ސެންޓަރ ފޮރ މެންޓަލް ހެލްތު ހުޅުވި ފަހުން މިހާތަނަށް 63،000 އަށްވުރެ ގިނަ މީހުންނަށް ފަރުވާ ދީފި
28 މާރިޗު 2023 | އަންގާރަ 02:07އަހަރަކު ގާތްގަނޑަކަށް 17،861 ކޮންސަލްޓޭޝަން ކުރިއަށްދާކަމަށް އައިޖީއެމްއެޗުން ބުނޭ
ސެންޓަރ ފޮރ މެންޓަލް ހެލްތު ހުޅުވުމުގެ ރަސްމިއްޔާތު
އައިޖީއެމްއެޗްގައި 2019 ވަނަ އަހަރު ހުޅުވި ނޭޝަނަލް ސެންޓަރ ފޮރ މެންޓަލް ހެލްތު ހުޅުވި ފަހުން މިހާތަނަށް 63،389 މީހުންނަށް ފަރުވާ ދީފައިވާ ކަމަށް އެ ހޮސްޕިޓަލުން ބުނެފިއެވެ.
އެ ސެންޓަރު ހުޅުވިތާ ހަތަރު އަހަރު ފުރުން ފާހަގަކުރުމުގެ ގޮތުން އައިޖީއެމްއެޗުން ނެރުނު ބަޔާނެއްގައި ބުނީ ސެންޓަރު މެދުވެރިކޮށް ބަލިމީހުންނާއި އާއިލާތަކަށް ޓަރޝަރީ ފެންވަރުގައި ޚިދުމަތް ފޯރުކޮށްދެމުން އަންނަ ކަމަށެވެ. އަދި ފާއިތުވި އަހަރުތަކުގައި އެ ސެންޓަރުން ގިނަ އަދަދެއްގެ ފަރާތްތަކަށް އެވިޑެންސް ބޭސްޑް ކޮލިޓީ ކެއަރ އާއި މަލްޓިޑިސިޕްލިނަރީ ސަރވިސްތައް ފޯރު ކޮށްދެވިފައިވާ ކަމަށް ވެސް ވަނީ ބުނެފައެވެ.
ނޭޝަނަލް ސެންޓަރ ފޮރ މެންޓަލް ހެލްތު ހުޅުވީ 25 މަރޗް 2019ގައެވެ. އެ ސެންޓަރަކީ ޓާރޝަރީ ފެންވަރުގައި ވަށާޖެހޭ ހިދުމަތްތައް ފޯރުކޮށްދެވޭ ނަފްސާނީ ބަލިތަކުގެ ފަރުވާއަށް ހާއްސަ ކުރެވިގެން ރާއްޖޭގައި ހުޅުވުނު ހަމައެކަނި ސެންޓަރެވެ. މަދު އަދަދެއްގެ ސިއްހީ މާހިރުންނާއިއެކު ފެށި އެ ސެންޓަރުން ފުރަތަމަ އަހަރު އެކަނިވެސް މުޅި ޖުމްލަ 7246 ކޮންސަލްޓޭޝަން ކުރިއަށްގެންދިޔަ ކަމަށް އައިޖީއެމްއެޗުން ބުންޏެވެ.
މީގެ އިތުރުން ފާއިތުވި ތިން އަހަރު އެ ސެންޓަރުގެ ޓީމް އިތުރަށް ވަރުގަދަވެ އިތުރު ޑިމާންޑާއި އެއްވަރަށް ހިދުމަތްތައް ފޯރުކޮށްދިނުމުގެ މަސައްކަތް ކުރަމުންއަންނަ ކަމަށާއި އެގޮތުން އަހަރަކު ގާތްގަނޑަކަށް 17،861 ކޮންސަލްޓޭޝަން ކުރިއަށްދާކަމަށް އައިޖީއެމްއެޗުން ބުންޏެވެ. އަދި 2019 ވަނަ އަހަރުން ފެށިގެން މި އަހަރުގެ ފެބްރުއަރީ މަހުގެ ނިޔަލަށް ޖުމްލަ 63،389 ކޮންސަލްޓޭޝަން ކުރެވިފައިވާކަން ވެސް އެ ހޮސްޕިޓަލުން ފާހަގަކުރިއެވެ.
ކޮވިޑް-19 ގެ ފަހުން ނަފްސާނީ ބަލީގެ ހާލަތަށް އައި ބަދަލާއިއެކު ހިދުމަތް ހޯދާ ފަރާތްތައް އިތުރުވުމާގުޅިގެން ސެންޓަރުގެ ހިންގުމާއި ހިދުމަތްތަކަށް ބަދަލުގެނައިކަން ފާހަގަކޮށް އައިޖީއެމްއެޗުން ބުނީ ޓެލެ-މެންޓަލް ސަރވިސަސް ގާއިމުކުރުމާއި ޓްރައޭޖް އަދި ސްކްރީން ކުރާނެ މަރުހަލާތަކެއް ކަނޑައެޅުމާއި ފަންނީ މުވައްޒަފުން އިތުރުކުރުމާއި ޓްރެއިނިންތަކާއި ކްލިނިކަލް ސުޕަވިޒަން ކުރުން ފަދަ ކަންކަމުން ހިދުމަތްތައް އިތުރަށް ފުޅާވެގެންދިޔަ ކަމަށެވެ. މިކަމުގެ ސަބަބުން ނަފްސާނީ ބަލިމީހުންނަށް ހިދުމަތްނުލިބި ކިއުގައި މަޑުކުރަން ޖެހޭ މުއްދަތު ކުޑަވެގެން ދާކަން ވެސް އެ ހޮސްޕިޓަލުން ފާހަގަކުރިއެވެ. އެގޮތުން 2021 ވަނަ އަހަރު 16-18 މަހާއި ދެމެދުގެ މުއްދަތަކަށް ނަފްސާނީ ބަލިތަކުގެ ހާއްސަ ޑޮކްޓަރަކަށް ދެއްކުމަށް މަޑުކުރަން ޖެހުނު ނަމަވެސް މިހާރު އެ މުއްދަތު 3-2 މަހަށް ކުޑަކުރެވިފައިވާކަމަށް ބުންޏެވެ.
ނަފްސާނީ ބަލި މީހުންނަށް އެނދުމަތިކޮށްގެން ޚިދުމަތް ދޭ އިންޕޭޝަންޓް ކެއަރ ޔުނިޓު، 2022 ވަނަ އަހަރުގެ ޖޫން މަހު ހުޅުވާފައިވާއިރު އެ ޔުނިޓުން އެ އަހަރުގެ ޑިސެމްނަރު މަހުގެ ނިޔަލަށް 188 މީހުން އެޑްމިޓުކޮށްގެން ފަރުވާ ދީފައިވާ ކަމަށް އައިޖީއެމްއެޗުން ބުންޏެވެ. އަދި މިއަހަރުގެ މިހާތަނަށް 66 މީހުން އެޑްމިޓުކޮށްގެން ވަނީ ފަރުވާ ދީފައެވެ. އެޑްމިޓްކޮށްގެން ދެވޭ ނަފްސާނީ ހިދުމަތްތަކުގެ ތެރޭގައި ޓެސްޓުކުރުމާއި ބަލި ދެނެގަތުން، ފަރުވާދިނުން، ސައިކޯއެޑިއުކޭޝަން އަދި ރީހެބިލިޓޭޓްކުރުން ފަދަ ކަންކަން ހިމެނެއެވެ.
