38 ޕްރެކްޓިސްކޮށްފިން، ޓީމު ރޫހު ރަނގަޅު: ސާންތީ

ފެބްރުއަރީ މެދުތެރޭގައި ޕްރެކްޓިސް ފަށައި، މާދަމާ ރޭ ކުޅޭ ޗެރިޓީ ޝީލްޑް މެޗުގެ ކުރިން 38 ޕްރެކްޓިސްކޮށް ޓީމު ރޫހު ރަނގަޅު ކުރެވިއްޖެކަމަށް، އީގަލްސްގެ ކޯޗު އިހުސާން އަބްދުލްޣަނީ (ސާންތީ) މިއަދު ބުނެފިއެވެ.

މެޗުގެ ކުރިން ބޭއްވި ޕްރެސް ކޮންފަރެންސްގައި ވާހަކަދައްކަމުން، ކުރިންވެސް އީގަލްސްއަށް ކޯޗުކޮށްދިން ސާންތީ ބުނީ، ދެތިން އަހަރަށްފަހު އެނބުރި ދިއުމުން "ތަފާތު އިހުސާސެއް" ކުރެވުނުކަމަށެވެ.

އީގަލްސްއަށް 2016 ވަނަ އަހަރުގެ ގައުމީ މުބާރާތް ކާމިޔާބުކޮށްދިން ކޯޗު ބުނީ، މެޗަށް ނުކުންނައިރު ހުރިހާ ޕްރެޝަރެއް އޮތީ މާޒިޔާއަށް ކަމަށެވެ. ސަބަބަކީ ވަރުގަދަ ޓީމެއް އޮވެ، ދުރާލައި ޕްރެކްޓިސް ފަށައި ކާމިޔާބީ ހޯދަން މާޒިޔާ ތައްޔާރުވެފައިވާ މިންވަރު ކަމަށެވެ.

ސާންތީ  މިސާލު ދެއްކީ ހޮނިހިރު ދުވަހު އިނގިރޭސި ޕްރެމިއާ ލީގުގައި މެންޗެސްޓާ ސިޓީ އަތުން ލިވަޕޫލް 4-1ން ބަލިވި މެޗަށް އިޝާރާތްކޮށްފައެވެ. ނަމަވެސް އޭނާ ބުނީ އީގަލްސްގެ ބައެއް ކުޅުންތެރިންނަށް ރިލީޒް ނުލިބޭ ކަމަށެވެ. ނަމަވެސް ކުރިން އެ ކުލަބަށް ކުޅުނު ކުޅުންތެރިންވެސް އެނބުރި ޓީމާ ގުޅި، އީގަލްސް އޮތީ މެޗަށް ތައްޔާރަށް ކަމަށެވެ.