ސްކޫލް ދަރިވަރުންގެ އާންމު ގަވާއިދު ނެރެފި
1 އެޕްރީލު 2023 | ހޮނިހިރު 02:08ދަރިވަރުން، ބެލެނިވެރިއެއްގެ ހުއްދަ ނެތި ރޭގަނޑު 10:00ގެ ފަހުން ބޭރުގައި އުޅުން މަނާވާނެ
ދަރިވަރުންތަކެއް
ދިވެހި ރާއްޖޭގެ ތައުލީމާބެހޭ ގާނޫނުގެ ދަށުން، "ސްކޫލް ދަރިވަރުންގެ އާންމު ގަވާއިދު" އެޑިއުކޭޝަން މިނިސްޓްރީން އެކުލަވާލައި، އާއްމުކޮށްފިއެވެ.
އެ މިނިސްޓްރީން ބުނެފައިވާގޮތުގައި؛ ސްކޫލްތަކަކީ ދަރިވަރުން ދިރިއުޅުމަށް ތައްޔާރުކޮށްދީ، އެ ދަރިވަރުންނަކީ މުޖުތަމައު ގަބޫލުކުރާ، އަޚުލާގެއްގެ ބަޔަކަށް ހެދުމުގެ ޒިންމާއާ ހަވާލުވެފައިވާ ތަނެކެވެ. އެހެންކަމުން ސްކޫލްތަކުގައި ދަރިވަރުން އުޅޭއިރު އެކުދިން އަމަލުކުރާނެ ގަވާއިދެއް އޮތުމާއި، ސްކޫލުން ބޭރުގައި ދަރިވަރުންގެ އުޅުން ބައްޓަންކުރާނެ މިންގަނޑުތަކެއް ކަނޑައެޅިފައި އޮތުން މުހިންމުކަމަށް އެމިނިސްޓްރީން ބުނެއެވެ.
މީގެ އިތުރުން، ސްކޫލް ކުދިންގެ އާއްމު ގަވާއިދެއް އެކުލަވާލާފައި ވަނީ ހުރިހާ ދަރިވަރުންގެ އަމަލުކުރާނެ މިންގަނޑެއް އެގެން އޮތުމަށް ކަމަށްވެސް އެޑިއުކޭޝަން މިނިސްޓްރީން ބުނެއެވެ.
އެ މިނިސްޓްރީން އާއްމުކޮށްފައިވާ ގަވާއިދުގައި ބުނެފައިވާގޮތުގައި؛ މި ގަވާއިދަކީ އިސްލާމްދީންދެކެ ލޯބިވާ، ގައުމަށް ތެދުވެރި، ތިމާއަށާއި އަނެކުންނަށް އިހުތިރާމުކުރާ ދަރިވަރުން މުޖުތަމައަށް ނެރުމަށާއި, ރަނގަޅު އަޚުލާގާއި ސުލޫކު ހުރި ދިވެހި ރައްޔިތެއް ބިނާކުރުމަށް އެކުލަވައިލި ގަވާއިދެއްކަމަށެވެ. އެހެންކަމުން އެ ގަވާއިދު ތަންފީޒު ކުރެވޭނެކަން ސްކޫލްތަކުގެ ޕްރިންސިޕަލުން ކަށަވަރު ކުރަން ޖެހޭނެ ކަމަށްވެސް ގަވާއިދުގައި ވަނީ ބުނެފައެވެ.
އެ ގަވާއިދުގައި ދަރިވަރުން ސްކޫލަށް ގެންދަންޖެހޭ ތަކެއްޗާއި، ޔުނިީފޯމާއި ހެދުން އެޅުމުގެ މިންގަނޑާއި، ސްކޫލުން ބޭރު ހަރަކާތްތަކުގައި ބައިވެރިވުމުގައި އަމަލުކުރަންޖެހޭ ގޮތްތަކުގެ އިތުރުން، ކިޔަވާ ކުދިންނަށް މަނާ ކަންކަންވެސް ވަނީ ހިމަނާފައެވެ.
އެޑިއުކޭޝަން މިނިސްޓްރީގެ އެ ގަވާއިދުގައި ބުނެފައިވާގޮތުގައި، ތައުލީމުގެ ބޭނުމަށް ހިންގޭ ތަމްރީންތައް ފިޔަވައި، 16 އަހަރުން ދަށުގެ ކުދިން އެއްވެސް ވަޒީފާއެއް އަދާކުރުމަކީ ހުއްދަ ކަމެއް ނޫނެވެ. އަދި ބެލެނިވެރިއެއްގެ ހުއްދަ ނެތި ރޭގަނޑު 10:00ގެ ފަހުން ބޭރުގައި އުޅުންވެސް މަނާވާނެއެވެ.
މި ގަވާއިދާ ޚިލާފުވާ ދަރިވަރުންނާމެދު "ބިހޭވިއަރ މެނޭޖްމަންޓް ޕޮލިސީ"އާ އެއްގޮތަށް އަމަލުކުރަމުން ދާނެކަމަށް އެޑިއުކޭޝަން މިނިސްޓްރީން ބުނެއެވެ.
