މިދިޔަ އަހަރު ބްރެޒިލްގައި އޮތް ރިޔާސީ އިންތިޚާބުން ނާކާމިޔާބީ އާއި ކުރިމަތިވެވަޑައިގެންނެވި އޭރު އެގައުމުގެ ރައީސްކަމުގައި ހުންނެވި ޚައިރް ބޮލްސޮނާރޯ އަމިއްލަފުޅަށް ފްލޮރިޑާއަށް އަރުވާލައްވައިގެން އުޅުއްވުމަށްފަހު އެނބުރި ބްރެޒިލްއަށް ވަޑައިގެންފިއެވެ.
މިދިޔަ އަހަރު ބޭއްވި ރިޔާސީ އިންތިޚާބު ކާމިޔާބުކުރައްވާފައިވަނީ ވާތުފިޔާގެ އިނާޝިއޯ ލޫލާ ޑަ ސިލްވާއެވެ. އިންތިޚާބުން ނާކާމިޔާބީއާ ކުރިމަތިވެވަޑައިގެންނެވި ނަމަވެސް ބޮލްސޮނާރޯ މިހާތަނަށްވެސް ބަލި ގަބޫލުކުރައްވާފައެއްނުވެއެވެ. އެނބުރި ބްރެޒިލް އަށް މިވަޑައިގެންނެވީ އެމަނިކުފާނުގެ ކަނާތު ފިޔާގެ ޕާޓީކަމަށްވާ ލިބެރަލް ޕާޓީ އިދިކޮޅު މައި ޕާޓީއެއްގެ ގޮތުގައި ހިންގެވުމަށެވެ.
ބޮލްސޮނާރޯ އެނބުރި ބްރެޒިލް އަށް ވަޑައިގަންނަވާތީ ސަލާމަތީ ކަންކަން ވަނީ ވަރަށް ވަރުގަދަކޮށްފައެވެ. އަދި މުޒާހަރާތަކެއް ހިނގަފާނެކަމަށް ބަލާ އެއަރޕޯޓް ސަރަހައްދު ވަނީ ބަންދުކޮށްފައެވެ.
ބްރެޒިލް އަށް ފުރާވަޑައިގަތުމަށް މަތިންދާ ބޯޓަށް އެރުއްވުމުގެ ކުރިން ބޮލްސޮނާރޯ ވިދާޅުވީ ލިބިވަޑައިގަންފައިވާ ތަޖުރިބާގެ ބޭނުންކުރައްވައިގެން ޕާޓީ އަލުން އަނބުރާ ކޮޅަށް ޖަހައި އަންނަ އަހަރު އޮންނަ އިންތިޚާބު ކާމިޔާބުކުރުމަށް މަސައްކަތްކުރައްވާނެކަމަށެވެ. އަދި މިދިޔަ އަހަރުގެ އޮކްޓޯބަރު މަހު ބޭއްވި އިންތިޚާބުގެ ނަތީޖާއަކީ މިހާރު ނިމިފައިވާ ޗެޕްޓަރެއް ކަމަށް ވިދާޅުވިއެވެ.
އެކަން މިހާރު ނިމިފައިވާކަމަށާއި ދެން ތައްޔާރުވާނީ އަންނަ އަހަރުގެ އިންތިޚާބަށްކަމަށް ބޮލްސޮނާރޯ ވިދާޅުވިއެވެ.
ބޮލްސޮނާރޯ ބްރެޒިލް ދޫކުރައްވާ އެމެރިކާ އަށް ވަޑައިގެންނެވީ ލޫލާ އަށް ރައީސްކަމުގެ ޝޭޝް ހަވާލުކުރައްވަން އޮތް ދުވަހުގެ ދެދުވަސް ކުރިންނެވެ. ބޮލްސޮނާރޯ ގައުމު ދޫކުރައްވާ ވަޑައިގަންނަވަމުން ވިދާޅުވީ އަރާމުކޮށްލައްވަން ބޭނުންފުޅުވާކަމަށެވެ. ނަމަވެސް ފާޑުކިޔާ ފަރާތްތަކުން ބުނަމުންދިޔައީ ބޮލްސޮނާރޯ އަށް ކުރިމަތިވެވަޑައިގަންނަވާނެ އެތައް ހާސް ތަހުގީގަކުން ރެކިވަޑައިގަންނެވީކަމަށެވެ.
