތަ ޓަނު ކެޕޭސިޓީ މިފްކޯއަށް އިތުރު ކުރެވިގެންދާނެ ކަމަށެވެ.

އިސްމާއީލް ވިދާޅުވީ ސަރުކާރުން ނިންމާފައި އޮތީ އެންމެ ފުރަތަމަ މަސްވެރިން ގެންނަ މަސް ގަތުމުގެ ކެޕޭސިޓީ އިތުރު ކުރުން ކަމަށެވެ. އެހެންކަމުން މިފްކޯ ތަރައްގީ ކުރަމުން ދަނީ އެމަގުން ކަމަށް އޭނާ ވިދާޅުވިއެވެ. އިސްމާއީލް ވިދާޅުވީ މަސްވެރިންނަށް ހަމަ އަގު ހޯދައިދިނުމަށް އަބަދުވެސް އިސްކަންދޭ ކަމަށެވެ. އެގޮތުން ރާއްޖެއިން ބޭރަށް އެކްސްޕޯޓު ކުރާ މަހުގެ އަގު ހޯދައި، ޔޫރަޕްގެ މަރކެޓުން ފަހި ފުރުސަތުތައް ހޯދުމަށް މަސައްކަތް ކުރާ ކަމަށް އިސްމާއީލް ވިދާޅުވިއެވެ.