މެކްސިކޯގެ މައިގްރޭންޓް ޑިޓެންޝަން ސެންޓަރެއްގައި ރޯވެ 38 މީހުން މަރުވެއްޖެ
29 މާރިޗު 2023 | ބުދަ 16:33ހާދިސާ ހިނގާފައި މިވަނީ، އެމެރިކާއާއި މެކްސިކޯގެ ބޯޑަރު ހުރަސްކުރުމުގެ މައްސަލަތައް ރެކޯޑް މިންވަރަކަށް އުފުލިފައިވާ ދަނޑިވަޅެއްގައި
މެކްސިކޯގެ މައިގްރޭންޓް ޑިޓެންޝަން ސެންޓަރެއްގައި ރޯވުން
މެކްސިކޯގެ މައިގްރޭންޓް ޑިޓެންޝަން ސެންޓަރެއްގައި ރޯވެ 38 މީހުން މަރުވެއްޖެއެވެ.
މެކްސިކޯގެ އުތުރުގެ ބޯޑަރު ސިޓީ ސިއުޑަޑް ޖުއާރޭޒްގެ މައިގްރޭންޓް ޑިޓެންޝަން ސެންޓަރެއްގައި ހޯމަ ދުވަހުގެ ރޭ ދަންވަރު ވަނީ އަލިފާނުގެ ހާދިސާއެއް ހިނގާފައެވެ. މިހާދިސާގައި މެދުތެރެއާއި ދެކުނު އެމެރިކާގެ މަދުވެގެން 38 ހިޖުރަވެރިން މަރުވެފައިވާ ކަމަށް އޮފިޝަލުން ވަނީ ރިޕޯޓުކޮށްފައެވެ.
މިހާދިސާގައި 40 މީހުން މަރުވިކަމަށް ރިޕޯޓުކުރިއެވެ. ނަމަވެސް އަންގާރަ ދުވަހުގެ ހަވީރު، މެކްސިކޯގެ ނޭޝަނަލް މައިގްރޭޝަން އިންސްޓިޓިއުޓުން ވަނީ އެ އަދަދު 38ށް ދަށްކޮށްފައެވެ. އެއީ ހާދިސާގައި އަނިޔާވި މީހުންނަށް ފަރުވާދެމުންދިޔަ ހޮސްޕިޓަލްތަކަށް ޒިޔާރަތްކޮށް ނަންބަރުތައް ކަށަވަރުކުރުމަށްފަހު އިއުލާނުކުރި ނަންބަރެއް ކަމަށް އެއިދާރާއިން ބުނެއެވެ.
މެކްސިކޯގެ ރައީސް އަންދްރޭސް މެނުއަލް ލޮޕޭޒް އޮބްރަޑޯރ ވިދާޅުވީ، ޓެކްސަސްގެ އެލް ޕާސޯއާ ދިމާލުގައި އޮންނަ ސިޓީގައި އަލިފާން ރޯވެފައިވަނީ ހޯމަ ދުވަހުގެރޭ މެކްސިކޯ ގަޑިން 9:30ހާއިރު ކަމަށެވެ. އަދި މިއީ އެގައުމަށް އެތެރެވުމަށް މަސައްކަތްކުރާ ބައެއް ހިޖުރަވެރިން ޑީޕޯޓް ކުރާނެކަން އެނގުމުން ކުރަންފެށި މުޒާހަރާގެ ތެރެއިން ކުރި ކަމެއް ކަމަށްވެސް ރައީސް ވަނީ ސިފަކުރައްވާފައެވެ.
މިހާދިސާގައި އެހާ ގިނަ އަދަދެއްގެ ބަޔަކު މަރުވި ގޮތުގެ ތަފްސީލެއް ރައީސް ނުދެއްވި ނަމަވެސް، މިހާދިސާގެ ސަބަބުން މަރުވި މީހުންގެ މަރުގެ ޒިންމާ ނަގަންޖެހޭ މީހުން އިންސާފުގެ ކުރިމައްޗަށް ގެންނަވާނެކަމަށް މެކްސިކޯގެ ރައީސް ވަނީ ބުދަ ދުވަހު ވައުދުވެވަޑައިގަންނަވާފައެވެ.
ސިއުޑަޑް ޖުއާރޭޒްގެ މައިގްރޭންޓް ޑިޓެންޝަން ސެންޓަރުގައި ހިނގި މިހާދިސާއަކީ ފަހުގެ ތާރީޚެއްގައި ހިނގި މިފަދަ އެންމެ ނުރައްކާތެރި ހާދިސާއެވެ. މިހާދިސާ ހިނގާފައި މިވަނީ އެމެރިކާއާއި މެކްސިކޯގެ ބޯޑަރު ހުރަސްކުރުމުގެ މައްސަލަތައް ރެކޯޑް މިންވަރަކަށް އުފުލިފައިވާ ދަނޑިވަޅެއްގައެވެ.
އަލިފާނުގެ ހާދިސާ ހިނގި ސެންޓަރުގެ ސެކިއުރިޓީ ފުޓޭޖެއްގެ ވީޑިއޯ ސޯޝަލް މީޑިއާގައި އާންމުވެފައިވާއިރު، އެ ވީޑިއޯއިން ފެންނަގޮތުން، އަލިފާން ރޯވުމުން އެތަނުން ސަލާމަތްވުމަށް، ތަޅުލާފައިވާ ދޮރެއްގެ ކައިރިއަށް މީހުން އައިސް، އެ ދޮރު ހުޅުވުމަށް އެދެމުންދިޔައެވެ. ނަމަވެސް އެވަގުތު އެތަނުގައި ހަރަކާތްތެރިވަމުންދިޔަ މުވައްޒަފުންތަކެއް ދޮރު ހުޅުވައިނުދީ އެތަނުން ދާ މަންޒަރު ވީޑިއޯއިން ފެނިގެންދެއެވެ.
ހަފުތާއަކު އެއްފަހަރު އެ ފެސިލިޓީއަށް ޒިޔާރަތްކޮށް ހާލަތު މޮނިޓަރކުރާ ޖެސޫސް ރެފިއުޖީ ސަރވިސް (ޖޭއާރުއެސް)ގެ މަންދޫބު އަލެޖެންޑްރާ ކޮރޯނާ ވަނީ އެ ވީޑިއޯއިން ފެންނަނީ ފިރިހެނުންގެ ގޮޅިކަން ކަށަވަރުކޮށްދީފައެވެ. އެމީހުން ހުޅުވައިދިނުމަށް އެދެމުންދިޔަ ދޮރަކީ، އެތަނުން ނުކުމެވެން ހުރި ހަމައެކަނި ދޮރުކަން އޭނާ ވަނީ ފާހަގަކޮށްފައެވެ.
އެ ސެންޓަރު ހިންގާ މެކްސިކޯގެ ނޭޝަނަލް މައިގްރޭޝަން އިންސްޓިޓިއުޓް (އައިއެންއެމް)އިން މިކަމާ ގުޅިގެން އަދި ވަކިއެއްޗެއް ބުނެފައެއް ނުވެއެވެ.
