މަޖިލީހުގެ މަސައްކަތްތައް މަޑުޖެހޭތީ ސަރުކާރުން ކަންބޮޑުވުން ފާޅުކޮށްފި

ރައްޔިތުން މަޖިލީހުގެ މަސައްކަތްތައް މަޑުޖެހޭ ކަމަށާއި، އެކަމާއި ކަންބޮޑުވާ ކަމަށް ސަރުކާރުން ބުނެފިއެވެ.

މިމަހުގެ އެއްވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ، ރައްޔިތުން މަޖިލީހުގެ މަސައްކަތާއި ގުޅޭގޮތުން ސަރުކާރުގެ ކަންބޮޑުވުންތަކެއް އެބަހުރި ކަމަށާއި، ސަރުކާރުގެ ފަރާތުން ހުށަހަޅާފައިވާ މުހިންމު ބައެއް ބިލްތަކުގެ މަސައްކަތް މަޖިލީހުގައި މަޑުޖެހޭ ކަމަށެވެ. އެއީ ލެޖިސްލޭޓިވް އެޖެންޑާ ކުރިއަށް ގެންދިއުމުގައި ދިމާވާ ހުރަހެއް ކަމަށް މިއުވާން ވިދާޅުވިއެވެ.

އިގްތިސާދާ ގުޅުންހުރި މުހިންމު ބިލްތަކެއް ވެސް މަޑުޖެހިފައިވާކަން ފާހަގަކުރައްވައި މިއުވާން ވިދާޅުވީ އެކަމާއި ގުޅިގެން ވެސް އިގްތިސާދުގެ ވަޒީރު ވެސް ކަންބޮޑުވުންފާޅު ކުރައްވާފައިވާ ކަމަށެވެ. އަދި ވިދާޅުވީ ބިލްތަކުގެ އިތުރުން، ބައެއް ގާނޫނުތަކަށް އިސްލާހު ހުށަހެޅި، އެމަސައްކަތްތައް ކޮމެޓީގެ މަރުހަލާގައި އެބަހުރި ކަމަށާއި، އެ މަސައްކަތްތައް ކުރިއަށް ގެންދިއުމުގައި ލަސްވެފައިވާ ކަމަށެވެ.

މިއުވާން ވިދާޅުވީ މަޖިލީހުގެ މަސައްކަތްތައް ބާރަށް ކުރިއަށް ގެންދަން ޖެހޭ ކަމަށާއި، އެމައްސަލަ ހައްލު ކުރުމަށް ސަރުކާރުން މަސައްކަތް ކުރާނެ ކަމަށެވެ. އަދި ސަރުކާރުގެ ފަރާތުން ހުށަހަޅާފައިވާ ބިލްތަކުގެ ފައިދާ ގައުމަށާއި، ރައްޔިތުންނަށް ލިބެންޖެހޭ ކަމަށް މިއުވާން ވިދާޅުވިއެވެ.

މަޖިލީހުގެ މަސައްކަތްތައް މަޑުޖެހޭ ކަމަށް ސަރުކާރުން ބުނެފައިވާއިރު، މަޖިލީހުގެ މެޖޯރިޓީ ލިބިފައިވާ އެމްޑީޕީ މިހާރު ވަނީ ދެބަޔަކަށް ބެހިފައެވެ. މަޖިލީހުގެ ރައީސް މުހައްމަދު ނަޝީދަށް ވަފާތެރި މެމްބަރުން ގެންދަވަނީ ވަރަށް ބޮޑަށް ސަރުކާރަށް ފާޑު ވިދާޅުވަމުންނެވެ. އަދި ނަޝީދު އިސްވެ ހުންނަވާ "ދަ ޑިމޮކްރެޓްސް" ނަމުގައި ސިޔާސީ ޕާޓީއެއް އުފެއްދެވުމުގެ މަސައްކަތް ދަނީ ކުރައްވަމުންނެވެ. ދަ ޑިމޮކްރެޓްސް ޕާޓީ އަކީ، އެމްޑީޕީގެ ތެރެއިން، އެ ޕާޓީގެ ނިންމުންތަކާ ދެކޮޅަށް ޕާޓީގެ ރައީސް ނަޝީދު އިސްވެ ހުންނަވައިގެން އުފެއްދެވި "ފިކުރެއްގެ ދިރުން" މިހަރަކާތުގެ ބައިވެރިން އުފައްދަން ނިންމި ޕާޓީއެކެވެ.