އުމްރާވެރިންގެ ރައްކާތެރިކަމަށް ސައުދީ ސަރުކާރުން ހަމަޖައްސަވާފައިވާ އިންތިޒާމްތަކާ އެއްގޮތަށް އަމަލުކުރުމަށް އިލްތިމާސްކޮށްފި
3 އެޕްރީލު 2023 | ހޯމަ 07:27ދުއްވާ އުޅަނދުތަކާއި ހިނގާބިގާވެ އުޅޭމީހުން ވަކިކުރުމުގެ އިންތިޒާމު ފުރަތަމަ ރިންގް ރޯޑުގައި ހަމަޖެހިފައިވޭ
ދިވެހި ހައްޖާޖީން މިނާގައި
އުމްރާވެރިންނަށް އުމްރާގެ ފަރުޟު އަދާކުރެވޭނެ މަގު ފަސޭހަކުރުމަށާއި، އުމްރާވެރިންގެ ސަލާމަތާއި ރައްކާތެރިކަމަށް ސައުދީ އަރަބިއްޔާގެ ސަރުކާރުން ހަމަޖައްސަވާފައިވާ އިންތިޒާމްތަކާ އެއްގޮތަށް ދިވެހި އުމްރާވެރިން އަމަލުކުރުމަށް އިސްލާމިކް މިނިސްޓްރީން އިލްތިމާސްކޮށްފިއެވެ.
1444 ވަނަ އަހަރުގެ ރަމަޟާން މަހު އުމްރާގެ އަޅުކަން އަދާކުރާ އުމްރާވެރިންނާއި، އުމްރާގެ އަޅުކަމަށް ރާއްޖެއިން މީހުން ގެންދާ ކުންފުނިތަކުން ޢަމަލުކުރަންޖެހޭ އިރުޝާދުތައް ބަޔާންކޮށް، ދިވެހިރާއްޖޭގެ މިނިސްޓްރީ އޮފް ފޮރިން އެފެއާޒު މެދުވެރިކޮށް ސައުދީ އަރަބިއްޔާގެ ފޮރިން މިނިސްޓްރީން 2023 މާރިޗު 22 ވަނަ ދުވަހު މިނިސްޓްރީއަށް ފޮނުވާފައިވާ ސާކިޔުލަރއާ ގުޅިގެން އިސްލާމިކް މިނިސްޓްރީން ބުނީ ގެފުޅަށް ޒިޔާރަތްކުރާ އެންމެހައި އުމްރާވެރިންނަށް އުމްރާގެ ފަރުޟު އަދާކުރެވޭނެ މަގު ފަސޭހަކުރުމަށާއި، ޢުމްރާވެރިންގެ ސަލާމަތާއި ރައްކާތެރިކަމަށް ސައުދީ އަރަބިއްޔާގެ ސަރުކާރުން ޚާއްސަ އިންތިޒާމްތަކެއް ހަމަޖައްސާފައިވާ ކަމަށެވެ. އެ އިންތިޒާމްތަކާ އެއްގޮތަށް އަދި ޙަރަމްފުޅުގެ މައިގަނޑު މަޤްސަދާ ވެސް އެއްގޮތަށް މާތް ﷲ އަށް އަޅުކަންކުރުމަށް ވަނީ ނަސޭހަތްތެރިވެފައެވެ. އަދި ދިވެހި އެންމެހައި އުމްރާވެރިންގެ އުސޫލުތަކާ އެއްގޮތަށް އަމަލުތައް ބެހެއްޓުމަށް މިނިސްޓްރީން ވަނީ އިލްތިމާސްކޮށްފައެވެ.
އިސްލާމިކް މިނިސްޓްރީން ބުނީ އުމްރާގެ އަޅުކަން އަދާކުރާ އެންމެހައި އުމްރާވެރިން ހަމަޖެހިފައިވާ އުސޫލުގެ ދަށުން "ތަވައްކަލްނާ" އަދި "ނުސުކް" އެޕްލިކޭޝަން މެދުވެރިކޮށް އެޕޮއިންޓްމެންޓް ހައްދަންޖެހޭ ކަމަށެވެ.
މިނިސްޓްރީން ބުނީ ގެފުޅުގެ ވަށައިގެން ތަވާފުކުރާ ސަރަޙައްދާއި، ފަހުދު ރަސްގެފާނު ދޮރާށިކޮޅާއި، އުމްރާ ދޮރާށިކޮޅާއި، ޢަބްދުލް ޢަޒީޒް ރަސްގެފާނު ދޮރާށިކޮޅާއި، އައްސަލާމް ދޮރާށިކޮޅާއި އަދި މަރުވާ ދޮރާށިކޮޅު އުމްރާކުރާ ފަރާތްތަކަށް ޚާއްސަ ކުރެވިފައިވާ ކަމަށެވެ. ޙަރަމްފުޅުގެ ފުރަތަމަ ފަންގިފިލާއާއި، ސައުދީ އަރަބިއްޔާގެ ރިޔާސަތުން ޙަރަމްފުޅު ބޮޑުކުރުމުގެ ތިންވަނަ މަޝްރޫޢުގެ ތެރެއިން އަލަށް ޢިމާރާތް ކުރެވިފައިވާ ތިންވަނަ ފަންގިފިލާއާއި، ޙަރަމްފުޅުގެ ބޭރުގައިވާ މިސްކިތުގެ ޚާއްސަ ސަރަޙައްދުތަކާއި، ޖަބަލުލް ކަޢުބާއާއި، އައްޝުބައިކާގެ މަގުތައް ނަމާދުކުރާ ފަރާތްތަކަށް ޚާއްސަ ކުރެވިފައިވާ ކަމަށެވެ. އަދި ގެފުޅަށް ޒިޔާރަތްކުރާ އާއްމު ފަރާތްތަކަށް ޢަބްދުލް ޢަޒީޒު ރަސްގެފާނު ދޮރާށިކޮޅާއި، އަލްމަރްވާ ދޮރާށިކޮޅުގެ ދެމެދު ޚާއްސަ ކުރެވިފައިވާ ކަމަށް މިނިސްޓްރީން ބުނެއެވެ.
ދުއްވާ އުޅަނދުތަކާއި ހިނގާބިގާވެ އުޅޭމީހުން ވަކިކުރުމުގެ އިންތިޒާމު ފުރަތަމަ ރިންގް ރޯޑު ގައި ހަމަޖެހިފައިވާ ކަމާއި، އުމްރާގެ އަޅުކަމުގެ ރޫޙާ ޚިލާފު ކަންކަން ހިނގާނަމަ، ކަމާއިބެހޭ ފަރާތްތަކުން އެ ކަންކަން ބަލައި ފިޔަވަޅު އަޅާނެ ކަމަށް އިސްލާމިކް މިނިސްޓްރީން ބުނެއެވެ.
