ރާއްޖޭގެ އައު އަހަރުގެ ފުޓްބޯޅަ ސީޒަން ފަށަން ކުލަބުތަކުން މިހާރު ވަނީ ތައްޔާރުވާން ފަށައިފަ އެވެ. ނަމަވެސް ޕްރެކްޓިސް މާހައުލުން ފެންނަނީ މާޔޫސްކަމެވެ.
މާލޭގައި ކުލަބުތަކުން ފަރިތަކުރަން އާއްމުކޮށް ލިބެނީ ޓާފް އެއް ނަންބަރު ދަނޑާއި ދެ ނަންބަރު ދަނޑެވެ. މީގެ ތެރެއިން އިސްކަންދަރު ކޮށި ކުރިމަތީގައި އޮތް ޓާފް ދެ ނަންބަރު ދަނޑުގެ އަމީނީ މަގާވީކޮޅުގެ ގޯލް އެއްގޮތަކަށް ވެސް ބޭނުމެއް ނުކުރެވެ އެވެ. ގޯލް ކުރިމަތީގައި އޮތީ ބޮޑު ސިންގާ ވަޅުގަނޑަކާއި އެއަށްވުރެ ކުޑަ ވަޅެއް ހެދިފަ އެވެ. މި ގޯލް ކުރިމަތި ބޭނުން ނުކުރެވޭތީވެ އެ ދަނޑުގައި ފަރިތަކުރަމުންދިޔަ ބުރު ސްޕޯޓްސް ކުލަބުން ބައި ބަހާލައިގެން ކުޅުނުއިރު ވެސް ގޯލް ހުރި ހިސާބު ބޭނުމެއް ނުކުރެ އެވެ. އަދި ފަހުން އެތަނަށް ކީޕަރު ޕްރެކްޓިސް ކުރަން އައި އަންހެން ޓީމެއްގެ ކީޕަރުން ފަރިތަކުރަމުންދިޔައީ ވެސް ދަނޑުގެ އަރިމަތީގައި މިނީ ގޯލެއް ބަހައްޓައިގެންނެވެ.
މީގެ އިތުރުން ޕްރެކްޓިސް ދަނޑުތަކުގެ އަލިމަޑުވުމާއި ގޯލް ދާގަނޑުތަކުގައި ވަރަށް ބޮޑަށް ވަރަށް ބޮޑަށް ބާވެ، ވީދި، ހަލާކުވެފައި ހުއްޓެވެ. މީގެ އިތުރުން ދަނޑުމަތީގައި ބުޅާ ގުއި ހުރުމާއި ދަނޑު ވަށައިގެން ކުނި ބަހައްޓާފައި ހުރުމުން ކުޅުންތެރިންނާއި އޮފިޝަލުން އެކަމުގެ އުނދަގޫތައް އުފުލަން ޖެހުނެވެ.
ހަތް މަސް ދުވަހު ނުކުޅެ ތިބުމަށްފަހު އައު އަހަރުގެ ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕަށް ހަތަރު ޓީމަކުން ތައްޔާރުވާން ފަށާފައިވާއިރު މިފަދަ ކަންކަން މެދުވެރިވުމުން އާއްމުންގެ ފާޑުކިއުންތައް ވެސް ވަނީ ކުޅިވަރުތައް ރާވައި ހިންގާ ފަރާތްތަކަށް އަމާޒުވެފަ އެވެ.
ފީފާ ގޯލް ޕްރޮޖެކްޓްގެ ދަށުން 2004 ވަނަ އަހަރު އަދި އޭގެ ހަތަރު އަހަރު ފަހުން ހެދި މި ދެ ދަނޑު މަރާމާތު ކުރަނީ ވަރަށް މަދުންނެވެ.
