އުފަން ސޫރިޔާގައި ރެފިއުޖީއެއް، ޖަރުމަނުގައި މޭޔަރެއް!
6 އެޕްރީލު 2023 | ބުރާސްފަތި 06:04ޢުމުރުން 29 އަހަރުގެ ރައްޔާން އަލްޝިބްލް، ސޫރިޔާގެ ދޫކޮށް ރެފިއުޖީއެއްގެ ގޮތުގައި ހިޖުރަ ކުރީ 2015 ވަނަ އަހަރު
ޢުމުރުން އެންމެ 21 އަހަރުގައި، ރައްޔާން އަލްޝަބްލް، ރެފިއުޖީއެއްގެ ގޮތުގައި ސޫރިޔާ ދޫކޮށް އެ ޤައުމުން ފޭބީ، ހަނގުރާމައިގެ ތެރޭގައި އަސްކަރިއްޔާއާ ގުޅެން ބޭނުން ނުވާތީ
ސޫރިޔާގެ ރައީސް ބައްޝާރު އަލް-އަސަދުގެ ވެރިކަމާ ދެކޮޅަށް އެ ޤައުމުގައި ފެށި މުޒާހަރާތައް، ހަނގުރާމައަކަށް ބަދަލުވެގެން ދިޔަ ގޮތުގެ ވާހަކައަކީ އާ ވާހަކައަކަށް ނުވާނެއެވެ. ސޫރިޔާގައި ދިގުލާ ގޮސްފައިވާ ހަނގުރާމައަކީ މި ފަހުގެ ތާރީޚުގައި ދުނިޔެ ދުށް، އެންމެ ގެއްލުން ބޮޑު ހަނގުރާމައެވެ. އެތައް ސަތޭކަ ހާސް ބައެއްގެ ފުރާނަ ގެއްލި ގޮސްފައި ވާ އިރު، އެތައް މިލިއަން ބައެއްގެ ގެދޮރު ގެއްލި، ރެފިއުޖީންނަށް ވިއެވެ.
ޢުމުރުން 29 އަހަރުގެ ރައްޔާން އަލްޝިބްލް، ސޫރިޔާގެ ދޫކޮށް ރެފިއުޖީއެއްގެ ގޮތުގައި ހިޖުރަ ކުރީ 2015 ވަނަ އަހަރުއެވެ. އޭނާ ވަޒަންވެރިވީ ޖަރުމަނުވިލާތުގައެވެ. މިއަދު އެއީ ޖަރުމަނުވުލާތުގެ ރަށްވެއްސެކެވެ. 8 އަހަރު ދުވަހަށް ވުރެވެސް ކުރު މުއްދަތެއްގެ ތެރޭގައި ރައްޔާން މިވަނީ، ޖަރުމަނުގެ ދެކުނުގެ އަށެއްގެ މޭޔަރުކަންވެސް ހޯދާފައެވެ. މިއަދު އޭނާއަކީ ވޯޓު ދިނުމުގެ ޙައްޤު ލިބިގެންވާ 1900 އެއްހާ މީހުންގެ މައްޗަށް އެކުލެވޭ އޯސްޓެލްހައިމް އަވަށުގެ މޭޔަރެވެ. ރައްޔާންއަކީ ގްރީން ޕާޓީގެ މެންބަރެއް ނަމަވެސް، މޭޔަރަކު ހޮވުމަށް، އާދީއްތަ ދުވަހު ކުރިއަށް ގެންދިޔަ އިންތިޚާބުގައި އޭނާ ވާދަ ކުރީ އަމިއްލަ ކެންޑިޑޭޓެއްގެ ގޮތުގައެވެ.
އޯސްޓެލްހައިމް އަވަށުގެ މޭޔަރުކަން ރައްޔާން ކަށަވަރު ކުރީ، ވޯޓު ދިން މީހުންގެ 55.41 ޕަސެންޓް ހޯދައިގެންނެވެ.
މިހާރުވެސް އިދާރީ ދާއިރާގައި މަސައްކަތް ކުރަމުންދާ ރައްޔާން، މޭޔަރު ކަމުގެ ހުވާ ކުރަން ތާވަލު ކޮށްފައި ވަނީ ޖޫން 18 ވަނަ ދުވަހަށެވެ. އެނާގެ މޭޔަރު ކަމުގެ ދައުރަކީ 8 އަހަރު ދުވަހުގެ މުއްދަތަކެވެ. ރައްޔާން ބުނާ ގޮތުގައި އޭނާ ކުރަންޖެހޭ ބައިވަރު ކަންތައްތަކެއް އެބަހުއްޓެވެ.
ސޫރިޔާއަށް އުފަން ރައްޔާންއަކީ އޭނާގެ އަމިއްލަ ފަސްގަނޑުގައި މިއަދު ރެފިއުޖީއެއް ނަމަވެސް، ޖަރުމަނުގެ އަވަށެއްގެ މޭޔަރެއްގެ ގޮތުގައި މިއަދު އޭނާއަށް ތަޢުރީފު އޮހެނީއެވެ.
ޢުމުރުން އެންމެ 21 އަހަރުގައި، ރައްޔާން އަލްޝަބްލް، ރެފިއުޖީއެއްގެ ގޮތުގައި ސޫރިޔާ ދޫކޮށް އެ ޤައުމުން ފޭބީ، ހަނގުރާމައިގެ ތެރޭގައި އަސްކަރިއްޔާއާ ގުޅެން ބޭނުން ނުވާތީއެވެ. 2015 ވަނަ އަހަރަކީ އެތައް ސަތޭކަ ހާސް ރެފިއުޖީންނެއް، ޖަރުމަނުވިލާތަށް ދަތުރު ކުރި އަހަރެކެވެ. އޭގެ ތެރޭގައި ގިނައީ ސޫރިޔާގެ ހަނގުރާމައިން ސަލާމަތްވުމުގެ ބޭނުމުގައި ޖަރުމަނުވިލާތަށް ހިޖުރަ ކުރި މީހުންނެވެ.
މެޑިޓަރޭނިއަން ކަނޑު ހުރަސްކޮށް، ޖަރުމަނުވިލާތަށް އެތެރެވި ރައްޔާން ވަނީ، ޖަރުމަނު ބަސް ދަސްކޮށް، އިދާރީ ދާއިރާގައި މަސައްކަތް ކުރުމާ ގުޅޭ ތަމްރީނު ޕްރޮގްރާމެއްވެސް ފުރިހަމަ ކޮށްފައެވެ. ޖަރުމަނުވިލާތުގެ ރަށްވެހިކަން ހޯދުމަށްފަހު، އޭނާ މަސައްކަތް ކުރީ ލޯކަލް ކައުންސިލްގައެވެ.
