ސައްތައިން ސައްތަ ރެކޯޑާއެކު 17 އަހަރުން ދަށުގެ ސާފް ޗެމްޕިއަންޝިޕް ރަޝިޔާ އަށް

17 އަހަރުން ދަށުގެ އަންހެން ސާފް ޗެމްޕިއަންޝިޕް ރަޝިޔާ އިން ކާމިޔާބުކޮށްފި އެވެ.

ރަޝިޔާ އިން މުބާރާތް ކާމިޔާބު ކުރީ ފަހު މެޗުގައި އިންޑިއާ ބަލިކޮށްގެންނެވެ. މިއަހަރުގެ މުބާރާތް ކުރިއަށް ގެންގޮސްފައި ވަނީ ލީގު އުސޫލުންނެވެ. މުބާރާތުގައި އިންޑިއާއާ ދެކޮޅަށް ކުޅުނު މެޗު ރަޝިޔާ އިން ކާމިޔާބު ކުރީ 2-0 އިންނެވެ. މުބާރާތުގައި ބަންގްލަދޭޝް، ނޭޕާލް އަދި ބޫޓާނާ ދެކޮޅަށް ކުޅުނު މެޗު ވެސް ރަޝިޔާ އިން ވަނީ ކާމިޔާބުކޮށްފަ އެވެ. އެހެންކަމުން ރަޝިޔާ އިން މުބާރާތުގެ ތަށި އުފުލާލީ ކުޅުނު ހުރިހާ މެޗަކުން މޮޅުވެގެންނެވެ. މުބާރާތުގެ ދެ ވަނަ ލިބުނީ ހަތް ޕޮއިންޓާއެކު ބަންގްލަދޭޝް އަށެވެ. އިންޑިއާ އަށް ތިން ވަނަ ލިބެނީ ހަ ޕޮއިންޓާއެކު އެވެ. ހަަތަރު ޕޮއިންޓާއެކު ހަތަރު ވަނަ ލިބެނީ ނޭޕާލް އަށެވެ. ފަސް ވަނަ އަށް ދިޔައީ ބޫޓާން އެވެ. އެ ޓީމު ކުޅުނު އެއްވެސް މެޗަކުން މޮޅުވެފައެއް ނުވެ އެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ އިންޑިއާގެ ޝިލްޖީ އެވެ. އެންމެ މޮޅު ގޯލް ކީޕަރަކީ ނޭޕާލްގެ ޝުޖާތާ އެވެ. މީގެ އިތުރުން މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ޗެމްޕިއަން ރަޝިޔާގެ އެލީނާ އެވެ. މިއީ 17 އަހަރުން ދަށުގެ އުމުރު ފުރާ އަށް މުބާރާތް ބަދަލުކޮށްގެން ބޭއްވި ފުރަތަމަ ފަހަރެވެ. މީގެ ކުރިން ބާއްވަމުން އައީ 15 އަހަރުން ދަށުގެ އުމުރުފުރާ އަށް ޚާއްސަކޮށްގެންނެވެ.