އެގްރޯނެޓްގެ އެމްޑީ މަގާމުން ހާރޫން ވަކިކުރައްވައި، އެމްއެފްއެމްސީއަށް ބަދަލުކުރައްވައިފި
30 މާރިޗު 2023 | ބުރާސްފަތި 14:22ހާރޫން އެގްރޯނެޓަށް އައްޔަންކުރެއްވީ 2020 އަހަރުގެ އެޕްރީލް މަހުގެ ތެރޭގައި
އެގްރޯނެޓްގެ މެނޭޖިން ޑިރެކްޓަރު މަގާމުގައި ހުންނެވި ހާރޫން ރަޝީދު
އެގްރޯ ނެޝަނަލް ކޯޕަރޭޝަން (އެގްރޯނެޓް)ގެ މެނޭޖިން ޑިރެކްޓަރުގެ މަގާމުން ހާރޫން ރަޝީދު ވަކިކުރައްވައި، މޯލްޑިވްސް ފަންޑް މެނޭޖްމެންޓު ކޯޕަރޭޝަން (އެމްއެފްއެމްސީ)އަށް ބަދަލުކުރައްވައިފިއެވެ.
ރާއްޖެއެމްވީއަށް އެމްއެފްއެމްސީގެ އޮފިޝަލް ވިދާޅުވީ ބުރާސްފަތި ދުވަހު އެބަދަލު ގެންނަވާފައިވާކަމަށާއި، އެމްއެފްއެމްސީގެ ހެޑް އޮފީހަށް ހާރޫން ބަދަލުކުރައްވާފައިވާކަމަށެވެ.
އެގްރޯނެޓަކީ، ސައްތައިން ސައްތަ ސަރުކާރުގެ ހިއްސާ އޮތް އެމްއެފްއެމްސީގެ ސަބްސިޑިއަރީއެކެވެ. އެގްރޯނެޓަކީ ރާއްޖޭގައި ދަނޑުވެރިކަމުގެ ސިނާއަތު ކުރިއެރުވުމުގައި މަގުސަދުގައި ސަރުކާރުން އުފައްދާފައިވާ ކުންފުންޏެކެވެ. ރާއްޖޭގެ ދަނޑުވެރިކަމުގެ އުފެއްދުންތައް ހަމަ އަގުގައި ގަނެ އެތަކެތި މާކެޓްކޮށް ވިއްކުމާއި, ސަޕްލައި ޗެއިން ތަރައްގީ ކުރަން މަސައްކަތްކުރުން, އެ ކުންފުނީގެ މަގުސަދުތަކުގެ ތެރޭގައި ހިމެނެއެވެ.
ނިމިގެން ދިޔަ ދެ މަޖްލިސް އިންތިޚާބުގައިވެސް ގއ. ވިލިނގިލީ ދާއިރާގެ މެމްބަރުކަމަށް އެމްޑީޕީގެ ފަރާތުން ވާދަކުރެއްވި ހާރޫނަކީ ގއ. އަތޮޅު ކައުންސިލްގެ ރައީސް ކަމުގެ މަގާމް ވެސް ފުރުއްވި ބޭފުޅެކެވެ. އަދި އެސްއެޗްއާރު ކުންފުނީގެ މެނޭޖިން ޑިރެކްޓަރުގެ މަގާމާއި އެންޓްރެކް މޯލްޑިވްސްގެ މެނޭޖަރުގެ މަގާމުވެސް ފުރުއްވާފައިވެއެވެ.
ހާރޫން އެގްރޯނެޓަށް އައްޔަންކުރެއްވީ 2020 ވަނަ އަހަރުގެ އެޕްރީލް މަހުއެވެ.
އެގްރޯނެޓްގެ މެނޭޖިން ޑިރެކްޓަރުގެ މަގާމުން ހާރޫން ރަޝީދު ވަކުރައްވައި، އެމްއެފްއެމްސީއަށް ބަދަލުކުރައްވާފައިވާއިރު، އެންމެފަހުން ބޭއްވި ރިޔާސީ ޕްރައިމަރީގައި ހާރޫން ތާއީދުކުރެއްވީ ރައީސް މުހައްމަދު ނަޝީދަށެވެ.
މީގެ އިތުރުން ރައީސުލްޖުމްހޫރިއްޔާގެ އޮފީހުގެ މިނިސްޓަރުގެ މަގާމުގައި ހުންނެވި މުހައްމަދު ޝިފާޒް މަގާމުން ވަކިކުރައްވާފައިވާއިރު، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ މެނޭޖިންގ ޑިރެކްޓަރު އަދި ޗީފް އެގްޒެކެޓިވް އޮފިސަރު، ހުސައިން އަމްރުވެސް ވަނީ އެ މަގާމުން ވަކިކުރައްވާފައެވެ. އަދި މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީގެ އެގްޒެކެޓިވް ޑިރެކްޓަރުގެ މަގާމުގައި ހުންނެވި ލަބީގު މުހައްމަދު މާހިދުވެސް ވަނީ މަގާމުން ވަކިކުރައްވާފައެވެ.
އެމްޑީޕީގެ ރިޔާސީ ޕްރައިމަރީގައި އެމްޑީޕީގެ ރައީސް މުހައްމަދު ނަޝީދަށް ތާއީދުކުރެއްވި ބައެއް ބޭފުޅުން މަގާމުން ވަކިކުރައްވަން ފެއްޓެވީ، ފާޅުގައި އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާ ދެކޮޅަށް މަސައްކަތް ކުރެއްވުމުންނެވެ. ގިނަ ބަޔަކު ގެންދަނީ މިގޮތަށް ސަރުކާރާ ދެކޮޅަށް މަސައްކަތްކުރާ ފަރާތްތައް ސަރުކާރުގެ އިސް މަގާމުތަކުން ވަކި ކުރެއްވުމަށް ގޮވާލަމުންނެވެ.
