ގިނަ ގޯސްތަކެއް ހެދުނު، ނަމަވެސް މޮޅުވެވުމުން އުފާވޭ: އިވާން

އައު ސީޒަން ފެށުމުގެ ގޮތުން ކުޅުނު ޗެރިޓީ ޝީލްޑު މެޗުގައި މާޒިޔާގެ ކުޅުންތެރިންނަށް ގިނަ ގޯސްތަކެއް ހެދުނު ކަމަށާއި، ނަމަވެސް އެ މެޗުން މޮޅުވެ ޝީލްޑު ކާމިޔާބު ކުރެވުމުން އުފާވާ ކަމަށް އެ ޓީމުގެ ކޯޗު އިވާން ވެންކޯވް ކޮލޭވް ބުނެފި އެވެ.

އީގަލްސްއާ ދެކޮޅަށް ކުޅެ 2-1 އިން މޮޅުވި މެޗަށްފަހު ވާހަކަ ދައްކަމުން އިވާން ބުނީ، ފުރަތަމަ ކަމަކަށް މުހިންމުވީ މެޗުން މޮޅުވުން ކަމަށާއި އެކަން ހާސިލް ކުރެވުމުން ޓީމުގެ ކުޅުންތެރިންނަށް މަރުޙަބާ ކިޔާ ކަމަށެވެ. އޭނާ ބުނީ ޖުމުލަކޮށް މެޗުގައި މާޒިޔާގެ ކުޅުންތެރިން ދެއްކީ ރަނގަޅު ކުޅުމެއް ކަމަށެވެ. ނަމަވެސް މެޗުގައި ގިނަ ގޯސްތަކެއް ހެދުނުކަން ވެސް އިވާން ވަނީ ފާހަގަކޮށްފަ އެވެ. ނަމަވެސް އޭނާ ބުނީ އެއީ އާދައިގެ ކަމެއް ކަމަށެވެ. ސަބަބަކީ ރާއްޖޭގައި ފުޓުބޯޅަ ނުކުޅޭތާ ހަތް މަސް ދުވަސް ވެފައިވާ ކަމަށާއި، އެހެންކަމުން އެއަށްފަހު އައިސް ދަނޑު މައްޗަށް އަރައި ކުޅުމަކީ އެހާ ފަސޭހަ ކަމަކަށް ނުވާނެ ކަމަށެވެ. އިވާން ބުނީ އެ މެޗުގައި މާޒިޔާގެ ހުރިހާ ކުޅުންތެރިން ވެސް އެމީހުންގެ އެންމެ މޮޅު ކުޅުން ދެއްކުމަށް މަސައްކަތް ކުރި ކަމަށެވެ.

މީގެ އިތުރުން އިވާން ބުނީ މެޗުގެ ނަތީޖާއާމެދު އޭނާ ހިތްހަމަޖެހޭ ކަމަށެވެ. އޭނާ ބުނީ އެ މެޗުގައި ވެސް މާޒިޔާ އަށް އެޓޭކުގައި މާ ރަނގަޅަށް ކުޅެވެންވާނެ ކަމަށާއި، ނަމަވެސް ފުރަތަމަ މެޗަށްވުމުން އެކިއެކި ކަންކަން ކުރިމަތިވި ކަމަށެވެ. އެކަން ފާހަގަކުރަމުން އޭނާ ބުނީ ކުރިއަށް ހުރި މެޗުތަކަށް ނިކުންނައިރު، އެކަން ރަނގަޅު ކުރާނެ ކަމަށެވެ. އިތުރަށް އޭނާ ބުނީ ކުރިއަށް އޮތް މުބާރާތަށް ތައްޔާރުވުމުގެ ގޮތުން މާޒިޔާ އިން ކުރަމުން އަންނަ މަސައްކަތް ކުރުމުގައި ކުރިއަށް ދާނެ ކަމަށެވެ.

މިއީ މިއަހަރުގެ ފެބްރުވަރީ މަހު މާޒިޔާގެ ކޯޗުކަމާ އިވާން ހަވާލުވި ފަހުން އެ ޓީމުން ކުޅުނު ރަސްމީ ފުރަތަމަ މެޗެވެ. އޭގެ ފަހުން މާޒިޔާ އިން ވަނީ ސައުދީ އަރަބިޔާގައި ކުރި ތަމްރީނު ކޭމްޕުގައި ރަހުމަތްތެރިކަމުގެ މެޗުތަކެއް ކުޅެފަ އެވެ. މިއަހަރުގެ ޝީލްޑް ކާމިޔާބު ކުރުމާއެކު މާޒިޔާ އިން ވަނީ ޖުމުލަ ފަސް އަހަރު ޝީލްޑް ކާމިޔާބުކޮށްފަ އެވެ. އެންމެ ގިނައިން ޝީލްޑު ކާމިޔާބުކޮށްފައިވަނީ ވެސް މާޒިޔާ އިންނެވެ. އެ ޓީމުން ވަނީ 2015، 2016، 2017، 2021 އަދި 2023 ވަނަ އަހަރު ޝީލްޑު ކާމިޔާބުކޮށްފަ އެވެ. މާޒިޔާ އަކީ އައު ސީޒަނަށް އެންމެ ފުރަތަމަ ތައްޔާރުވާން ވެސް ފެށި ކުލަބެވެ. އެގޮތުން އައު ސީޒަނަށް ތައްޔާރުވުމުގެ ގޮތުން މާޒިޔާ އިން ވަނީ ޓީމުގައި ތިބި މުހިންމު ކުޅުންތެރިންގެ އެއްބަސްވުން އައު ކުރުމަށްފަހު، އެހެން ކުލަބު ތަކުގައު ވެސް ތިބި މޮޅެތި ކުޅުންތެރިންގެ ސޮއި ހޯދައިފަ އެވެ.