ޔުނައިޓެޑް އަރަބް އެމިރޭޓްސުން ރާއްޖެއަށް 100 ރޯދަ ޕެކް ހަދިޔާކޮށްފި
މި ޕެކްތައް ބަހާނީ 2022 ވަނަ އަހަރުގެ ފަގީރުންގެ ލިސްޓަށް ބަލައިގެން
ޔުނައިޓެޑް އަރަބް އެމިރޭޓްސުން ރާއްޖެއަށް ރޯދަ ޕެކްތައް ހަދިޔާކުރުން
ޔުނައިޓެޑް އަރަބް އެމިރޭޓްސުން ރާއްޖެއަށް 100 ރޯދަ ޕެކް ހަދިޔާކޮށްފިއެވެ.
އަންގާރަ ދުވަހު މި ރޯދަ ޕެކްތައް, އިސްލާމިކް މިނިސްޓަރު ޑރ. އަހްމަދު ޒާހިރު އަލީއާ ހަވާލުކޮށްދެއްވީ ޔޫއޭއީ އެމްބަސީގެ ޝާޒޭ ޑި އެފެއަރޒް އަބްދުއްރަހްމާން އަލްޝަމްސީއެވެ.
އިސްލާމިކް މިނިސްޓަރު ރާއްޖެއެމްވީއަށް ވިދާޅުވީ މި ރޯދަ ޕެކްތަކަކީ ފަގީރުންނަށް ބެހުމަށް އެމްބަސީން ދީފައިވާ ޕެކްތަކެއް ކަމަށެވެ. އަދި އޭގައި ފުށާއި ހަނޑޫފަދަ ކާޑުގެ ބާވަތްތައް ހިމެނޭނެ ކަމަށާއި، އާއިލާއަކަށް ބޭނުންވާނެ ތަކެތި ހިމެނޭނެ ކަމަށްވެސް ވިދާޅުވިއެވެ.
ބުރާސްފަތި ދުވަހު ޕެކްތައް ބަހަން ފަށާނެކަން ފާހަގަކުރައްވަމުން މިނިސްޓަރު ވިދާޅުވީ، މި ޕެކްތައް ބަހާނީ 2022 ވަނަ އަހަރުގެ ފަގީރުންގެ ލިސްޓަށް ބަލައިގެން ކަމަށެވެ. ބުދަ ދުވަހު ލިސްޓުގައި ހުރި ފަރާތްތަކަށް ގުޅައި، އެޑްރެސްތަކާއި ފޯން ނަންބަރުތައް އަޕްޓޭޑްކުރުމުގެ މަސައްކަތް މިނިސްޓްރީން ކުރިއަށް ގެންދާނެ ކަމަށްވެސް ވިދާޅުވިއެވެ.
މިނިސްޓަރު އިތުރަށް ވިދާޅުވީ މި ޕެކްތައް ބަހާނީ މާލެ ސަރަހައްދުގައި ކަމަށާއި، މިނިސްޓްރީން މި ޕެކްތައް ގޭގެއަށް ގެންގޮސްދޭނެ ކަމަށެވެ. އަދި މިފަދަ ޕެކްތައް އިތުރަށް ލިބިއްޖެނަމަ އެހެން ސަރަހައްދުތަކަށް ބަހާނެ ކަމަށްވެސް އިސްލާމިކް މިނިސްޓަރު ވިދާޅުވިއެވެ.
