މ. ކޮޅުފުއްޓާ ޖެހިގެން އެ ރަށާ އެއް ފަޅެއްގައި އޮންނަ މީހުން ދިރިނޫޅޭ، ދިއްތުނޑީގައި ޓޫރިޒަމް ތަރައްގީ ކުރަން ކޮޅުފުށީ ކައުންސިލުން އިއްޔެ ހުޅުވާލައިފިއެވެ.
ކޮޅުފުށީ ކައުންސިލުން އިއްޔެ ކުރި އިއުލާނެއްގައި ބުނީ ދިއްތުނޑީގައި ތަރައްގީ ކުރަން ބޭނުން ވަނީ "އިންޓަގްރޭޓެޑް ޓުއަރިޒަމް" ކަމަށެވެ. އަދި އެ ރަށް ޑިޒައިންކޮށް، ހަދައި އަދި ހިންގަންޖެހޭނީ ވެސް ބިޑު ކާމިޔާބު ކުރާ ފަރާތުން ކަމަށް އެ އިއުލާނުގައި ބުނެފައިވެއެވެ.
ކޮޅުފުށީ ކައުންސިލުން ބުނީ އޭޕްރީލް 10، ގެ ކުރިން ދިއްތުނޑި ހިންގަން ބޭނުންވާ ފަރާތްތަކުން ބިޑު ހުށަހަޅަން ޖެހޭނެ ކަމަށެވެ.
މ. ދިއްތުނޑިއަކީ 10 ހެކްޓަރުގެ ބޮޑު ރަށެކެވެ. މީގެ ކުރިން މި ރަށް ގިނަ އަހަރުތަކެއް ވަންދެން ވަރުވާއަށް ލިޔުއްވައިގެން ބަލަހައްޓަވައިފައިވަނީ ކުރީގެ ރައީސް އިބްރާހިމް ނާސިރުގެ ސެކްރެޓަރީކަންވެސް ކުރެއްވި ނޮވެލްޓީ އަލީ ހުސެއިންއެވެ. އޭނާ ވަނީ އެ ރަށުގައި މަސްގަތުމުގެ މަަސައްކަތްކުރައްވާފަ އެވެ. އެ ރަށުގައި ރިސޯޓެއް ހަދަން ރައީސް ޑރ. މުހައްމަދު ވަހީދު ހަސަން ގެ ވެރިކަމުގައި އިއުލާން ކުރިއެވެ. އެކަމަކު އެ ފަދަ މަޝްރޫއެއް މިހާތަނަށް ހިންގާފައެއް ނުވެއެވެ.
