ކުރިއަށް އޮތްތަނުގައި މ.އަތޮޅުގެ މަސްވެރިންނަށް ފަސޭހަކަމާއެކު ކޮންމެ ދުވަހަކު ވެސް މަސް ކިރުވޭނެ: މިފްކޯގެ ސީއީއޯ
10 އެޕްރީލު 2023 | ހޯމަ 05:49މ.ފިޝަރީޒް ކޮންޕްލެކްސްގައި ގާތްގަނޑަކަށް 100 ޓަނުގެ ބްރައިން ފްރީޒިންގއާއެކު 500 ޓަނުގެ ސްޓޯރޭޖެއް ގާއިމް ކުރެވޭނެ
ރާއްޖެޓީވީގެ ފަލަސުރުހީ ޕްރޮގްރާމްގައި މިފްކޯގެ ސީއީއޯ އިސްމާއީލް ފައުޒީ ވާހަކަދައްކަވަނީ
ކުރިއަށް އޮތްތަނުގައި މ.އަތޮޅުގެ މަސްވެރިންނަށް ފަސޭހަކަމާއެކު ކޮންމެ ދުވަހަކު ވެސް މަސް ކިރުވޭނެ ކަމަށް މިފްކޯގެ ސީއީއޯ އިސްމާއީލް ފައުޒީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިފްކޯގެ ސީއީއޯ އިސްމާއީލް ފައުޒީ ވިދާޅުވީ، މ.އަތޮޅުގައި މިފްކޯ އިން ތަރައްގީކުރަމުން އަންނަ ބަނދަރު ތަރައްގީ ކުރުމުގެ މަޝްރޫއުގެ މަސައްކަތް ބާރު ސްޕީޑްގައި ކުރިއަށްދާ ކަމަށާއި، މިހާރު ކުރިއަށްދަނީ ޝީޓް ޕައިލް ހަރުކުރުމުގެ މަސައްކަތް ކަމަށެވެ. މިފްކޯއިން މ.އަތޮޅުގައި ބަނދަރު ތަރައްގީކުރުމުގެ މަސައްކަތް ކުރަމުން އަންނަނީ އެއަތޮޅު މުލަކުގައި ކަމަށްވާއިރު، މި ބަނދަރާއެކު މަސްވެރިންނަށް ވަރަށް ބޮޑެތި ލުއިތަކެއް ލިބޭނެ ކަަމަށް އޭނާ ވިދާޅުވިއެވެ.
މ.ފިޝަރީޒް ކޮންޕްލެކްސްގައި ގާތްގަނޑަކަށް 100 ޓަނުގެ ބްރައިން ފްރީޒިންގއާއެކު 500 ޓަނުގެ ސްޓޯރޭޖެއް ގާއިމް ކުރެވޭނެކަން ފާހަގަކުރައްވައި އިސްމާއީލް ވިދާޅުވީ މ.އަތޮޅުގައި ހިމެނޭ ރަށްތަކާއި ކައިރި ހިސާބުގެ ރަށްތަކުގެ މަސްވެރިންނަށް ފަސޭހައިން މަސް ކިރޭނެ އިިންތިޒާމް ހަމަޖެހޭނެ ކަމަށާއި، ދެކުނުގެ މަސްވެރިކަމަށް ލިބޭ ކުރިއެރުމެއް ކަމަށެވެ. އަދި މަސްވެރިންގެ އަތުން ދާ ހަރަދަށް ވަރަށް ބޮޑު ލުޔެއް ލިބޭނެ ކަމަށާއި، ކޮންމެ ދުވަހަކު ވެސް މަސް ކިރޭނެ ކަމަށް އިސްމާއީލް ވިދާޅުވިއެވެ.
މުލަކުގައި ހަދާ މިފްކޯ ބަނދަރަކީ ރާއްޖޭގެ އެކި ކަންކޮޅުތަކުގައި މަސްވެރިންނަށް މަސްކިރޭނެ އިންތިޒާމު ހަމަޖެއްސުމަށްޓަކައި ހިންގާ މަޝްރޫއެގެ ތެރެއިން ތަރައްގީކުރާ ބަނދަރެކެވެ. މިމަސައްކަތްކުރަމުން އަންނަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ) ންނެވެ.
މި މަޝްރޫޢުގެ އެންމެ ފަހުގެ މައުލޫމާތު ހިއްސާކުރަމުން އެމްޓީސީސީން ބުނީ، ޝީޓް ޕައިލް ހަރުކުރުމުގެ މަސައްކަތް މިހާރު ނިމިފައިވާއިރު، ބިން ހިއްކުމުގެ މަސައްކަތުގެ 18 އިންސައްތަ ފުރިހަމަކޮށްފައިވާ ކަމަށެވެ. އަދި، ބަނދަރު ފުންކުރުމުގެ މަސައްކަތުގެ 22 އިންސައްތަ ނިމިފައިވާކަމަށެވެ.
މި މަޝްރޫޢުގެ ދަށުން، 22,240 ކިއުބިކް މީޓަރުގެ ބިން ހިއްކުމާއި، 8,640 ކިއުބިކް މީޓަރުގެ ބަނދަރު ފުންކުރުމާއި، 160 މީޓަރުގެ ސައަރަޙައްދެއްގައި އެއްގަމު ތޮށި ލުމާއި، 68.90 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި 3,200 އަކަ މީޓަރުގެ ޕޭވްމެންޓް އަޅާނެއެވެ. މި މަޝްރޫޢުއަކީ 52.95 މިލިއަން ރުފިޔާގެ މަޝްރޫއެކެވެ.
