އަމްރު އަށް ނަޝީދުގެ ތައުރީފު
މިދިޔަ 4 އަހަރަކީ އެސްޓީއޯއިން ރަނގަޅު ނަތީޖާއެއް ނެރުނު އަހަރުތަކެއް
ރައީސް ނަޝީދު އެމްޑީޕީ ކޮންގްރެސްގައި ވާހަކަފުޅުދައްކަވަނީ
ފާއިތުވި 4 އަހަރު އެސްޓީއޯގެ މެނޭޖިންގ ޑިރެކްޓަރު އަދި ޗީފް އެގްޒެކެޓިވް އޮފިސަރުގެ މަގާމުގައި އަމްރު ކުރެއްވިި މަސައްކަތްތަކަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތައުރީފުކުރައްވައިފިއެވެ.
އަމްރު އެސްޓީއޯގެ އެމްޑީ އަދި ސީއީއޯގެ މަގާމުން ވަކިކޮށްފައިވަނީ އާދީއްތަ ދުވަހުއެވެ.
އަމްރު ވަކިކުރުމާ ގުޅިގެން ނަޝީދު ކުރެއްވި ޓްވީޓެއްގައި ވިދާޅުވީ މިދިޔަ 4 އަހަރަކީ އެސްޓީއޯއިން ރަނގަޅު ނަތީޖާއެއް ނެރުނު އަހަރުތަކެއް ކަމަށެވެ. ސަރުކާރު ހިއްސާވާ އެހެން ކުންފުނިތަކާ އަޅައިކިޔުމުން އެކަން ސާފުވާނެ ކަމަށް ނަޝީދު ވިދާޅުވިއެވެ.
މީގެއިތުރުން ކުންފުންޏަށް ރަނގަޅު ފައިދާއެއް ހޯދައިދީ، ތަކެތީގެ އަގު އުފުލުނަ ނުދީ ހިފަހައްޓައިދީފައިވާކަމަށް ނަޝީދު ވިދާޅުވިއެވެ. އަދި ކޮވިޑްގެ ހާލަތުގައި ވެސް ރަށްރަށް ކާޑަށް ޖެހުނަނުދީ ހިފެހެއްޓި ކަމަށް ނަޝީދު ވިދާޅުވިއެވެ.
އަމްރު މަގާމުން ވަކިކުރުމަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑަށް ރައީސް އޮފީހުން ފޮނުވާފައިވަނީ އާދިއްތަ ދުވަހުގެ ވަގުތެއްގައެވެ. މިކަމާއި ގުޅޭގޮތުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ސަރުކާރުގެ ކުންފުނިތަކުގެ ހިންގުމަށް އަބަދުވެސް ބަދަލުތައް ގެންނަ ކަމަށެވެ.
އެސްޓީއޯއިން އަމްރު ވަކިކޮށްފައިވާއިރު، އަމްރު ގެންދަވަނީ ފާޅުގައި އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހާ ދެކޮޅަށް މަސައްކަތް ކުރައްވަމުންނެވެ.
