ސަރުކާރުން މަސައްކަތް ކުރަމުންދާނީ އިންތިޤާލީ މަރުޙަލާގެ ކަންކަން ވިލަރެސްކުރާ ކޮމިޓީގެ ރޫހާއި އެއްގޮތަށްކަމަށް ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވެއްޖެއެވެ.
މިއުވާން އެހެން ވިދާޅުވީ ދައުލަތުގެ ހިސާބުކިތާބާއި، ކުންފުނިތަކާއި މުއައްސަސާތަކުގެ ހިސާބުކިތާބަށް ބަައެއް ބަދަލު ގެނެސް، ކުރީގެ ތާރީހުތަކުގައި ރަސީދުތައް އުފެއްދުމާއި މިފަދަ ކަންތައްތައް ހިނގަމުންދާކަމަށް މައުލޫމާތު ލިބެމުންދާކަމަށް އިންތިޤާލީ ތަރުޖަމާނު ފިރުޒުލް އަބްދުﷲ ޚަލީލް ވިދާޅުވުމާއި ގުޅިގެންނެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ފިރުޒުލް ވިދާޅުވީ، އެ މައުލޫމާތުތަކުގެ ސައްޙަކަން ކަށަވަރު ކުރެވޭނީ ކޮމިޓީން ކުރަމުންދާ މަސައްކަތްތަކުގެ ދަށުން ގުޅުންހުރި އޮފީސްތަކާއި އިދާރާތަކަށް ޒިޔާރަތް ކުރުމުން ކަމަށެވެ.
އެހެންނަމަވެސް، އިންތިޤާލީ މަރުޙަލާއަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހާއި، ސަރުކާރުގެ ހުރިހާ އިދާރާއަކުންވެސް ފުރިހަމަ އެއްބާރުލުން ލިބެމުންދާކަން ފިރުޒުލްގެ ވާހަކައިގައި ފާހަގަ ކުރެއްވިއެވެ.
ޖުމުލަ ގޮތެއްގައި މި ވީހާތަނަށް އަޅުގަނޑުމެން ޝުކުރުވެރިކަމާއެކު ފާހަގަކުރަން ރައީސުލްޖުމްހޫރިއްޔާއާ ހަމައިން ފެށިގެން އަދި ހަމައެހެންމެ އެކި މުއައްސަސާތަކުން އަޅުގަނޑުމެންނަށް ހަމަ އެކަށީގެންވާ އެއްބާރުލުން ދެމުން ގެންދަވާކަންއިންތިޤާލީ ތަރުޖަމާނު ފިރުޒުލް އަބްދުﷲ ޚަލީލް
ސަރުކާރާމެދު ބައެއް ފަރާތްތަކުން އުފައްދަމުންގެންދާ ތުހުމަތުތަކާއި ގުޅޭގޮތުން ރާއްޖެއެމްވީއާ ވާހަކަ ދައްކަވަމުން މިއުވާން ވިދާޅުވީ، ސަރުކާރުން ޤާނޫނާ ޤަވާއިދާ ޚިލާފު އެއްވެސް ކަމެއް ނުކުރާނެކަމުގެ ޔަޤީންކަން ދެއްވާކަަމަށެވެ.
އަދި ސަރުކާރުން މަސައްކަތް ކުރަމުންދާނީ އިންތިޤާލީ މަރުޙަލާގެ ކަންކަން ވިލަރެސްކުރާ ކޮމިޓީގެ ރޫހާއި އެއްގޮތަށް، އައު ސަރުކާރަށް ފުރިހަމަ އެއްބާރުލުން ދީގެންކަމަށްވެސް މިއުވާން ވިދާޅުވިއެވެ.