މިދިޔަ އަހަރު ބޭއްވި އިންތިޚާބުގައި ބްރެޒިލްގެ ވޯޓިންގ ސިސްޓަމާ ދެކޮޅަށް ގަސްތުގައި މަސައްކަތްކުރެއްވުމާއި ޖެނުއަރީ މަހުގެ 8 ވަނަ ދުވަހު ބްރެޒިލްގެ ސަރުކާރުގެ ތަންތަނަށް ބޮލްސޮނާރޯގެ ސަޕޯޓަރުން ވަދެ ގެއްލުންދީ ހިންގި ހަމަނުޖެހުމަށް ހިތްވަރު ދެއްވިކަމުގެ ތުހުމަތުގައި ބޮލްސޮނާރޯ އާމެދު އަންނަނީ ތަހުގީގުތައް ހިންގަމުންނެވެ.
ބޮލްސޮނާރޯ އެނބުރި ވަޑައިގަތުމަށް އެންމެ ބޮޑަށް އިންތިޒާރުކުރައްވަމުން ގެންދަވަނީ ލިބަރަލް ޕާޓީގެ ލީޑަރެވެ. މިހާރުގެ ސަރުކާރާ ދެކޮޅަށް ޕާޓީ ހިންގަވާ ކުރިޔަށް އޮތް މުނިސިޕަލް އިންތިޚާބު ޕާޓީއަށް ކާމިޔާބުކުރުމަށް ބޮލްސޮނާރޯ އިސްވެ ހުންނަވާ މަސައްކަތްކުރެއްވުމަށް ޕާޓީގެ ލީޑަރު ނުހަނު ބޭނުންފުޅުވެއެވެ.
އެގޮތުން މުޅި ބްރެޒިލްގައި ބޮލްސޮނާރޯ ދަތުރުކުރައްވާ ޕާޓީގެ އަސާސްތައް ދަމަހައްޓާ ޕާޓީ އިތުރަށް ފުޅާކުރުމުގެ މަސައްކަތްތައް ބޮލްސޮނާރޯ ކުރައްވާނެކަމަށް ލީޑަރު ވިދާޅުވިއެވެ. އަދި 2026 ވަނަ އަހަރު އޮންނަ ރިޔާސީ އިންތިޚާބަށް ތައްޔާރުވުމުގެ ކަންކަން ފައްޓަވާނެކަމަށްވެސް ވިދާޅުވިއެވެ.
ބައެއް މާހިރުން ގަބޫލުކުރައްވާ ގޮތުގައި ބޮލްސޮނާރޯ އެނބުރި ވަޑައިގެން މަސައްކަތްތައް ފައްޓަވާ އަދިވެސް ޕާޓީ ލީޑުކުރެއްވޭނެކަން ނުދައްކަވައިފިނަމަ ކަނާތު ފިޔައިގެ ޕާޓީ ލީޑުކުރާނެ އެހެން ލީޑަރެއް ހޯދާނެއެވެ. އެހެންކަމުން ވީއެންމެ އަވަހަކަށް ބޮލްސޮނާރޯ އެނބުރި ބްރެޒިލް އަށް ވަޑައިގަތުމަކީ މުހިންމު ކަމެކެވެ. އަނެއްކޮޅުން ޖެނުއަރީ 8 ގައި ހިނގާދިޔަ ހަމަނުޖެހުންތަކާއި ގުޅިގެން ގިނަ ސެންޓަރު ރައިޓް ޕާޓީތަކެއް ތާއީދު ބޮލްސޮނާރޯ އަށް ވަނީ ގެއްލޭ ގޮތްވެފައެވެ.
