ސިޓީން އިންތިޒާރު ކުރަނީ ގުންޑޮގާންގެ ނިންމުމަކަށް

މެންޗެސްޓަރ ސިޓީން މިހާރު މަޑުކުރަމުން އަންނަނީ މިޑްފީލްޑަރު އިލްކާއި ގުންޑޮގާންގެ ނިންމުމަކަށް ކަމަށް ބޭރުގެ މީޑިއާ ރިޕޯޓުތައް ބުނެފި އެވެ.

ޖަރުމަނު ލީގުގެ ބްރޫޝިއާ ޑޯޓްމަންޑު ދޫކޮށް އުމުރުން 32 އަހަރުގެ ކުޅުންތެރިޔާ ސިޓީ އަށް ބަދަލުވީ 2016 ވަނަ އަހަރު އެވެ. އޭގެ ފަހުން އޭނާ އަންނަނީ ސިޓީގައި މޮޅުކުޅުމެއް ދައްކައި، ޓީމުގައި އިސް ދައުރެއް އަދާ ކުރަމުންނެވެ. ގުންޑޮގާން އެންމެ ފުރަތަމަ ސިޓީ އަށް ސޮއިކުރީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އޭގެ ފަހުން 2019 ވަނަ އަހަރުގެ އޯގަސްޓު މަހުގައި ސިޓީން ވަނީ ގުންޑޮގާންގެ އެއްބަސްވުން ހަތަރު އަހަރަަށް އިތުރުކޮށްފަ އެވެ. އެ އެއްބަސްވުމުގެ މުއްދަތު މިއަހަރުގެ ޖޫން މަހަށް ހަމަވާނެ އެވެ. ނަމަވެސް މިދިޔަ އަހަރު ސިޓީން ވަނީ ގުންޑޮގާންގެ އެއްބަސްވުން އަނެއްކާ ވެސް އައު ކުރުމަށް ބޭނުންވާކަން ހާމަކޮށްފަ އެވެ. ސިޓީން ވަނީ އެކަމުގެ މަޝްވަރާތައް ގުންޑޮގާންއާ ކޮށްފަ އެވެ.

ބޭރުގެ މީޑިއާތަކުގައި ބުނެފައިވާ ގޮތުން ސިޓީން މިހާރު ވަނީ އައު އެއްބަސްވުމުގެ ވާހަކަތައް ގުންޑޮގާންއާ ދައްކައި، އެއްބަސްވުމުގެ ކަންކަމާ ގުޅޭ ގޮތުން މަޝްވަރާކޮށްފަ އެވެ. މީގެ އިތުރުން މިހާރު ސިޓީން އިންތިޒާރު ކުރަމުން އަންނަނީ ގުންޑޮގާންގެ ނިންމުމަކަށެވެ. ސިޓީން ގުންޑޮގާން އަށް އައު އެއްބަސްވުމެއް ހުށަހަޅާފައިވާއިރު، އޭނާ ހޯދުމުގެ މަސައްކަތް ސްޕެއިންގެ ބާސެލޯނާ އިން ކުރަމުން އަންނަ ކަމަށް ވެސް ރިޕޯޓުތައް ބުނެ އެވެ. ރިޕޯޓުތައް ބުނާ ގޮތުން ބާސެލޯނާ އިން ބޭނުންވަނީ ހިލޭ ޓްރާންސްފާއެއްގެ ދަށުން ގުންޑޮގާން ހޯދުމަށެވެ. ބާސެލޯނާގެ އިތުރުން ޔޫރަޕުގެ އެހެން ކުލަބުތަކުން ވެސް އޭނާ ހޯދުމުގެ ޝައުޤުވެރިކަން ގެންގުޅޭ ކަމަށް ވެސް ރިޕޯޓުތައް ބުނެ އެވެ.

ސިޓީގައި މިހާތަނަށް ހޭދަ ކުރި މުއްދަތުގައި ގުންޑޮގާން ވަނީ އެ ޓީމަށް ކުޅެދިން 290 މެޗުން 53 ލަނޑު ޖަހައިދީފަ އެވެ. މީގެ އިތުރުން އޭނާ ވަނީ ސިޓީއާއެކު 11 ތައްޓެއް ކާމިޔާބުކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގާއި، އެފްއޭ ކަޕާއި، ކަރަބޯ ކަޕް އަދި އެފްއޭ ކޮމިއުނިޓީ ޝީލްޑް ހިމެނެ އެވެ.