އިސްތިއުފާ ދެއްވައިގެންވެސް މަޖިލީސް ހިނގަންޖެހޭ: ސަރުކާރު
އަންގާރަ ދުވަހާއި ބުދަ ދުވަހުގެ މަޖިލިސް ޖަލްސާ ކުރިއަށްގެންގޮސްފައެއް ނުވޭ
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން އިސްތިއުފާދެއްވައިގެންވިޔަސް މަޖިލިސް ނުހުއްޓި ކުރިއަށްދާންޖެހޭ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުރާސްފަތި ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ރާއްޖެޓީވީން ދެންނެވި ސުވާލަށް ޖަވާބުދެއްވަމުން މިއުވާން ވިދާޅުވީ ރައީސް ނަޝީދު ބޭނުންފުޅުވެވަޑައިގަންނަވާނަމަ މަޖިލީހުގެ ޖަލްސާތައް ކުރިއަށްގެންދެވޭނެކަން މިއަދު ސާފުވެފައިވާކަމަށެވެ. އެމަނިކުފާނު ބޭނުންފުޅުނަމަ އަންގާރަ ދުވަހާއި ބުދަ ދުވަހުގެ ޖަލްސާވެސް ބޭއްވުނީސް ކަން ފާހަގަކުރައްވައި މިއުވާން ވިދާޅުވީ މަޖިލީހުގެ ރައީސް އިސްތިއުފާ ދެއްވައިގެންވިޔަސް މަޖިލިސް ކުރިއަށްދާން ޖެހޭނެ ކަމަށެވެ.
ޑިމޮކްރެޓިކް ރިޔާސީ ނިޒާމެއް ހިނގާ ގައުމެއްގައި ގާނޫނު ހަދާ މަޖިލިސް ހުއްޓިފައި އޮވެގެން ނުވާނެ ކަމަށާއި، މިއީ ގާނޫނު އަސާސީއާވެސް ޚިލާފު ކަމެއް ކަމަށް މިއުވާން ވިދާޅުވިއެވެ.
މަޖިލިސް ހުއްޓިފައި އޮތުމުގެ ސަބަބުން ސަރުކާރަށްވުރެ ބޮޑަށް އޭގެ ގެއްލުންވަނީ ރައްޔިތުންނަށް ކަމަށާއި، ސިޔާސީ ސަބަބުތަކަށްޓަކައި ސިޔާސީ މަންފާތަކެއް ހޯދަން މަޖިލިސް ހުއްޓުވާފައި ބޭއްވުމުގެ ގެއްލުން ލިބެނީ ދިވެހި ރައްޔިތުންނަށްކަން މިއުވާން ފާހަގަކުރެއްވިއެވެ.
ރައްޔިތުންގެ މަޖިލީހުގެ ރައީސް އަދި ނާއިބުރައީސް އީވާ އަބްދުﷲގެ އިތުބާރު ނެތްކަމުގެ މައްސަލައެއް ރައްޔިތުންގެ މަޖިލީހަށް ވައްދާފައިވާއިރު، ކޮންމެވެސް އެއް މައްސަލައެއް ނުނަންގަވާނަމަ މަޖިލިސް ކުރިއަށް ނުގެންދަވާނެކަމަށް މަޖިލީހުގެ ރައީސް ނަޝީދު ވަނީ ވިދާޅުވެފައެވެ، އެހެންނަމަވެސް އޭގެން މައްސަލައެއް ނުނަންގަވަނީސް ބުރާސްފަތި ދުވަހު މަޖިލިސް ޖަލްސާއެއް ބާއްވާފައިވެއެވެ. އަދި މަޖިލިސް ވަނީ ޗުއްޓީއަށް ވަޑައިގެންފައެވެ.
މަޖިލިސް ޗުއްޓީއަށް ގޮސްފައިވާއިރު ސަރުކާރުގެ ފަރާތުން ވަނީ މުހިންމު ބިލުތަކެއް މަޖިލީހަށް ހުށަހަޅާފައެވެ. މީގެ ތެރޭގައި ޖޭއެސްސީ އިސްލާހުކުރުމުގެ ބިލްފަދަ މުހިންމު ބިލުތަކެއް ފާހަގަކުރެވެއެވެ.
