ޗައިނާގެ ސްޕައި ބެލޫނުން އެމެރިކާގެ މިލިޓަރީ ސައިޓްތަކުން އިންޓެލިޖަންސް މައުލޫމާތު އެއްކޮށް، ޓްރާންސްމިޓްކޮށްފައިވޭ
3 އެޕްރީލު 2023 | ހޯމަ 16:56ޗައިނާގެ ސްޕައި ބެލޫނުގެ ސަބަބުން އެމެރިކާގެ ނެޝަނަލް ސެކިއުރިޓީއަށް މާބޮޑު އަސަރެއް ކުރާނެކަމަށް ނުބެލެވޭކަމަށް އޭރު އެމެރިކާއިން ބުނެފައިވޭ
އެމެރިކާ މަތިން ދޫކޮށްފައިވާ ޗައިނާގެ ސްޕައި ބެލޫން
މިދިޔަ ފެބްރުއަރީ މަހު އެމެރިކާގެ އެތައް ސްޓޭޓެއްގެ މަތިން ދޫކޮށްފައި ހުއްޓައި ފެނުނު ޗައިނާގެ ސްޕައި ބެލޫންގެ ވާހަކަ ހިނދިގެން ދާގޮތެއް ނުވިއެވެ. މިހާރު އެންބީސީ ނިއުސްއިން މިވަނީ ޗައިނާގެ ސްޕައި ބެލޫން އެމެރިކާގެ އެތައް މިލިޓަރީ ސައިޓްތަކަކުން އިންޓެލިޖެންސް މައުލޫމާތު އެއްކޮށް، ރިއަލް-ޓައިމްކޮށް ޗައިނާއަށް ޓްރާންސްމިޓްކޮށްފައި ވާކަމަށް ބުނެފައެވެ.
ޗައިނާއިން އޭރު ބުނެފައިވަނީ އެ ބެލޫނަކީ މޫސުން ބެލުމަށް ދޫކޮށްފައިވާ އެއްޗެއް ކަމަށާއި، އެމެރިކާގެ ސަރަހައްދަށް ވަދެފައިވަނީ ވައިގަދަވެ މިސްރާބު އޮޅިގެން ކަމުގައެވެ.
އެމެރިކާގެ އެންމެ އިރުމަތީ ސަރަހައްދުގެ މަތިން ފެނުނު އެފަދަ ބޮޑު ބެލޫއެއް ވައްޓާލުމަށް ރައީސް ޖޯ ބައިޑަން ފެބްރުއަރީ 4 ވަނަ ދުވަހު އޯޑަރު ކުރެއްވިއެވެ. އެއާއެކު މަދަނީ ބޭނުމަކަށް ދޫކޮށްފައި ހުރި އެއަރޝިޕެއް، ބާރުގެ ބޭނުންކޮށްގެން ވައްޓާލުމުން އެކަމުގެ ރައްދު ދޭނެކަމަށް ބުނެ، ޗައިނާއިން ވަނީ ރުޅިވެރި ބަސްތައް ބޭނުންކޮށްފައެވެ.
އެންބީސީ ނިއުސް ރިޕޯޓް ބުނާގޮތުން, ވަރަށް އުސްމިނުގައި ދަތުރުކުރާގޮތަށް ދޫކޮށް ބޭޖިންގުން ކޮންޓްރޯލް ކުރަމުން ދިޔަ ބެލޫން ވައްޓާލުމުގެ ކުރިން ބައެއް މިލިޓަރީ ސައިޓްތައް މަތިން އެތައް ބުރެއް ޖަހާފައިވެއެވެ. އަދި ބެލޫން ބައެއް ފަހަރު، ހިސާބުގެ އަކުރު އަށެއް އަޅާގޮތަށްވެސް ދަތުރުކޮށްފައިވާކަމަށް، އެމެރިކާގެ އިސް ދެ އޮފިޝަލަކާ ހަވާލާ ދީ އެންބީސީގެ ރިޕޯޓްގައި ބުނެފައިވެއެވެ. އަދި ބެލޫނުން އެއްކުރާ މައުލޫމާތު އަނބުރައި ބޭޖިންގަށް "ރިއަލް ޓައިމް" ކޮށް ޓްރާންސްމިޓް ކުރުމުގެ ގާބިލްކަން ބެލޫނަށް ލިބިގެންވާ ކަމަށްވެސް ރިޕޯޓްގައި ވެއެވެ.
މިކަމާބެހޭ ގޮތުން އެމެރިކާއާއި ޗައިނާއިންވެސް އަދި އެއްޗެއް ބުނެފައެއް ނުވެއެވެ.
އެމެރިކާގެ ސަރަހައްދުގެ މަތިން ދެން ސްޕައި ބެލޫން ދޫކޮށްގެން ނުވާނެކަމަށް ބުނެ އެމެރިކާއިން އިންޒާރު ދިންނަމަވެސް، އެކަމުން އެމެރިކާގެ ނެޝަނަލް ސެކިއުރިޓީއަށް މާބޮޑު އަސަރެއް ކުރާނެކަމަށް ނުބެލެވޭ ކަމަށް އޭރު އެމެރިކާއިން ބުނެފައިވެއެވެ.
