އިސްރާއީލު ސިފައިން ޖެހިޖެހިގެން ދެވަނަ ރޭ އަލް އަޤްސާ މިސްކިތުގައި އަޅުކަން ކުރަން ތިބި މީހުންނަށް އަމާޒުކޮށް ހަމަލާދީފިއެވެ.
ފަތިސްވުމުގެ ކުރިން އިސްރާއީލުގެ ހަތިޔާރު އެޅި ސިފައިން އަގްޞާ މިސްކިތުގެ ހަރިންމަތެރެއަށް ވަދެގަނެ މިސްކިތް ހުސްކުރުމަށް މަސައްކަތްކުރާ މަންޒަރު ވީޑިއޯތަކުން ފެނެއެވެ. އަދި ހަތިޔާރު އެޅި ސިފައިން ވަނީ ނަމާދަށް ތިބި މީހުންނަށް އަމާޒުކޮށް ރަބަރު އުންޑައާއި ގްރެނޭޑްސް ބޭނުންކޮށްފައެވެ.
ފަލަސްތީނުގެ ރެޑް ކްރެސެންޓުން މައުލޫމާތު ދޭ ގޮތުގައި ބުދަ ދުވަހުގެ ރޭ އަލް އަގްސާ މިސްކިތަށް ވަދެ ހިންގި ހަމަނުޖެހުންތަކުގައި މަދުވެގެން 6 މީހުންނަށް އެކި ވަރުގެ އަނިޔާވަނީ ވެފައެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި އަގްޞާ މިސްކިތުގައި އަޅުކަމުގައި ތިބި 350 މީހުން ވަނީ މިސްކިތުން ބޭރުކޮށްފައެވެ.
އިސްރާއީލުން އަލް އަގްސާ މިސްކިތުގައި އަޅުކަން ކުރަން ތިބި މީހުންނަށް އަމާޒުކޮށް ދޭ ހަމަލާތަކާއި ގުޅިގެން އދ ށް ފަލަސްތީނުން ކަނޑައަޅުއްވާފައި ހުންނަވާ މަންދޫބު ރިޔާޒް މަންސޫރު ވަނީ އަޅުކަން ހުއްޓުވާ އަޅުކަން ކުރުމަށް ހުރަސްއެޅުމުގެ އެއްވެސް ހައްގެއް އިސްރާއީލަށް ލިބިގެންނުވާކަމަށް ވިދާޅުވެ އެއަމަލު ކުށްވެރިކުރައްވާފައެވެ. އަދި އަލް އަގްސާ މިސްކިތުގައި ފަލަސްތީނުގެ މުސްލިމުންނަށް އަޅުކަން ކުރުމުގެ ހައްގު ލިބިދޭކަމަށް ވިދާޅުވިއެވެ. އަޅުކަންކުރަންވީ ތަންތަނާއި ނުކުރަންވީ ތަންތަން އިސްރާއީލަށް ނުބުނެވޭނެކަމަށް ރިޔާޒު ވިދާޅުވިއެވެ.
އިސްރާއީލުން އަލް އަގްސާ މިސްކިތުގައި އަޅުކަން ކުރަން ތިބި މީހުންނަށް އަމާޒުކޮށް ހަމަލާދީ އެމީހުން މިސްކިތުން ނެރޭ މައްސަލައިގައި ފަލަސްތީނާއި އިސްރާއީލުގެ މައްސަލަ އިތުރަށް ހޫނުވެގެންދާނެކަމަށް ފަލަސްތީނުން އަންނަނީ ބުނަމުންނެވެ. އަދި ފަލަސްތީނުގައި ހަރަކާތްތެރިވާ ހަނގުރާމަވެރި ޖަމާއަތްތަކުން ވަނީ އަލް އަގްސާ މިސްކިތުގައި ނަމާދުކުރާ މީހުން ހިމާޔަތްކުރާނެކަމަށް ބުނެފައެވެ.
