ކުރީގެ އެއްވެސް ބިލެއް ސްޓެލްކޯގެ ބިލުގައި ނުހިމަނާނެ: ވެމްކޯ

ހޮނިހިރު ދުވަހުން ފެށިގެން ވެމްކޯގެ ބިލު، ސްޓެލްކޯގެ ކަރަންޓު ބިލުގެ ތެރޭގައި ހިމަނަން ފެށި ނަމަވެސް ކުރިން ނުދައްކާ ހުރި އެއްވެސް ބިލެއް ސްޓެލްކޯ ބިލުތެރެއަށް ނުލާނެ ކަމަށް އެ ކުންފުނިން ބުނެފިއެވެ.

ވެމްކޯއިން ސްޓެލްކޯގެ ބިލުގެ ތެރޭގައި އެ ކުންފުނީގެ ކުނީގެ ބިލު ހިމަނަން ނިންމާފައިވަނީ ކުނި އުކާލުމުގެ ޚިދުމަތް ހޯދާ ބައެއް ފަރާތްތަކުން ބިލުތައް ނުދެއްކުމާއި ރަޖިސްޓްރީނުކޮށް ކުނި އުކާލުމުގެ ޚިދުމަތް ހޯދާ މައްސަލަ ބޮޑުވުމުގެ ސަބަބުންނެވެ. އެ ކުންފުނިން މީގެ ކުރިން ބުނެފައިވާ ގޮތުގައި މާލެ ސަރަހައްދުގެ 50 އިންސައްތައަށްވުރެ ގިނަ ގޭބިސީތަކުން ގަވާއިދުން އެ ޚިދުމަތަށް ފައިސާ ނުދައްކައެވެ. މީގެ ސަބަބުން އެ ކުންފުންޏަށް ލިބެންޖެހޭ އާމްދަނީގެ ބޮޑުބައެއް ނުލިބިހުރިކަން ވަނީ ފާހަގަކޮށްފައެވެ.

Advertisement

ހޮނިހިރު ދުވަހުން ފެށިގެން އަންނަ ބަދަލާއެކު ކުނި ބިލަށް ކޮންމެހެން ފައިސާ ދައްކަން ޖެހޭނެއެވެ. އެގޮތުން، ސްޓެލްކޯގައި ރަޖިސްޓްރީކޮށްފައިވާ 50،000 އަށްވުރެ ގިނަ ގޭބިސީތަކަށް ދެން ކަރަންޓު ބިލާއެކު ކުނި ބިލުވެސް ފޮނުވާނެއެވެ.

މި ބަދަލާއެކު ގިނަ ބަޔަކު އަންނަނީ ކުރިން ނުދައްކާ ހުރި ބިލުތައް ވެސް އައު ބަދަލާއެކު ސްޓެލްކޯގެ ބިލުގައި ހިމެނޭނެތީ ސުވާލު އުފައްދަމުންނެވެ. އެކަމާ ގުޅިގެން "ރާއްޖެ އެމްވީ" އަށް ވެމްކޯގެ ސީނިއާ މާކެޓިން އެންޑް ޕީއާރު އޮފިސަރު މުހައްމަދު މިއުސަމް ރަޝީދު ވިދާޅުވީ ވެމްކޯގެ ބިލާއި ސްޓެލްކޯ ބިލް އެއްކޮށްލަން ނިންމި ނަމަވެސް މިހާރު އެ ކުންފުންޏަށް ނުދައްކާ ހުރި ބިލްތައް ސްޓެލްކޯގެ ބިލުގައި ނުހިމަނާނެ ކަމަށެވެ. އަދި ކުރިން ނުދައްކާ ހުރި ބިލުތައް ދައްކަން ޖެހޭނެ ކަމަށާއި އެކަން ކުރަން ޖެހޭނީ މިހާރު އޮންނަ އުސޫލުގެ ތެރެއިން ކަމަށް އޭނާ ވިދާޅުވިއެވެ.

އެހެންކަމުން ކުރިން ވެމްކޯގައި ރަޖިސްޓްރީކޮށްގެން ކުނި އުކާލުމުގެ ޚިދުމަތް ހޯދަމުން އައި ފަރާތްތަކުގެ ތެރެއިން ގަވާއިދުން ބިލު ނުދައްކާ ފަރާތްތަކުން، ނުދައްކާ ހުރި ބިލުތައް "އަވަސްޕޭ" މެދުވެރިކޮށް ދައްކައި، ހަލާސް ކުރަން ޖެހޭނެއެވެ.

ވެމްކޯ ބިލާއި ސްޓެލްކޯގެ ބިލު އެއްކޮށްލަން ނިންމާފައިވާތީ އެ ކުންފުނިން ވަނީ ގޭބިސީތަކުގެ މައުލޫމާތު އަޕްޑޭޓްކުރަން މިހާރު އިލްތިމާސްކޮށްފައެވެ. އެގޮތުން އާއްމު ގޭބިސީ ކަރަންޓް މީޓަރުތަކުގެ ތެރޭގައި ލިފްޓް ނުވަތަ މެއިންޓަނަންސް މީޓަރެއް ހުންނަ ނަމަ އެފަރާތްތަކުން "ޔޫޓިލިޓީ މީޓަރު އެކްސްކުލޫޝަން ފޯމް" ފުރިހަމަކޮށް، އެކޯޕަރޭޝަނަށް ހުށަހަޅަން ވަނީ އެދިފައެވެ. އަދި ކޮމާޝަލް ރެޒިޑެންޝަލް ކޮމްޕްލެކްސްތައް ބަލަހައްޓާ ފަރާތްތަކުން "ޕްރައިމަރީ މީޓަރު އައިޑެންޓިފިކޭޝަން އެންޑް ގްރޫޕިން ފޯމް" ފުރިހަމަކޮށް ހުށަހެޅުމަށް ވެސް އެދިފައެވެ.

މީގެ އިތުރުން ވެމްކޯގެ ޚިދުމަތް ހޯދާ ވިޔަފާރިތަކާއި މުއައްސަސާތަކުން "އިންފޮމޭޝަން އަޕްޑޭޓް ފޯމް" އަންނަ މަހުގެ ހަ ވަނަ ދުވަހުގެ ކުރިން ހުށަޅަން ވެމްކޯއިން އެދިފައިވާއިރު، އެ މުއްދަތުގައި މައުލޫމާތު ހުށަނާޅާނަމަ ޚިދުމަތް މެދުކެނޑޭނެ ކަމަަށް ވެސް އެ ކުންފުނިން ވަނީ ބުނެފައެވެ.

ވެމްކޯއިން ހޮނިހިރު ދުވަހުން ފެށިގެން ސްޓެލްކޯގެ ބިލާ އެއްކުރަން ނިންމާފައިވާއިރު ކުނިގެ ބިލަށް މަހަކަށް ނަގާނީ 150 ރުފިޔާއެވެ. އެއީ ދުވާލަކަށް 4.93 ރުފިޔާގެ ރޭޓުންނެވެ.