ތ.ތިމަރަފުށީގެ މަގުހެދުމުގެ މަސައްކަތުގެ ތެރެއިން %50 މަސައްކަތް ނިމިއްޖެ - އަސްލަމް
އެ މަޝްރޫއުގެ ދަށުން 4000 މީޓަރުގެ މަގު އަޅަން ހަމަޖެހިފައިވޭ
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އަލްފާޟިލް މުޙައްމަދު އަސްލަމް
ތ.ތިމަރަފުށީގެ މަގު ހެދުމުގެ މަސައްކަތުގެ ތެރެއިން 50% މަސައްކަތް ނިމިފައިވާ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރު އެފަދައިން ވިދާޅުވީ ތިމަރަފުށި ދާއިރާގެ މެންބަރު ޢަބްދުﷲ ރިޔާޟް، އާ ކުރައްވާ ސުވާލަށް ޖަވާބުދެއްވަމުންނެވެ. މިނިސްޓަރާއި ރިޔާޒް ކުރައްވާފައިވާ ސުވާލަކީ ތ.ތިމަރަފުށީގެ މަގު ހެދުމުގެ މަޝްރޫޢު ނުނިމި، މަޝްރޫޢު ނިންމަން ޖެހޭ ތާރީހު ދެ ފަހަރަށް ފަހަނަ އަޅާ ގޮސްފައިވާތީ، އަދި މަޝްރޫޢު ނިމުމުގެ ކޮޅުމަތި ނުފެންނާތީ، މަޝްރޫޢު ނިމޭނެ ތާރީހެއް ސާފުކުރުމަށް ކޮށްފައިވާ ސުވާލެކެވެ.
މިނިސްޓަރު ވިދާޅުވީ އެ މަޝްރޫއުގެ ދަށުން 4000 މީޓަރުގެ މަގު އަޅަން ހަމަޖެހިފައިވާ ކަމަށާއި އޭގެ ތެރެއިން އެންމެ ދިގު މަގަކީ އެއާޕޯޓައި ރަށާއި ދޭތެރޭގައި އަޅާ 1241 މީޓަރުގެ މަގު ކަމަށެވެ. އެ މަގު ހޯމަ ދުވަހު ހުޅުވާފައިވާ ކަމަށާއި އެހެން މަސައްކަތްތައް ވެސް ކުރިއަށްދާ ކަމަށް އަސްލަމް ވަނީ ވިދާޅުވެފައެވެ. 10 މޭއި އަށް މި މަސައްކަތް ނިިންމަން އޮތް ނަމަވެސް އެ މުއްދަތަށް މަސައްކަތް ނިމޭނެ ކަމަށް ލަފާނުކުރެވޭ ކަމަށް ވެސް އަސްލަމް ވިދާޅުވިއެވެ. އެއަށް ވުރެ ދުވަސް އިތުރުވާނެ ކަމަށް ބެލެވުނު ނަމަވެސް އެ މަސައްކަތަށް ދީފައިވާ މުއްދަތު އިތުރުކުރަން އެދިފައި ނުވާ ކަަމަށް މިނިސްޓަރު ވިދާޅުވިއެވެ.
އަދި ކޮންޓަރެކްޓަރ މަސައްކަތަށް ވަގުތު އިތުރުކޮށްދިނުމަށް ނޭދެނީސް އެކަމަށް އިތުރު މުއްދަތެއް ކަނޑައަޅާ އެ ވާހަކަ މިނިސްޓަރު ވިދާޅުވުމަކީ ރަނގަޅު ގޮތެއް ނޫން ކަމަށް އަސްލަމް ވިދާޅުވިއެވެ. މިނިސްޓަރު ވިދާޅުވީ އެންމެ ލަސްވެގެން މި އަހަރު ނިމެންވާ އިރަށް މި މަސައްކަތް ނިމެންވާނެ ކަމަށާއި އުންމީދަކީ އޮގަސްޓުގެ ނިޔަލަށް އެ މަސައްކަތް ނިމުން ކަމަށް މިނިސްޓަރު ވަނީ ވިދާޅުވެފައެވެ. މިނިސްޓަރު އަސްލަމްގެ ޖަވާބާއި ގުޅިގެން މެމްބގަރު ރިޔާޒް ވަނީ އެއާޕޯޓާއި ރަށާއި ދެމެދު އޮތް މަގު ހުޅުވާފައި ނުވާ ކަމަށް ވިދާޅުވެފައެވެ.
