ސައުދީ އަރަބިއްޔާގައި ހުންނަވައި ލުބުނާނުގެ ބޮޑުވަޒީރުކަމުން ކުއްލި ގޮތަކަށް އިސްތިއުފާ ދެއްވިތާ ދެ ހަފްތާއަށްވުރެ ގިނަ ދުވަހަށްފަހު ސައުދުލް ހަރީރީ އެނބުރި ބެއިރޫތައް ވަޑައިގެންފިއެވެ.
ވެރިރަށް ލުބުނާނުގެ ބައިނަލްއަގްވާމީ އެއަރޕޯޓަށް ހަރީރީ ވަޑައިގެންފައިވަނީ އަންގާރަ ދުވަހުގެ ރޭގެ ވަގުތެއްގައެވެ.
ލުބުނާނުގެ ބޮޑުވަޒީރުކަމުން އިސްތިއުފާދެއްވިކަން ހަރީރީ އިއުލާނު ކުރައްވާފައިވަނީ ނޮވެމްބަރު މަހުގެ 4 ވަނަ ދުވަހު ސައުދީ އަރަބިއްޔާގައި ހުންނަވައިގެންނެވެ. ލުބުނާނުގެ ރައީސް އަދި ސަރުކާރުން ހަރީރީގެ އިސްތިއުފާ ގަބޫލުކުރައްވާފައެއް ނުވެއެވެ.
އިސްތިއުފާގެ ތަގުރީރުގައި ހަރީރީވަނީ ބޮޑުވަޒީރު ކަމުން އިސްތިއުފާ ދެއްވީ ލުބުނާނުގެ ދާހިލީ ކަން ކަމަށް އިރާނާއި އަދި އިރާނާ ރަހްމަތްތެރި ހިޒްބުﷲ ޖަމާއަތުން ނުފޫޒު ފޯރުވާ ކަމަށް ވިދާޅުވެފައެވެ. އަދި އެމަނިކުފާނު އަވާހަރާކޮށްލަން ބަޔަކު އުޅޭ ކަމަށް ވެސް ހަރާރީ ތުހުމަތު ކުރެއްވިއެވެ.
ހަރީރީގެ އިސްތިއުފާ ވެގެންގޮސްފައިވަނީ ލުބުނާނު ނުތަނަވަސްކަމެއްގެ ތެރެއަށް ވެއްޓި، ނިމުމެއް ނެތް ހަމަނުޖެހުމަކަށް ވެއްޓިދާނެކަމުގެ ބިރު އުފެދުނު ކަމަކަށެވެ.
މީގެ އިތުރުން ލުބުނާނު ކުރީސަފުގައި ބާއްވައިގެން ސައުދީ އަރަބިއްޔާއާއި އިރާނާ ދެމެދު އިތުރު ކޯޅުންގަޑެއް އުފެދިދާނެކަމުގެ ބިރު އޮތީ ހީވެފައެވެ.
ލުބުނާނުގެ އޮފިޝަލުން ކުރިން ވިދާޅުވެފައިވަނީ ހަރީރީގެ އިސްތިއުފާ ގަބޫލުކުރައްވާނެ ހަމައެކަނި ގޮތަކީ އެ ގައުމުގެ ފަސްގަނޑުގައި ހުންނަވައިގެން އިސްތިއުފާ ދެއްވުންކަމަށެވެ.
މީގެ އިތުރުން ސައުދީ އަރަބިއްޔާގައި ހަރީރީ ހުންނެވީ ގޭ ބަންދުގައިކަމަށްވެސް ލުބުނާނުގެ އޮފިޝަލުންވަނީ ތުހުމަތުކުރައްވާފައެވެ. ނަމަވެސް އެ ތުހުމަތުތައް ހަރާރީ ދޮގުކުރައްވައެވެ.
ހަރާރީއާއެކު ތިއްބެވި ސިޔާސީ ލީޑަރުން ވާދަވެރި ސިޔާސީ ފަރާތްތަކުންވެސް ޑިމާންޑްކޮށްފައިވަނީ ގައުމަށް އެނބުރި ވަޑައިގެން ރަސްމީކޮށް އިސްތިއުފާ ހުށަހެޅުއްވުމަށެވެ.
ހޮނިހިރު ދުވަހު އާޢިލާއާއެކު ފްރާންސަށް ވަޑައިގެން އެގައުމުގެ ރައީސް އެމަނުއެލް މެކްރޮން އާ ބައްދަލުކުރެއްވުމަށްފަހު ހަރީރީ ވިދާޅުވެފައިވަނީ މިއަދު ފާހަގަކުރާ މިނިވަން ދުވަހުގެ ހަރަކާތްތަކުގައި ބައިވެރިވެ ވަޑައިގެންނެވުމަށް ގައުމަށް ވަޑައިގަންނަވާނެ ކަމަށެވެ.
