ފައިސާ އެކައުންޓަށް ޖަމާކުރުމަށްފަހު އަނބުރާ ހޯދައިދިނުމުގެ ބާރެއް ބޭންކަކަށް ނޯވޭ: ބީއެމްއެލް
ސްކޭމް ކޯލްތަކަށް ސަމާލުވުމަށް ބީއެމްއެލްއިން އަބަދުވެސް އިލްތިމާސް ކުރޭ
ބީއެމްއެލްގެ ޕީއާރު ކޯޑިނޭޓަރު މަރިޔަމް ނުޒުހަތު
އެއް އެކައުންޓުން އަނެއް އެކައުންޓަށް ފައިސާ ޖަމާކުރުމަށްފަހު، ދެން އެ ފައިސާ އަނބުރާ ހޯދައިދިނުމުގެ ބާރެއް ބޭންކަކަށް ވެސް ނޯންނަ ކަމަށް ބީއެމްއެލްއިން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ބީއެމްއެލްގެ ޕީއާރު ކޯޑިނޭޓަރު މަރިޔަމް ނުޒުހަތު ވިދާޅުވީ ގާނޫނީ ގޮތުން ބަަލާއިރު ވެސް އެއް އެކައުންޓުން އަނެއް އެކައުންޓަށް ފައިސާ ޖަމާކުރާ ހިސާބުން އެ ފައިސާއަކީ އެ ފައިސާ ހުރި އެކައުންޓުގެ ވެރިފަރާތުގެ ފައިސާ ކަމަށެވެ. އެހެންކަމުން، އެ ފައިސާ އަނބުރާ އެ ޓްރާންސްފާ ކުރި ފަރާތަށް ހޯދައިދިނުމުގެ ބާރެއް ބޭންކަށް ނޯންނަ ކަމަށް އޭނާ ވިދާޅުވިއެވެ.
ނުޒުހަތު ވިދާޅުވީ ރޯދަ މަހު ވަރަށް ގިނައިން ޕްރޮމޯޝަނަލް ލިންކުތައް ލިބޭ ކަމަށާއި އެކި ކަހަލަ ލިންކުތައް ބޭނުންކޮށްގެން މައުލޫމާތު ހޯދަން މަސައްކަތް ކުރާ ކަމަށެވެ. އެ ކަމަށް ސަމާލުވާން ޖެހޭކަން ފާހަގަކުރައްވަމުން އޭނާ ވިދާޅުވީ ފައިސާ ގެއްލުމުން ދެން ޖެހޭނީ ކަމާބެހޭ އިދާރާތަކަށް ހުށަހަޅައިގެން އެ މައްސަލަ ބަލަން ކަމަށެވެ.
އިތުރަށް ނުޒުހަތު ވިދާޅުވީ ގާތް ރައްޓެއްސެއްގެ ނަމުގައި ސްކޭމް ކޯލްތައް ކުރުމުން ވެސް، އެ މީހާގެ ގާތުގައި އެއީ ކާކުތޯ އަހާލުމަށް ގިނަ ބަޔަކު ޖެހިލުންވާ ކަމަށެވެ. އެހެން ނަމަވެސް، ސޯޝަލް މީޑިއާގެ އެކި ޕްލެޓްފޯމްތަކުން މައުލޫމާތު ހޯދައިގެން ގުޅާ ކަމަށް ވެސް އޭނާ ވިދާޅުވިއެވެ. އަދި ޖެހިލުންވުމުގެ ބަދަލުގައި އެ މީހާއަކީ ރަނގަޅު މީހެއްތޯ ޔަގީންކުރުން މުހިންމުކަމުގައި އޭނާ ވިދާޅުވިއެވެ.
