މަދު މެންބަރުންކޮޅެއް ސަރުކާރާ ދެކޮޅަށް މަސައްކަތް ކުރި ނަމަވެސް މަސައްކަތަށް މަޑު ޖެހުމެއް ނާންނާނެ: މިއުވާން
ރައީސް މަސައްކަތް ކުރައްވަނީ ރައްޔިތުންނަށް ވެފައިވާ ވައުދުތައް ފުއްދުމަށް
ރައީސް އޮފީހުގެ ތަރުޖަމާނު މިއުވާން މުހައްމަދު
ރައްޔިތުން މަޖިލީހުގެ އެމްޑީޕީއަށް ނިސްބަތްވާ މަދު މެމްބަރުންކޮޅެއް ސަރުކާރުގެ މަސައްކަތްތަކަށް ހުރަސް އެޅުމަށް މަސައްކަތް ކުރި ނަމަވެސް ސަރުކާރުން ކުރަމުންދާ މަސައްކަތްތަކަށް މަޑު ޖެހުމެއް ނާންނާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ ރައްޔިތުން މަޖިލީހުގެ މެޖޯރިޓީ އޮތީ ސަރުކާރަށް ކަމަށާއި، މަޖިލީހުގެ އެއްބާރުލުމާއެކު ސަރުކާރުން މަސައްކަތް ކުރަމުންދާ ކަމަށެވެ. މަޖިލީހުގެ މަދު މެމްބަރުންކޮޅެއް ސަރުކާރުގެ މަސައްކަތްތަކަށް ހުރަސް އެޅުމަށް މަސައްކަތް ކުރި ނަމަވެސް ސަރުކާރުން ކުރަމުންދާ މަސައްކަތަށް މަޑު ޖެހުމެއް ނާންނާނެ ކަމަށާއި، މާ ބޮޑު އަސަރެއް ނުކުރާނެ ކަމަށް މިއުވާން ވިދާޅުވިއެވެ.
މިއުވާން ވިދާޅުވީ ރައީސް މަސައްކަތް ކުރައްވަނީ ރައްޔިތުންނަށް ވެފައިވާ ވައުދުތައް ފުއްދުމަށް ކަމަށާއި، އެމަސައްކަތް ސަރުކާރުން ކުރަމުންދާނެ ކަމަށެވެ.
މީގެ އިތުރުން މިއުވާން ވިދާޅުވީ މިހާރު ކުރިއަށް ގެންދާ ކެމްޕޭންތަކުގައި ވެސް ބައެއް އެމްޑީޕީގެ މެމްބަރުންގެ ބައިވެރިވުން ނުފެންނަ ކަމަށެވެ. ނަމަވެސް އިންތިޚާބުގައި ވާދަކުރަނީ އެމްޑީޕީގެ މެމްބަރެއް ކަމަށް ވިދާޅުވިއެވެ. މިއުވާން އެ އިޝާރާތް ކުރެއްވީ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި އިލެކްޝަނުގެ ކެމްޕޭނަށެވެ.
ސަރުކާރާއި ދެކޮޅަށް އެމްޑީޕީގެ ބައެއް މެމްބަރުން މަސައްކަތް ކުރައްވަމުން ގެންދަވާއިރު، ގަރާރުތައް ހުށަހަޅާއިރު ޕީޖީ ގްރޫޕަށް ހުށަހެޅުމަކާއި ނުލާ މަޖިލީހަަށް ހުށަހެޅުމަކީ ދެރަ ކަމެއް ކަމަށާއި، އެކަމުގެ ސަބަބުން އެ މެމްބަރުންގެ ނަޒާހަތްތެރިކަމާއި މެދު ސުވާލު އުފެދޭ ކަމަށް އެމްޑީޕީގެ ޕީޖީ ގްރޫޕްގެ ލީޑަރ މުހައްމަދު އަސްލަމް ވެސް ވިދާޅުވެފައިވެއެވެ.
ފިކުރެއްގެ ދިރުމުގެ ނަމުގައި މަސައްކަތް ކުރާ އެމްޑީޕީގެ ސްލޮޓްތަކުގައި ތިބި މެންބަރުން ކޮމިޓީތަކުން ވަކިކުރުމުގެ ކުރިން މެންބަރުންނާއި ވަކިވަކިން ބައްދަލުކުރަން އެމްޑީޕީގެ ޕީޖީ ގްރޫޕުން ވަނީ ނިންމާފައެވެ. އަސްލަމް ވިދާޅުވީ ޕާލިމެންޓްރީ ގްރޫޕްގެ މެމްބަރުން ނަމަ އެ ގްރޫޕެއްގެ މެމްބަރުން އަމަލުކުރަން ޖެހޭނީ ޕީޖީގެ އެތެރޭގެ އުސޫލުތަކާއި އެއްގޮތަށް ކަމަށް ޤަބޫލުކުރައްވާ ކަމަށެވެ. ފިކުރެއްގެ ދިރުމުގެ ނަމުގައި މަސައްކަތް ކުރާ މެމްބަރުން ޕީޖީ ގްރޫޕްގެ ނިންމުންތަކާއި އުސޫލުތަކަށް އަމަލު ނުކުރުމަކީ ވަރަށް އުނދަނގޫ ކަމެއް ކަމެއް ކަމަށް ވެސް އަސްލަމް ވިދާޅުވިއެވެ. އަދި ގިނަ މެމްބަރުން ބޭނުންވަނީ އަވަހަށް ފިޔަވަޅު އަޅަން ކަމަށާއި، ފިކުރެއްގެ ދިރުމުގައި ހަރަކާތްތެރިވާ މެމްބަރުންނާއި ވާހަކަދައްކާ މެމްބަރުން ފާހަގަކުރާ ކަންކަމަކީ ކޮބާތޯ ބެލުން މުހިންމު ކަމަށް އަސްލަމް ވިދާޅުވިއެވެ.
އެމްޑީޕީގެ އެތެރޭގެ ރިޔާސީ ޕްރައިމަރީ ރައީސް ސޯލިހު ކާމިޔާބު ކުރެއްވި ފަހުން އެ ޕްރައިމަރީގައި ނާކާމިޔާބުވި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނުން ނިންމާފައިވަނީ '' ފިކުރެއްގެ ދިރުން'' ނަމުގައި ވަކިން މަސައްކަތް ކުރުމަށެވެ.
