ސުންގަޑި ހަމަވިއިރު ކްރިމިނަލް ކޯޓުގެ އިސްގާޒީ ކަމަށް ކުރިމަތިލެއްވީ ގާޒީ އާދަމް މުޙައްމަދު
3 އެޕްރީލު 2023 | ހޯމަ 08:10ކްރިމިނަލް ކޯޓުގެ އިސް ގާޒީއަށް 49،300 ރުފިޔާގެ މުސާރައެއް ލިބޭނެ
ގާޒީ އާދަމް މުހައްމަދު
ކްރިމިނަލް ކޯޓުގެ އިސް ގާޒީގެ މަޤާމަށް އެ ކޯޓުގެ ހިންގުމާ ވަގުތީ ގޮތުން ޙަވާލުވެ ހުންނެވި ގާޒީ އާދަމް މުހައްމަދު ކުރިމަތިލައްވައިފިއެވެ.
އިސް ގާޒީ ކަމަށް ކުރިމަތިލެއްވޭނީ ކްރިމިނަލް ކޯޓުގައި މަސައްކަތް ކުރަމުންގެންދާ ފަނޑިޔާރުންނަށްކަން ފާހަގަކޮށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ވަނީ 3 އޭޕްރިލް 2023 ވަނަ ދުވަހުގެ މެންދުރު 12:00 ގެ ނިޔަލަށް އެ މަޤާމަށް ކުރިމަތިލުމަށް ހުޅުވާލާފައެވެ.
ރާއްޖެއެމްވީން ސުވާލުކުރުމުން ޖޭއެސްސީގެ މީޑިއާ އޮފިޝަލު ވިދާޅުވީ، ސުންގަޑި ހަމަވިއިރު އެ މަޤާމަށް ކުރިމަތިލައްވާފައިވަނީ އެ ކޯޓުގެ ގާޒީ އާދަމް މުހައްމަދު ކަމަށެވެ.
ކްރިމިނަލް ކޯޓުގެ އިސް ގާޒީއަށް 49،300 ރުފިޔާގެ މުސާރައެއް ލިބޭނެއެވެ.
އެ ކޯޓުގެ އިސްގާޒީ ކަމުގައި ކުރިން ހުންނެވީ އަހުމަދު ޝަކީލެވެ. ދާދި ފަހުން ޝަކީލް ވަނީ ހައިކޯޓުގެ ފަނޑިޔާރުކަމަށް އައްޔަނު ކުރައްވާފައެވެ.
